ಕೇಶದ ಕುರಿತು ಕ್ಲೇಶವೇ?: ಈ ಐದು ವಿಟಮಿನ್ ಸೇವಿಸಿದರೆ ತಲೆಗೂದಲಿಗೆ ಒಳ್ಳೆಯದು!

ಬೆಂಗಳೂರು: ಮನುಷ್ಯನ ತಲೆಯಲ್ಲಿ ಕೂದಲು ಇರಲಿ-ಇಲ್ಲದಿರಲಿ ಆ ಕುರಿತ ಒಂದು ಯೋಚನೆ ತಲೆಯೊಳಗೆ ಇದ್ದೇ ಇರುತ್ತದೆ. ಏಕೆಂದರೆ ಕೇಶ ಇದ್ದವರಿಗೆ ಕೂದಲು ಉದುರೀತು ಎಂಬ ಆತಂಕ, ಕೇಶವಿಲ್ಲದವರಿಗೆ ಕೂದಲು ಉದುರಿತಲ್ಲ ಎಂಬ ಚಿಂತೆ. ಆದರೆ ಕೇಶದ ಕುರಿತ ಕ್ಲೇಶ ಕಡಿಮೆ ಮಾಡಿಕೊಳ್ಳಲು ಸುಲಭದ ಉಪಾಯ ಇಲ್ಲಿದೆ. ಉತ್ತಮ ಕೇಶರಾಶಿಗಾಗಿ ಈ ಐದು ವಿಟಮಿನ್​ಗಳನ್ನು ಸೇವಿಸಿದರೆ ಒಳಿತು ಎಂದು ಹೇಳಲಾಗುತ್ತಿದೆ.

ದೇಹಕ್ಕೆ ಬೇಕಾದ ಆಹಾರಾಂಶಗಳನ್ನು ಸರಿಯಾಗಿ ಒದಗಿಸಿದರೆ ಕೇಶದ ಬೆಳವಣಿಗೆ ಆರೋಗ್ಯಕ್ಕೂ ಒಳ್ಳೆಯದು. ಅಂದರೆ ಪರಿಣತರ ಪ್ರಕಾರ ಕೇಶಾರೋಗ್ಯಕ್ಕೆ ವಿಟಮಿನ್​ ಅತ್ಯಗತ್ಯ. ದೈನಂದಿನ ಆಹಾರದಲ್ಲಿ ನಿಯಮಿತವಾಗಿ ಸೂಕ್ತಪ್ರಮಾಣದ ವಿಟಮಿನ್ ಇರುವಂತೆ ನೋಡಿಕೊಂಡರೆ ಕೇಶದ ಬೆಳವಣಿಗೆ ಹಾಗೂ ಆರೋಗ್ಯ ಎರಡೂ ಚೆನ್ನಾಗಿರುತ್ತದೆ ಎಂಬುದು ಪರಿಣತರ ಅಭಿಪ್ರಾಯ.
ವಿಟಮಿನ್​ಗಳ ವಿವರ ಇಂತಿದೆ..

ವಿಟಮಿನ್ ಎ

ವಿಟಮಿನ್​ ಎ ಎಪಿಥೀಲಿಯಲ್ ಟಿಶ್ಯೂಗಳ ಬೆಳವಣಿಗೆಯಲ್ಲಿ ಮಹತ್ವದ ಪಾತ್ರ ವಹಿಸುತ್ತಿದ್ದು, ಇದು ಕೂದಲ ಬೆಳವಣಿಗೆಗೆ ಸಹಕರಿಸುತ್ತದೆ. ತ್ವಚೆಯ ಗ್ರಂಥಿಗಳಲ್ಲಿ ಸೀಬಮ್ ಆಯಿಲ್ ಉತ್ಪಾದನೆಯನ್ನೂ ಈ ವಿಟಮಿನ್ ಉತ್ತೇಜಿಸುತ್ತದೆ. ಈ ಸೀಬಮ್ ನೆತ್ತಿಯ ತೇವಾಂಶ ಕಾಪಾಡಿ ಆರೋಗ್ಯವಾಗಿರಿಸಿ ಕೂದಲಿನ ಬೆಳವಣಿಗೆಗೆ ಸಹಕರಿಸುತ್ತದೆ. ಆದರೆ ಅತಿಯಾದ ವಿಟಮಿನ್ ಎ ಸೇವನೆ ಕೇಶಕ್ಕೆ ಸಂಬಂಧಿತ ಅಲೊಪೀಸಿಯಾ ಎಂಬ ಸಮಸ್ಯೆಗೆ ಕಾರಣವಾಗಬಹುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಎಚ್ಚರಿಸಿದೆ.

ದಿನಕ್ಕೆಷ್ಟು ಒಳಿತು?: ದಿನವೊಂದಕ್ಕೆ ಪುರುಷರು 0.9 ಮಿಲಿಗ್ರಾಂ ಮತ್ತು ಮಹಿಳೆಯರು 0.7 ಮಿಲಿಗ್ರಾಂ ವಿಟಮಿನ್ ಎ ಪಡೆದುಕೊಳ್ಳುವುದು ಸೂಕ್ತ ಎನ್ನಲಾಗಿದೆ.

ಯಾವ ಆಹಾರ ಒಳ್ಳೆಯದು?: ವಿಟಮಿನ್​ ಎ ಸಲುವಾಗಿ ಹಾಲು ಹಾಗೂ ಲಸ್ಸಿ, ಪನೀರ್ ಉತ್ತಮ. ಒಂದು ಕಪ್​ ಹಾಲು 112 ಎಂಸಿಜಿ ವಿಟಮಿನ್ ಎ ಒದಗಿಸಬಲ್ಲದು ಎಂದು ಯುಎಸ್​ಡಿಎ ಡೇಟಾ ತಿಳಿಸಿದೆ.

ವಿಟಮಿನ್ ಬಿ

ಬಯೊಟಿನ್ ಅಥವಾ ವಿಟಮಿನ್​ ಬಿ7 ಎಂದೂ ಕರೆಯಲಾಗುವ ವಿಟಮಿನ್ ಬಿ ದೇಹದೊಳಗಿನ ಜೀವಕೋಶಗಳ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ. ಈ ವಿಟಮಿನ್ ಕೊರತೆ ಕೂದಲು ಉದುರುವಿಕೆ ಜೊತೆಗೆ ಕೇಶ-ತ್ವಚೆ ಸಂಬಂಧಿತ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ವಿಟಮಿನ್​ ಬಿ ಪ್ರೊಟೀನ್​ ಉತ್ಪಾದನೆಯನ್ನು ವೃದ್ಧಿಸಿ, ಕೆರಾಟಿನ್ ಉತ್ಪಾದನೆಯನ್ನೂ ಉತ್ತೇಜಿಸಿ ಆ ಮೂಲಕ ಕೂದಲಿನ ಬೇರುಗಳನ್ನು ಬಲಗೊಳಿಸುತ್ತದೆ ಎನ್ನಲಾಗಿದೆ.

ದಿನಕ್ಕೆಷ್ಟು ಸೂಕ್ತ?: ಹದಿಹರೆಯದವರು ಹಾಗೂ ವಯಸ್ಕರು ದಿನಕ್ಕೆ 30ರಿಂದ 100 ಮೈಕ್ರೋಗ್ರಾಮ್ಸ್​(ಎಂಸಿಜಿ) ಮತ್ತು ಮಕ್ಕಳು 25 ಎಂಸಿಜಿ ವಿಟಮಿನ್​ ಬಿ ತೆಗೆದುಕೊಳ್ಳಬಹುದು.

ಯಾವ ಆಹಾರ ಒಳಿತು?: ಬಾಳೆಹಣ್ಣಿನಲ್ಲಿ ವಿಟಮಿನ್ ಬಿ ಹೇರಳವಾಗಿದೆ. ಒಂದು ಚಿಕ್ಕ ಬಾಳೆಹಣ್ಣಿನಲ್ಲಿ 0.2 ಎಂಸಿಜಿ ಬಯೊಟಿನ್ ಲಭ್ಯ. ಬಾಳೆಹಣ್ಣನ್ನು ಹಾಗೇ ಅಥವಾ ರಸಾಯನ ಮಾಡಿಕೊಂಡು ಸೇವಿಸಬಹುದು.

ವಿಟಮಿನ್ ಸಿ

ಅಸ್ಕಾರ್ಬಿಕ್ ಆ್ಯಸಿಡ್ (ವಿಟಮಿನ್ ಸಿ) ಆ್ಯಂಟಿ ಆಕ್ಸಿಡೆಂಟ್​ ಥರ ಕೆಲಸ ಮಾಡುತ್ತಿದ್ದು, ಅದು ಟಾಕ್ಸಿನ್ ಅಂಶಗಳನ್ನು ಹೊರಹಾಕಿ ರಕ್ತ ಹಾಗೂ ಜೀವಕೋಶಗಳಿಗೆ ಆಮ್ಲಜನಕವನ್ನು ಪೂರೈಸುತ್ತದೆ. ಆ ಮೂಲಕ ಕೊಲಾಜೆನ್ ಉತ್ಪಾದನೆಗೂ ಕಾರಣವಾಗುತ್ತದೆ. ಇದು ಕೇಶರಚನೆಗೆ ಬಹುಮುಖ್ಯ ಅಂಶ, ಮಾತ್ರವಲ್ಲ ಇದು ನೆತ್ತಿಗೆ ರಕ್ತ ಸಂಚಾರವನ್ನೂ ಸರಾಗಗೊಳಿಸುತ್ತದೆ.

ಎಷ್ಟು ಬೇಕು?: ಮಹಿಳೆಯರು ದಿನಕ್ಕೆ 75 ಮಿಲಿಗ್ರಾಂ ಹಾಗೂ ಪುರುಷರು ದಿನಕ್ಕೆ 19 ಮಿಲಿಗ್ರಾಂ ವಿಟಮಿನ್ ಸಿ ತೆಗೆದುಕೊಳ್ಳಬಹುದು.

ವಿಟಮಿನ್ ಸಿ ಹೇರಳ ಇರುವ ಆಹಾರ: ಒಂದು ಲಿಂಬೆಹಣ್ಣಿನಿಂದ 31 ಮಿಲಿಗ್ರಾಂ ವಿಟಮಿನ್ ಸಿ ಲಭ್ಯವಿದ್ದು, ಈ ಮೂಲಕ ದೇಹಕ್ಕೆ ಅಗತ್ಯವಿರುವ ಅರ್ಧದಷ್ಟು ವಿಟಮಿನ್ ಸಿ ಸಿಕ್ಕಂತಾಗುತ್ತದೆ. ಒಂದು ಗ್ಲಾಸ್ ಶರಬತ್​ನೊಂದಿಗೆ ದಿನವನ್ನು ಆರಂಭಿಸುವುದರಿಂದ ವಿಟಮಿನ್ ಸಿ ಪಡೆಯಬಹುದು.

ವಿಟಮಿನ್ ಡಿ

ಹೊಸ ಹಾಗೂ ಹಳೆಯ ಹೇರ್ ಫಾಲಿಕಲ್ಸ್​ಗಳ ಉತ್ತೇಜನದಲ್ಲಿ ವಿಟಮಿನ್ ಡಿ ಪಾತ್ರ ಪ್ರಮುಖವಾದುದು. ವಿಟಮಿನ್ ಡಿ ಸಾಕಷ್ಟು ಪ್ರಮಾಣದಲ್ಲಿ ಲಭ್ಯವಿರದಿದ್ದರೆ ಹೊಸ ಕೇಶದ ಬೆಳವಣಿಗೆ ಕುಂಠಿತಗೊಳ್ಳುತ್ತದೆ. ಅಲ್ಲದೆ ವಿಟಮಿನ್ ಡಿ ಕೊರತೆ ಕೂದಲು ಉದುರುವಿಕೆಗೂ ಕಾರಣವಾಗಬಹುದು ಎಂದು ಅಧ್ಯಯನಗಳು ಹೇಳಿವೆ.

ಯಾವ ಪ್ರಮಾಣದಲ್ಲಿ ಸೂಕ್ತ?: ಪುರುಷರು ಹಾಗೂ ಮಹಿಳೆಯರು ಒಂದು ದಿನಕ್ಕೆ 0.025 ಎಂಸಿಜಿ ವಿಟಮಿನ್ ಡಿ ತೆಗೆದುಕೊಳ್ಳುವುದು ಸೂಕ್ತ.

ಎಲ್ಲಿಂದ ಪಡೆಯಬಹುದು?: ವಿಟಮಿನ್ ಡಿ ಪ್ರಮುಖವಾಗಿ ಸೂರ್ಯನಿಂದ ಸಿಗುವಂಥದ್ದು. ದಿನಕ್ಕೆ ಒಂದಷ್ಟು ಸಮಯ ಸೂರ್ಯನ ಕಿರಣಗಳಿಗೆ ನೇರವಾಗಿ ಮೈಯೊಡ್ಡುವುದರಿಂದ ವಿಟಮಿನ್ ಡಿ ಪಡೆಯಬಹುದು.

ವಿಟಮಿನ್ ಇ

ಇದು ಆ್ಯಂಟಿ ಆಕ್ಸಿಡೆಂಟ್ಸ್​ ಹೊಂದಿದ್ದು, ರಕ್ತ ಹಾಗೂ ಆಮ್ಲಜನಕ ಸಂಚಾರವನ್ನು ವೃದ್ಧಿಸುವ ಮೂಲಕ ಕೇಶದ ಬೆಳವಣಿಗೆಗೆ ಸಹಕರಿಸುತ್ತದೆ. ವಿಟಮಿನ್ ಇನಲ್ಲಿ ಕಂಡು ಬರುವ ಟೊಕೊಫೆರಾಲ್ ಎಂಬ ರಾಸಾಯನಿಕದ ಕೊರತೆ ಕೇಶ ಉದುರಿದ ಹಲವರಲ್ಲಿ ಸಾಮಾನ್ಯವಾಗಿ ಕಂಡುಬರುತ್ತದೆ. ನಂತರ ಸುಮಾರು ಎಂಟು ತಿಂಗಳಮಟ್ಟಿಗೆ ಈ ರಾಸಾಯನಿಕದ ಪೂರೈಕೆಯಿಂದ ಕೂದಲು ಬೆಳವಣಿಗೆಯಲ್ಲಿ ಗಣನೀಯ ಪ್ರಗತಿ ಕಂಡುಬಂದಿದೆ ಎಂಬುದು ಅಧ್ಯಯನದಿಂದ ತಿಳಿದುಬಂದಿದೆ.

ದಿನಕ್ಕೆಷ್ಟು ಬೇಕು?: ದಿನವೊಂದಕ್ಕೆ ಪುರುಷರು ಮತ್ತು ಮಹಿಳೆಯರು 10 ಮಿಲಿಗ್ರಾಂ ವಿಟಮಿನ್ ಇ ತೆಗೆದುಕೊಂಡರೆ ಸಾಕು.

ಯಾವ ಆಹಾರ ಒಳ್ಳೆಯದು?: ವಿಟಮಿನ್ ಈ ಬಾದಾಮಿಯಲ್ಲಿ ಹೇರಳವಾಗಿದೆ. ಒಂದು ಮುಷ್ಟಿಯಷ್ಟು ಬಾದಾಮಿಯಲ್ಲಿ 7.7 ಮಿಲಿಗ್ರಾಂ ವಿಟಮಿನ್ ಇ ಸಿಗಬಲ್ಲದು. ಇದರಿಂದ ದೈನಂದಿನ ಅಗತ್ಯದ ಮುಕ್ಕಾಲು ಭಾಗ ಸಿಕ್ಕಂತಾಗುತ್ತದೆ. ದಿನದ ಆಹಾರದಲ್ಲಿ ಬಾದಾಮಿಯನ್ನು ಬಳಸುವುದರಿಂದ ವಿಟಮಿನ್ ಇ ಸುಲಭದಲ್ಲಿ ಪಡೆಯಬಹುದು.

ಇವೆಲ್ಲವೂ ಕೆಲವು ಅಧ್ಯಯನಗಳಿಂದ ಕಂಡುಬಂದಿರುವ ಅಂಶಗಳಾಗಿದ್ದು, ಇದರ ಫಲಿತಾಂಶ ಎಲ್ಲರ ಮೇಲೂ ಒಂದೇ ಸಮನಾಗಿ ಇರುವುದಿಲ್ಲ ಹಾಗೂ ಕೆಲವರಲ್ಲಿ ವ್ಯತ್ಯಾಸವಾಗುವ ಸಾಧ್ಯತೆ ಇರುವುದರಿಂದ ಪರಿಣತರ ಸಲಹೆ ಪಡೆದೇ ಇವುಗಳನ್ನು ಪಾಲಿಸುವುದು ಸೂಕ್ತ.

https://www.vijayavani.net/wife-got-angry-with-husband-for-comparing-her-with-kiara-advani/

https://www.vijayavani.net/grandfather-got-jail-for-sexually-harassing-granddaughter/

https://www.vijayavani.net/give-back-12-15-lakh-rupees-that-recovered-in-corruption-allegation/