ಇದು, ಬೃಹತ್ ಮತ್ತು ಮಧ್ಯಮ ಕೈಗಾರಿಕೆ ಸಚಿವ ಎಂ.ಬಿ. ಪಾಟೀಲ್ ಅವರ ದೃಢ ವಿಶ್ವಾಸ. ‘ವಿಜಯವಾಣಿ’ ಕಚೇರಿಗೆ ಶನಿವಾರ ಸೌಜನ್ಯದ ಭೇಟಿ ನೀಡಿದ್ದ ಅವರು, ಔಪಚಾರಿಕ ಮಾತುಕತೆಯ ವೇಳೆ ಇಲಾಖೆಯ ತುರ್ತ, ತಾತ್ಕಾಲಿಕ, ದೀರ್ಘಾವಧಿ ಕ್ರಮಗಳ ಝುಲಕ್ಗಳನ್ನು ಹಂಚಿಕೊಂಡರು. ರಾಜ್ಯಾದ್ಯಂತ ಭೂಬ್ಯಾಂಕ್ ಸಮಗ್ರ ಪರಿಶೋಧನೆ ನಡೆಸಿ, ವಸ್ತುಸ್ಥಿತಿ ವರದಿ ಸಲ್ಲಿಸಲು ಕೈಗಾರಿಕಾ ಪ್ರದೇಶಾಭಿವೃದ್ಧಿ ಮಂಡಳಿ (ಕೆಐಎಡಿಬಿ) ಅಧಿಕಾರಿಗಳಿಗೆ ಸೂಚಿಸಿರುವೆ. ಸ್ವಾಧೀನವಾದ ಭೂಮಿ, ವರ್ಷ, ಬಳಕೆ, ಸದ್ಯದ ಸ್ಥಿತಿ, ವಿಳಂಬಕ್ಕೆ ಕಾರಣ ಇತ್ಯಾದಿ ವಿವರ ಒಳಗೊಂಡ ಮಾಹಿತಿ, ಅಂಕಿ-ಅಂಶಗಳ ವರದಿ ನಿರೀಕ್ಷಿಸಿರುವೆ. ಸಮಗ್ರ ವರದಿ ಬಯಸಿದ ಉದ್ದೇಶವನ್ನು ಅಧಿಕಾರಿಗಳು ಅರ್ಥ ಮಾಡಿಕೊಂಡಿದ್ದಾರೆ. ಈ ತಿಂಗಳ ಅಂತ್ಯದೊಳಗೆ ವರದಿ ಸಲ್ಲಿಸಲಿದ್ದು, ಪರಾಮಶಿಸಿದ ಬಳಿಕ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಮುಂದಿಟ್ಟು ಮುಂದಿನ ಕ್ರಮಗಳ ಬಗ್ಗೆ ಸಲಹೆ ಪಡೆಯುವೆ ಎಂದರು.
