ಯೋಗ ಕ್ಷೇಮ: ಹರ್ನಿಯಾ ತಡೆಗೆ ಯೋಗಾಭ್ಯಾಸ

ಹರ್ನಿಯಾ ಸಮಸ್ಯೆ ತಡೆಗೆ ಯಾವ ಯೋಗಾಸನಗಳನ್ನು ಅಭ್ಯಾಸ ಮಾಡಬೇಕು?

| ಮಲ್ಲಿಕಾರ್ಜುನ ದೊಡ್ಡಬಳ್ಳಾಪುರ

ದೇಹದ ಒಳಗಿನ ಅಂಗವೊಂದು ಹೊರಬರುವುದು ಹರ್ನಿಯಾದ ಒಂದು ಸ್ಥಿತಿಯಾಗಿದೆ. ಒಂದು ಅಂಗವು ಸ್ನಾಯು ಅಥವಾ ಅಂಗಾಂಗಳಲ್ಲಿ ತೆರೆಯುವ ಮೂಲಕ ತಳ್ಳಿದಾಗ ಅಂಡವಾಯು (ಹರ್ನಿಯಾ) ಉಂಟಾಗುತ್ತದೆ. ವಿವಿಧ ರೀತಿಯ ಅಂಡವಾಯುಗಳಿಗೆ ವಿಭಿನ್ನ ಕಾರಣಗಳಿರಬಹುದು. ದುರ್ಬಲಗೊಂಡ ಸ್ನಾಯು ಅಥವಾ ಅಂಗಾಂಶದ ಪ್ರದೇಶದಲ್ಲಿ ಒತ್ತಡ ಸಂಭವಿಸಿದಾಗ ಅಂಡವಾಯು ರೂಪುಗೊಳ್ಳುತ್ತದೆ. ಕೆಲವು ಚಲನೆಗಳು ಮತ್ತು ತಪ್ಪು ಅಭ್ಯಾಸಗಳಿಂದ ಅಂಡವಾಯು ಉಂಟಾಗುತ್ತದೆ. ಆಯ್ದ ಆಸನಗಳು ಮತ್ತು ಪ್ರಾಣಾಯಾಮವನ್ನು ಸರಿಯಾಗಿ ಅಭ್ಯಾಸ ಮಾಡುವುದರಿಂದ ಅಂಡವಾಯು (ಹರ್ನಿಯಾ) ತಡೆಗಟ್ಟಲು ಮತ್ತು ಚಿಕಿತ್ಸೆ ನೀಡಲು ಸಹಾಯ ಮಾಡುತ್ತದೆ. ಯೋಗವು ಮೂಲತಃ ವಿಸ್ತರಿಸುವುದು ಮತ್ತು ತಗ್ಗಿಸುವ ವ್ಯಾಯಾಮ ರೂಪವಾಗಿದೆ. ಆಯ್ದ ಭಂಗಿಗಳನ್ನು ಅಭ್ಯಾಸ ಮಾಡುವುದರಿಂದ ಹೊಕ್ಕುಳ ಪ್ರದೇಶ ಯಾ ಹೊಟ್ಟೆಯ ಪ್ರದೇಶ ಮೇಲೆ ಸೂಕ್ತ ಒತ್ತಡ ಒದಗಿ ಕರುಳು ಯಾ ಕಿಬ್ಬೊಟ್ಟೆಯ ಪ್ರದೇಶದ ಭಾಗವನ್ನು ಕಡಿಮೆ ಮಾಡುತ್ತದೆ.

ಸೂಚಿತ ಆಸನಗಳು: ತಾಡಾಸನ, ತ್ರಿಕೋಣಾಸನ, ನೌಕಾಸನ, ಪಾದಹಸ್ತಾಸನ, ಬದ್ಧಕೋಣಾಸನ, ಮರ್ಕಟಾಸನ, ಕಟಿಚಕ್ರಾಸನ, ಅರ್ಧಚಕ್ರಾಸನ, ಅರ್ಧಹಲಾಸನ, ಉತ್ತಾನಪಾದಾಸನ, ಉತ್ಥಿತ ಏಕಪಾದಾಸನ, ಶವಾಸನ, ವಿಪರೀತ ಕರಣೀ ಹಾಗೂ ಉಡ್ಡೀಯಾನ ಬಂಧ, ಅಗ್ನಿಸಾರ ಕ್ರಿಯೆ. ಆರಂಭದಲ್ಲಿ ಸಾಧ್ಯವಾಗುವ ಆಸನಗಳನ್ನು ಮಾಡಿ. ಒಮ್ಮೆ ವೈದ್ಯರೊಂದಿಗೆ ಹಾಗೂ ಯೋಗ ಚಿಕಿತ್ಸಕರೊಂದಿಗೆ ಸಮಾಲೋಚಿಸಿ. ಭಾರವಾದ ವಸ್ತು ಎತ್ತಬೇಡಿ. ಸಾತ್ವಿಕ ಆಹಾರವನ್ನು ಮಾತ್ರ ಸೇವಿಸಿ.

ಇದನ್ನೂ ಓದಿ: ತರಕಾರಿ ಮತ್ತು ಹಣ್ಣುಗಳನ್ನು ಸ್ಯಾನಿಟೈಸರ್​ನಲ್ಲಿ ಸ್ವಚ್ಛಗೊಳಿಸಬೇಡಿ

ಮಹರ್ಷಿ ಪತಂಜಲಿಯವರು ರಚಿಸಿದ ಯೋಗಗ್ರಂಥದಲ್ಲಿ ಎಷ್ಟು ಸೂತ್ರಗಳಿವೆ? ಅದನ್ನು ಎಷ್ಟು ಪಾದಗಳಲ್ಲಿ ವಿವರಿಸಿದ್ದಾರೆ? ಅಷ್ಟಾಂಗ ಯೋಗಗಳು ಯಾವುದು?

| ವೇದವ್ಯಾಸ ಪೈ ಮೈಸೂರು

ಯೋಗದ ಸಿದ್ಧಾಂತ ಮತ್ತು ಅಭ್ಯಾಸದ ಕುರಿತು 195 ಸಂಸ್ಕೃತ ಸೂತ್ರಗಳ ರೂಪದಲ್ಲಿ ಪತಂಜಲಿಯ ಯೋಗಸೂತ್ರಗಳು ಸಂಗ್ರಹವಾಗಿದೆ. ಅದನ್ನು ನಾಲ್ಕು ಅಧ್ಯಾಯಗಳನ್ನು ವಿವರಿಸಿದ್ದಾರೆ. ಅವುಗಳೆಂದರೆ - ಸಮಾಧಿಪಾದ, ಸಾಧನಾಪಾದ, ವಿಭೂತಿಪಾದ ಮತ್ತು ಕೈವಲ್ಯಪಾದ.

ಪಾತಂಜಲ ಯೋಗಸೂತ್ರಗಳಲ್ಲಿ ತಿಳಿಸಿರುವಂತೆ ಯೋಗದ ಎಂಟು ಅವಯವಗಳಾದ ಅಷ್ಟಾಂಗಯೋಗವು ಶಾಸ್ತ್ರೀಯ ಯೋಗದ ವರ್ಗೀಕರಣವಾಗಿದೆ. ಅವು - 1. ಯಮ (ಇಂದ್ರಿಯನಿಗ್ರಹ), 2. ನಿಯಮ (ಆಚರಣೆಗಳು), 3. ಆಸನ (ಭಂಗಿಗಳು), 4. ಪ್ರಾಣಾಯಾಮ (ಉಸಿರಾಟ), 5. ಪ್ರತ್ಯಾಹಾರ (ಪಂಚೇಂದ್ರಿಯಗಳ ಹತೋಟಿ), 6. ಧಾರಣ (ಏಕಾಗ್ರತೆ), 7. ಧ್ಯಾನ, 8. ಸಮಾಧಿ (ಹೀರಿಕೊಳ್ಳುವಿಕೆ).