ಥಲಸ್ಸೇಮಿಯಾ ರೋಗದಿಂದ ಬಾಲಕ ಗುಣಮುಖ

ಬೆಂಗಳೂರು: ಆನುವಂಶೀಯ ರಕ್ತ ಸಮಸ್ಯೆಯಾದ ಥಲಸ್ಸೇಮಿಯಾ ರೋಗಕ್ಕೆ 9ನೇ ವರ್ಷದಲ್ಲಿ ತುತ್ತಾಗಿದ್ದ ಬೆಂಗಳೂರು ಮೂಲದ 17 ವರ್ಷದ ಚಿರಾಗ್​ ಎಂಬ ಬಾಲಕ, ನಿರಂತರ ಚಿಕಿತ್ಸೆಯಿಂದ ಇದೀಗ ಎಲ್ಲರಂತೆ ಜೀವನ ನಡೆಸಲು ಸಾಧ್ಯವಾಗಿದೆ.

ಮಗನನ್ನು ಗುಣಪಡಿಸಲು ಚಿರಾಗ್​ ಪಾಲಕರು ಇನ್ನಿಲ್ಲದ ಪ್ರಯತ್ನಪಡುತ್ತಿದ್ದರು. ಇದಕ್ಕಾಗಿ ಸಹೋದರಿಯ ಸ್ಟೆಮ್​ ಸೆಲ್​ಗಳನ್ನು ಹೊಂದಿಸಲು ಯತ್ನಿಸಿದ್ದರೂ ಡಿಎನ್​ಎ ಹೊಂದಾಣಿಕೆಯಾಗಿರಲಿಲ್ಲ. ಪರಿಣಾಮ, ಸುಮಾರು 10 ವರ್ಷ ದಾನಿಗಳಿಗಾಗಿ ಹುಡುಕಾಟ ನಡೆಸಲಾಗಿತ್ತು. ಈ ನಡುವೆ "ಡಿಕೆಎಂಎಸ್​ನ ಡೇಟಾಬೇಸ್​'ನಲ್ಲಿ ಜರ್ಮನಿಯ ರೋಮನ್​ ಎಂಬುವರ ಸೆಲ್​ ಹೊಂದಾಣಿಕೆಯಾಗಿತ್ತು. ಸ್ಟೆಮ್​ ಸೆಲ್​ ದಾನ ಮಾಡುವ ಕುರಿತು ಸಂಪರ್ಕಿಸಿದಾಗ ಸ್ಪಂದಿಸಿದ್ದರು. ಬಳಿಕ 2018ರಲ್ಲಿ ಸ್ಟೆಮ್​ ಸೆಲ್​ಗಳನ್ನು ನೀಡಿದ್ದರು.

ಗುಣಮುಖ ಹೊಂದಿರುವ ಚಿರಾಗ್​, ತನಗೆ ಸ್ಟೆಮ್​ ಸೆಲ್​ ನೀಡಿದವರನ್ನು ಭೇಟಿಯಾಗಿ ಧನ್ಯವಾದ ತಿಳಿಸಿದ ಅಪರೂಪದ ಕ್ಷಣಕ್ಕೆ "ಡಿಕೆಎಂಎಸ್​' ವತಿಯಿಂದ ವಿಶ್ವ ಥಲಸ್ಸೇಮಿಯಾ ದಿನದ ಅಂಗವಾಗಿ ನಗರದ ಖಾಸಗಿ ಹೋಟೆಲ್​ನಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮ ಸಾಯಾಯಿತು.

ಚಿರಾಗ್​ ಮಾತನಾಡಿ, ಪ್ರಾರಂಭದಲ್ಲಿ ರೋಗದ ಬಗ್ಗೆ ಅರಿವಿರಲಿಲ್ಲ. ನಂತರದಲ್ಲಿ ಅಶಕ್ತನಾಗುತ್ತಿದ್ದಂತೆ ನಿತ್ಯ ವೈದ್ಯರನ್ನು ಭೇಟಿಯಾಗಬೇಕಾಗಿ ಬಂತು. ಎಲ್ಲರಂತೆ ಆಟವಾಡಲು ಸಾಧ್ಯವಾಗುತ್ತಿರಲಿಲ್ಲ. ಇದೀಗ ಗುಣಮುಖ ಹೊಂದಿದ್ದು, ಸಂತಸವಾಗುತ್ತಿದೆ ಎಂದರು.

'ನನ್ನ ಸ್ಟೆಮ್​ ಸೆಲ್​ನಿಂದ ಚಿರಾಗ್​ನ ಜೀವನದಲ್ಲಿ ಮಹತ್ತರ ಬದಲಾವಣೆಯಾಗಿದೆ. ಸಾಧ್ಯವಾದಷ್ಟು ಜನರು ಅಗತ್ಯವಿರುವವರಿಗೆ ಸ್ಟೆಮ್​ ಸೆಲ್​ಗಳನ್ನು ದಾನ ಮಾಡುವ ಕಾರ್ಯಕ್ಕೆ ಮುಂದಾಗಿ' ಎಂದು ಸ್ಟೆಮ್​ಸೆಲ್​ ದಾನಿ ರೋಮನ್​ ಮನವಿ ಮಾಡಿದರು.

ಡಿಕೆಎಂಎಸ್​&ಬಿಎಂಎಸ್​ಟಿ ಸಿಇಒ ಪ್ಯಾಟ್ರಿಕ್​ ಪಾಲ್​, ನಾರಾಯಣ ಹೆಲ್ತ್​ ನಿರ್ದೇಶಕ, ರಕ್ತ ಹಾಗೂ ಅಸ್ಥಿಮಜ್ಜೆ ಕಸಿ ವಿಭಾಗದ ಡಾ. ಸುನೀಲ್​ ಭಟ್​ ಉಪಸ್ಥಿತರಿದ್ದರು.