ಗುಕೇಶ್​ ಎದುರು ಲಿರೆನ್​ ಬೇಕೆಂದೇ ಸೋತರೆಂದ ರಷ್ಯಾ; ವಿಶ್ವ ಚೆಸ್​ ಸಂಸ್ಥೆ ನೀಡಿದ ಸ್ಪಷ್ಟನೆ ಹೀಗಿದೆ...

ಸಿಂಗಾಪುರ/ಮಾಸ್ಕೋ: ವಿಶ್ವ ಚೆಸ್​ ಚಾಂಪಿಯನ್​ಷಿಪ್​ನ 14ನೇ ಹಾಗೂ ಕೊನೇ ಪಂದ್ಯ ಡ್ರಾದತ್ತ ಸಾಗುತ್ತಿದ್ದಾಗ ಹಾಲಿ ಚಾಂಪಿಯನ್​ ಚೀನಾದ ಡಿಂಗ್​ ಲಿರೆನ್​ 55ನೇ ನಡೆಯಲ್ಲಿ ದೊಡ್ಡ ಎಡವಟ್ಟು ಮಾಡಿಕೊಂಡರು. ಇದರ ಲಾಭವೆತ್ತಿದ ಗುಕೇಶ್​ 58ನೇ ನಡೆಯಲ್ಲಿ ಗೆಲುವು ಒಲಿಸಿಕೊಂಡರು. ಲಿರೆನ್​ ನಿರ್ಣಾಯಕ ಹಂತದಲ್ಲಿ ಉದ್ದೇಶಪೂರ್ವಕವಾಗಿ ಕೆಟ್ಟ ನಡೆ ಇಟ್ಟು, ಬೇಕೆಂದೇ ಸೋತರು ಎಂದು ರಷ್ಯಾ ಚೆಸ್​ ಒಕ್ಕೂಟದ ಅದ್ಯಕ್ಷ ಆಂಡ್ರೇ ಫಿಲಾಟೋವ್​ ಆರೋಪಿಸಿದ್ದಾರೆ. ಜತೆಗೆ ಈ ಬಗ್ಗೆ ಸಮಗ್ರ ತನಿಖೆ ನಡೆಸಬೇಕೆಂದು ಒತ್ತಾಯಿಸಿದ್ದಾರೆ.

"ಕೊನೇ ಪಂದ್ಯದ ಫಲಿತಾಂಶ ವೃತ್ತಿಪರ ಚೆಸ್​ ಆಟಗಾರರ ಮತ್ತು ಅಭಿಮಾನಿಗಳಿಗೆ ದಿಗ್ಭ್ರಮೆ ತಂದಿದೆ. ನಿರ್ಣಾಯಕ ಹಂತದಲ್ಲಿ ಚೀನಾ ಆಟಗಾರ ಇಟ್ಟ ನಡೆ ಅನುಮಾನಾಸ್ಪದವಾಗಿದೆ. ಈ ಬಗ್ಗೆ ಫಿಡೆ ತನಿಖೆ ಮಾಡಬೇಕಾದ ಅಗತ್ಯವಿದೆ. ಲಿರೆನ್​ ಆಗ ಇದ್ದ ಸ್ಥಿತಿಯಲ್ಲಿ ಸೋಲುವುದು ಬಹುತೇಕ ಅಸಾಧ್ಯವೆನಿಸಿತ್ತು. ಆದರೆ ಅವರು ಬೇಕೆಂದೇ ಸೋತಂತೆ ಕಾಣಿಸಿತು' ಎಂದು ಫಿಲಾಟೋವ್​ ದೂರಿದ್ದಾರೆ.

ಕ್ರೀಡೆಯಲ್ಲಿ ತಪ್ಪುಗಳಾಗುತ್ತವೆ ಎಂದ ಫಿಡೆ

ವಿಶ್ವ ಚೆಸ್​ ಚಾಂಪಿಯನ್​ಷಿಪ್​ನ ಗುಣಮಟ್ಟ ಮತ್ತು ಡಿಂಗ್​ ಲಿರೆನ್​ ನಿರ್ಣಾಯಕ ಹಂತದಲ್ಲಿ ಇಟ್ಟ ಎಡವಟ್ಟಿನ ನಡೆಯ ವಿರುದ್ಧ ಟೀಕೆಗಳು ವ್ಯಕ್ತವಾಗುತ್ತಿವೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ವಿಶ್ವ ಚೆಸ್​ ಆಡಳಿತ ಸಂಸ್ಥೆ ಫಿಡೆಯ ಅಧ್ಯಕ್ಷ ಅರ್ಕಾಡಿ ಡ್ವೊಕೋರ್ವಿಚ್​, "ಕ್ರೀಡೆಯ ರೋಚಕ ಹಂತಗಳಲ್ಲಿ ಆಟಗಾರರು ತಪ್ಪುಗಳನ್ನು ಮಾಡುವುದು ಸಹಜವಾದುದು' ಎಂದು ಸಮರ್ಥಿಸಿಕೊಂಡಿದ್ದಾರೆ. "ಕ್ರೀಡೆಯಲ್ಲಿ ತಪ್ಪುಗಳು ಇದ್ದೇ ಇರುತ್ತವೆ. ಫುಟ್​ಬಾಲ್​ನಲ್ಲಿ ತಪ್ಪುಗಳು ಆಗದಿದ್ದರೆ ಗೋಲುಗಳೇ ಆಗುವುದಿಲ್ಲ. ಎಲ್ಲ ಕ್ರೀಡಾಪಟುಗಳು ತಪ್ಪುಗಳನ್ನು ಮಾಡುತ್ತಾರೆ. ಆದರೆ ಆ ತಪ್ಪುಗಳಿಂದ ಎದುರಾಳಿ ಲಾಭ ಪಡೆದುಕೊಳ್ಳುವನೇ ಎಂಬುದೇ ನಿರ್ಣಾಯಕವಾದುದು' ಎಂದು ಡ್ವೊಕೋರ್ವಿಚ್​ ವಿಶ್ವ ಚೆಸ್​ ಸಮಾರೋಪ ಸಮಾರಂಭದಲ್ಲಿ ವಿವರಿಸಿದರು.

https://www.vijayavani.net/jaiswal-who-came-late-team-india-bus-left-at-the-hotel