ಬೆಂಗಳೂರು: ಈಗಾಗಲೇ ಕಿರುತೆರೆಯಲ್ಲಿ ಹಳೇ ಕಾರ್ಯಕ್ರಮಗಳ ರಂಗು ಹೆಚ್ಚಾಗಿದೆ. ದಶಕಗಳ ಹಿಂದೆ ಮೋಡಿ ಮಾಡಿದ ಧಾರಾವಾಹಿಗಳು ಮರುಪ್ರಸಾರಗೊಂಡು ದಾಖಲೆ ಸೃಷ್ಟಿಸುತ್ತಿವೆ. ರಾಮಾಯಣ ವಿಶ್ವದಾಖಲೆ ಬರೆದರೆ, ಮಹಾಭಾರತ, ಶಕ್ತಿಮಾನ್ ಸೀರಿಯಲ್ಗಳು ಜನಮೆಚ್ಚುಗೆ ಪಡೆಯುತ್ತಿವೆ. ಹೀಗಿರುವಾಗ ಕಿರುತೆರೆಗೆ ಹೊಸ ವರ್ಚಸ್ಸು ತಂದುಕೊಟ್ಟ ಶಂಕರ್ನಾಗ್ ನಿರ್ದೇಶನದ ‘ಮಾಲ್ಗುಡಿ ಡೇಸ್’ ಮರುಪ್ರಸಾರಕ್ಕೆ ಸಜ್ಜಾಗುತ್ತಿದೆ. ಮೇ 11ರಿಂದ ವಾರದ ಐದು ದಿನ ಜೀ ಕನ್ನಡದಲ್ಲಿ ಮೂಡಿಬರಲಿದೆ.
ಹೌದು, ವಿಷ್ಣುವರ್ಧನ್, ಅನಂತ್ನಾಗ್, ಮಾಸ್ಟರ್ ಮಂಜುನಾಥ್, ಗಿರೀಶ್ ಕಾರ್ನಾಡ್ ಮೇರು ನಟರೆಲ್ಲ ನಟಿಸಿದ, ಮಾಲ್ಗುಡಿ ಡೇಸ್ ಧಾರಾವಾಹಿ 1986ರಲ್ಲಿ ಕಿರುತೆರೆಯಲ್ಲಿ ದೊಡ್ಡ ದಾಖಲೆ ಬರೆದಿತ್ತು. ಕಾಲ್ಪನಿಕ ಊರಲ್ಲಿ ಶಂಕರ್ನಾಗ್ ಅದ್ಬುತ ದೃಶ್ಯಕಾವ್ಯವನ್ನು ಸೃಷ್ಟಿಸಿದ್ದರು. ಇದೀಗ ಅಂದಿನ ಆ ಧಾರಾವಾಹಿ ಮತ್ತೆ ಲಾಕ್ಡೌನ್ ಹೊತ್ತಲ್ಲಿ ಕನ್ನಡಕ್ಕೆ ಡಬ್ ಆಗಿ ಕಿರುತೆರೆಗೆ ಬರುತ್ತಿದೆ. ಜೀ ಕನ್ನಡ ವಾಹಿನಿಯಲ್ಲಿ ಶೀಘ್ರದಲ್ಲಿಯೇ ಮಾಲ್ಗುಡಿ ಪ್ರಸಾರವಾಗಲಿದ್ದು, 54 ಏಪಿಸೋಡ್ಗಳಲ್ಲಿ ಆಯ್ದ ಕೆಲವು ಬಿತ್ತರ ಆಗಲಿವೆ.
ಇದನ್ನೂ ಓದಿ: ಹೊಡೆದಾಟಕ್ಕೆ ಸಂಜಯ್ ದತ್ ತಯಾರಿ, ‘ಕೆಜಿಎಫ್’ಗೆ ದೇಹದಂಡನೆ; ಕಟ್ಟುನಿಟ್ಟಿನ ಡಯಟ್
ಮೂಲ ಹಿಂದಿ ಮತ್ತು ಇಂಗ್ಲಿಷ್ನಲ್ಲಿ ಈ ಧಾರಾವಾಹಿ ಮೂಡಿಬಂದಿದ್ದು, ಇದೀಗ ಕನ್ನಡಕ್ಕೂ ಡಬ್ ಆಗಿ 1980-90 ಕಾಲಘಟ್ಟದಲ್ಲಿ ಜನಿಸಿದವರನ್ನು ಮತ್ತೆ ಹಳೇ ದಿನಗಳಿಗೆ ಮರಳಿ ಕರೆದೊಯ್ಯಲಿದೆ. ಶಂಕರ್ನಾಗ್ ನಿರ್ದೇಶನದಲ್ಲಿ ಒಟ್ಟು 39 ಏಪಿಸೋಡ್ಗಳು ತಯಾರಾದರೆ, ಇನ್ನುಳಿದ 15 ಏಪಿಸೋಡ್ಳನ್ನು ಕವಿತಾ ಲಂಕೇಶ್ ಡೈರೆಕ್ಷನ್ ಮಾಡಿದ್ದರು.