ಬೆಂಗಳೂರು: ಬಹುತೇಕ ಚಿತ್ರೀಕರಣ ಮುಗಿಸಿಕೊಂಡಿರುವ ‘ಕೆಜಿಎಫ್’ ತಂಡ, ಲಾಕ್ಡೌನ್ ತೆರವಾಗುವುದನ್ನೇ ಕಾಯುತ್ತಿದೆ. ಬಾಕಿ ಉಳಿದ ಕ್ಲೈಮ್ಯಾಕ್ಸ್ ಶೂಟಿಂಗ್ ಮುಗಿಸಿಕೊಳ್ಳುವ ಕಾತರದಲ್ಲಿದೆ. ಈ ನಡುವೆ ಶೂಟಿಂಗ್ ಸ್ಥಗಿತವಾಗಿದ್ದರೂ, ಯಶ್ ತಮ್ಮ ದೇಹವನ್ನು ಮತ್ತಷ್ಟು ಗಟ್ಟಿಯಾಗಿಸಿಕೊಳ್ಳುತ್ತಿದ್ದಾರೆ, ಇತ್ತ ಚಿತ್ರದ ಮುಖ್ಯ ವಿಲನ್ ಸಂಜಯ್ ದತ್ ಸುಮ್ಮನಿರುತ್ತಾರಾ? ಯಶ್ಗಿಂತ ಒಂದು ಹೆಜ್ಜೆ ಮುಂದೆ ಹೋಗಿ, ನಾಯಕನೆದುರು ಸೆಣಸಾಡಲು ದೇಹವನ್ನು ಕಲ್ಲಾಗಿಸಿಕೊಳ್ಳುತ್ತಿದ್ದಾರೆ!
ಹೌದು, ಲಾಕ್ಡೌನ್ ಹಿನ್ನೆಲೆಯಲ್ಲಿ ‘ಕೆಜಿಎಫ್’ ಸಿನಿಮಾ ಗುಂಗಲ್ಲೇ ದತ್ ಕಾಲಕಳೆಯುತ್ತಿದ್ದಾರೆ. ಕ್ಲೈಮ್ಯಾಕ್ಸ್ ಹೊಡೆದಾಟಕ್ಕಾಗಿ 60ರ ಇಳಿವಯಸ್ಸಿನಲ್ಲೂ ಡಯಟ್ ಮೊರೆ ಹೋಗಿದ್ದಾರೆ. ಆದರೆ, ಸಂಜಯ್ ಡಯಟ್ ಹೇಗಿರಬೇಕು ಎಂಬುದನ್ನು ಪತ್ನಿ ಮಾನ್ಯತಾ ನಿರ್ಧರಿಸುತ್ತಿದ್ದರು. ಸದ್ಯ ಲಾಕ್ಡೌನ್ ಜಾರಿಯಲ್ಲಿರುವುದರಿಂದ ಮಾನ್ಯತಾ ದುಬೈನಲ್ಲಿದ್ದಾರೆ. ಅದೆಲ್ಲವನ್ನು ಮೀರಿ, ಅವರ ಅನುಪಸ್ಥಿತಿ ನಡುವೆಯೂ ಸ್ವತಃ ತಾವೇ ಕಟ್ಟುನಿಟ್ಟಿನ ಡಯಟ್ ಪಾಲಿಸುತ್ತಿದ್ದಾರಂತೆ.
ಇದನ್ನೂ ಓದಿ: ಮೇ 4 ರಿಂದ ಕೇದಾರನಾಥ ದರ್ಶನಕ್ಕೆ ಅವಕಾಶ, ಹಸಿರು ವಲಯದ ಜಿಲ್ಲೆಗಳ ಭಕ್ತರು ಭೇಟಿ ನೀಡಬಹುದು
ಕ್ಯಾಮರಾ ಎದುರು ಶರ್ಟ್ ಕಳಚಿದರೆ, ದತ್ಗೂ ಆ ಲುಕ್ ಇಷ್ಟವಾಗಬೇಕಂತೆ. ಹಾಗಾಗಿ ನಿತ್ಯ ಹಲವು ಗಂಟೆಗಳ ಕಾಲ ಮನೆಯಲ್ಲಿನ ಜಿಮ್ಲ್ಲಿ ದೇಹದಂಡಿಸುತ್ತಿದ್ದಾರಂತೆ ದತ್.
ಇತ್ತ ಪ್ರಶಾಂತ್ ನೀಲ್ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ‘ಕೆಜಿಎಫ್ – ಚಾಪ್ಟರ್ 2’, ಸ್ಯಾಂಡಲ್ವುಡ್ನ ಬಹುನಿರೀಕ್ಷಿತ ಸಿನಿಮಾಗಳಲ್ಲೊಂದು. ಬೇರೆ ಭಾಷಿಕರೂ ಅಷ್ಟೇ ಕುತೂಹಲದಲ್ಲಿ ಈ ಸಿನಿಮಾ ಆಗಮನಕ್ಕೆ ಕಾಯುತ್ತಿದ್ದಾರೆ. ಸಿನಿಮಾ ತಂಡವೇ ಹೇಳಿಕೊಂಡಂತೆ ಅಕ್ಟೋಬರ್ 23ಕ್ಕೆ ಕನ್ನಡ ಸೇರಿ ತೆಲುಗು, ತಮಿಳು, ಮಲಯಾಳಂ ಮತ್ತು ಹಿಂದಿಯಲ್ಲಿ ಈ ಚಿತ್ರ ತೆರಕಾಣಲಿದೆ.