ಮೂಗಿನ ಹಾದಿಯಲ್ಲಿ ಅತಿಯಾದ ಲೋಳೆಯ ಪರಿಣಾಮವಾಗಿ ನೆಗಡಿ ಎಂದು ಭಾವಿಸಲಾಗುತ್ತದೆ. ಸಾಮಾನ್ಯ ವಾಗಿ ಶೀತ, ಜ್ವರ, ಅಲರ್ಜಿ ಯಾ ಸೈನಸ್ ಸೋಂಕಿನಿಂದ ಪ್ರಚೋದಿಸುತ್ತದೆ. ಕುಂಡಲಿನಿಯೋಗದ ಪ್ರಾಚೀನ ವಿಜ್ಞಾನದಲ್ಲಿ ಇಡಾ (ಮೂಗಿನ ಎಡ ಹೊಳ್ಳೆ) ಮತ್ತು ಪಿಂಗಳಾ (ಮೂಗಿನ ಬಲ ಹೊಳ್ಳೆ) ಎಂಬ ಎರಡು ಶಕ್ತಿಗಳಿವೆ. ಅದು ಬೆನ್ನು ಮೂಳೆಯ ಬದಿಗಳನ್ನು ಹೆಣೆದುಕೊಂಡಿದೆ. ಮೂಗಿನ ಮಧ್ಯ ಸುಷುಮ್ನಾ ನಾಡಿ ಎನ್ನಲಾಗಿದೆ. ಇಡಾ ಎಂದರೆ ಶಾಂತಗೊಳಿಸುವ, ತಂಪಾಗಿಸುವ ಚಂದ್ರನ ಶಕ್ತಿ. ಪಿಂಗಳಾ ನಾಡಿ ಸೂರ್ಯ ಶಕ್ತಿ, ಉಷ್ಣದ ಅನುಭವ ಮತ್ತು ಚಟುವಟಿಕೆ ಹೆಚ್ಚುತ್ತದೆ. ಈ ಶಕ್ತಿಗಳ ಸಮತೋಲನಕ್ಕೆ ನಾಡೀಶುದ್ಧಿ ಪ್ರಾಣಾಯಾಮ, ಸೂರ್ಯಾನುಲೋಮ, ಹಾಗೂ ಚಂದ್ರಾನುಲೋಮ ಪ್ರಾಣಾಯಾಮಗಳನ್ನು ಗುರುಮುಖೇನ ಕಲಿತು ಮುಂಜಾನೆ ಖಾಲಿ ಹೊಟ್ಟೆಯಲ್ಲಿ ಅಭ್ಯಾಸ ಮಾಡಿ. ಇದರೊಂದಿಗೆ ಸಾಧ್ಯವಾಗುವ ವ್ಯಾಯಾಮಗಳು, ಸೂರ್ಯನಮಸ್ಕಾರ, ಆಸನಗಳನ್ನು ಅಭ್ಯಾಸ ಮಾಡಿ. ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ. ಒಮ್ಮೆ ತಜ್ಞ ವೈದ್ಯರೊಂದಿಗೆ ಪರೀಕ್ಷಿಸಿ. ನಿತ್ಯ ಸಾಧ್ಯವಾಗುವ ಯೋಗಾಭ್ಯಾಸ ಮಾಡಿ.
ಸೂಚಿತ ಆಸನಗಳು: ತಾಡಾಸನ, ಅರ್ಧಚಕ್ರಾಸನ, ಪಾದಹಸ್ತಾಸನ, ಪರ್ವತಾಸನ, ಶಶಾಂಕಾಸನ, ಸರ್ವಾಂಗಾಸನ ಯಾ ಸೇತುಬಂಧ, ಹಲಾಸನ, ಭುಜಂಗಾಸನ, ಅಧೋಮುಖ ಶ್ವಾನಾಸನ, ಶವಾಸನ.
