sun sound : ರಾತ್ರಿ ಆಕಾಶದಲ್ಲಿ ಹೊಳೆಯುವ ಸೂರ್ಯನನ್ನು ನಾವು ಬೆಳಕು ಮತ್ತು ಶಾಖದ ಮೂಲವಾಗಿ ನೋಡುತ್ತೇವೆ. ಆದರೆ ಇದೇ ಸೂರ್ಯನೊಳಗೆ ನಿರಂತರವಾಗಿ ಕಂಪನಗಳು ನಡೆಯುತ್ತಿದ್ದು, ಅವುಗಳಿಂದ ಶಬ್ದ ತರಂಗಗಳೂ ಉತ್ಪತ್ತಿಯಾಗುತ್ತವೆ ಎಂದರೆ ನಂಬುತ್ತೀರಾ? ಹೌದು, ಸೂರ್ಯನಿಗೂ ತನ್ನದೇ ಆದ ಕಂಪನಗಳಿವೆ. ಅಚ್ಚರಿಯ ಸಂಗತಿಯೆಂದರೆ ನಾಸಾ ವಿಜ್ಞಾನಿಗಳು ಈ ಕಂಪನಗಳನ್ನು ದಾಖಲಿಸಿ, ಮನುಷ್ಯರು ಕೇಳಬಹುದಾದ ಧ್ವನಿಯಾಗಿ ಪರಿವರ್ತಿಸಿದ್ದಾರೆ
ಸೂರ್ಯನೊಳಗೆ ಏನಾಗುತ್ತಿದೆ?
ಸೂರ್ಯ ಒಂದು ಬೃಹತ್ ಅನಿಲದ ಗೋಳ. ಅದರ ಒಳಭಾಗದಲ್ಲಿ ನಿರಂತರವಾಗಿ ಶಕ್ತಿ ಉತ್ಪತ್ತಿಯಾಗುತ್ತಿರುತ್ತದೆ. ಅಪಾರ ಉಷ್ಣತೆ, ಒತ್ತಡ ಮತ್ತು ಅನಿಲಗಳ ಚಲನೆಯಿಂದ ಸೂರ್ಯನ ಒಳಭಾಗದಲ್ಲಿ ಒತ್ತಡದ ಅಲೆಗಳು ಹುಟ್ಟುತ್ತವೆ. ಇವು ಸೂರ್ಯನ ವಿವಿಧ ಪದರಗಳಲ್ಲಿ ಚಲಿಸಿ, ಅದರ ಮೇಲ್ಮೈಯನ್ನು ಸಣ್ಣ ಪ್ರಮಾಣದಲ್ಲಿ ಕಂಪಿಸುವಂತೆ ಮಾಡುತ್ತವೆ. ಈ ಕಂಪನಗಳನ್ನು ವಿಜ್ಞಾನಿಗಳು ಸೌರ ಕಂಪನಗಳು ಎಂದು ಕರೆಯುತ್ತಾರೆ. ಸೂರ್ಯನ ಒಳಭಾಗವನ್ನು ನೇರವಾಗಿ ನೋಡಲು ಸಾಧ್ಯವಿಲ್ಲದ ಕಾರಣ, ಅದರ ಮೇಲ್ಮೈಯಲ್ಲಾಗುವ ಇಂತಹ ಸಣ್ಣ ಬದಲಾವಣೆಗಳನ್ನು ಅಧ್ಯಯನ ಮಾಡುವ ಮೂಲಕ ಒಳಗಿನ ಚಟುವಟಿಕೆಗಳನ್ನು ಅರ್ಥಮಾಡಿಕೊಳ್ಳುತ್ತಾರೆ.
ನಾಸಾ ಹೇಗೆ ದಾಖಲಿಸಿತು ಸೂರ್ಯನ ಸದ್ದು?
ನಾಸಾ ಮತ್ತು ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಯ SOHO (Solar and Heliospheric Observatory) ಉಪಗ್ರಹವು ಹಲವು ವರ್ಷಗಳಿಂದ ಸೂರ್ಯನ ಚಟುವಟಿಕೆಗಳನ್ನು ಗಮನಿಸುತ್ತಿದೆ. ಈ ಉಪಗ್ರಹದ ಮೂಲಕ ಸಂಗ್ರಹಿಸಿದ ಮಾಹಿತಿಯನ್ನು ವಿಜ್ಞಾನಿಗಳು ವಿಶ್ಲೇಷಿಸಿದ್ದಾರೆ. ವಿಶೇಷವಾಗಿ 40 ದಿನಗಳ ಕಾಲ ಸಂಗ್ರಹಿಸಿದ ಸೂರ್ಯನ ಕಂಪನಗಳ ಮಾಹಿತಿಯನ್ನು ಧ್ವನಿಯಾಗಿ ಪರಿವರ್ತಿಸಲಾಗಿದೆ. ಆದರೆ ಇಲ್ಲಿ ಒಂದು ಕುತೂಹಲಕಾರಿ ಸಂಗತಿಯಿದೆ. ಸೂರ್ಯನಿಂದ ಹೊರಡುವ ಈ ಕಂಪನಗಳ ಮೂಲ ಆವರ್ತನ ಮನುಷ್ಯನ ಕಿವಿಗೆ ನೇರವಾಗಿ ಕೇಳಿಸುವಷ್ಟು ಇರಲಿಲ್ಲ. ಹೀಗಾಗಿ ವಿಜ್ಞಾನಿಗಳು ಅವುಗಳ ವೇಗವನ್ನು ಸುಮಾರು 42,000 ಪಟ್ಟು ಹೆಚ್ಚಿಸಿ ಕೇಳಬಹುದಾದ ಧ್ವನಿಯನ್ನಾಗಿ ಮಾಡಿದ್ದಾರೆ. ಇದರಿಂದ ಸೂರ್ಯನೊಳಗಿನ ಅಲೆಗಳು ಮತ್ತು ಚಲನೆಗಳನ್ನು ಧ್ವನಿಯ ರೂಪದಲ್ಲಿಯೂ ಅಧ್ಯಯನ ಮಾಡಲು ಸಾಧ್ಯವಾಗಿದೆ. ನಾಸಾ ಬಿಡುಗಡೆ ಮಾಡಿರುವ ಈ ಧ್ವನಿಯಲ್ಲಿ ನಿರಂತರವಾದ ಮೃದುವಾದ ಗುನುಗುವಿಕೆಯ ಅನುಭವ ಸಿಗುತ್ತದೆ.
