ನಾಲಗೆಯ ಉರಿಯೂತಕ್ಕೆ ಕಾರಣ ಏನು? ಪರಿಹಾರ ಇದೆಯೇ?

ದೋಷಯುಕ್ತ ದಂತಪಂಕ್ತಿಗಳಿಂದ ನಿರಂತರ ಕಿರಿಕಿರಿ ಉಂಟಾಗಿ ಅದರಿಂದಲೂ ನಾಲಗೆಯ ನೋವು ಉಂಟಾಗಬಹುದು.

• ಹಲವು ದಿನಗಳಿಂದ ವಾಸಿಯಾಗದ ಬಾಯಿಹುಣ್ಣು
• ಬ್ಯಾಕ್ಟೀರಿಯಾ, ವೈರಸ್ ಅಥವಾ ಶಿಲೀಂಧ್ರಗಳಿಂದ ಸೋಂಕು ಉಂಟಾದಾಗ
• ಅತಿಯಾದ ಮದ್ಯಪಾನ ಅಥವಾ ಧೂಮಪಾನ
• ಬಾಯಿಯಲ್ಲಿ ಲಾಲಾರಸದ ಹರಿವು ಕಡಿಮೆಯಾದಾಗ
• ಹಲ್ಲುಗಳ ಮೊನಚಾದ ತುದಿ ಅಥವಾ ಅಂಚುಗಳಿಂದ
• ಲ್ಯುಕೋಪ್ಲಾಕಿಯ (ಲೋಳೆಯ ಪೊರೆಯ ಕಾಯಿಲೆ), ಲೈಕನ್ (ಕೆಂಪು ದದ್ದುಗಳಿಂದ ಕೂಡಿದ ಚರ್ಮವ್ಯಾಧಿ)
• ನಾಲಗೆಯನ್ನು ಅತಿಯಾಗಿ (ಆವಶ್ಯಕತೆಗಿಂತ ಹೆಚ್ಚು ) ಶುಚಿಗೊಳಿಸುವುದರಿಂದ
• ಅತಿಯಾದ ಬಿಸಿ ಪದಾರ್ಥಗಳ ಸೇವನೆಯಿಂದ
• ತಂಪು ಪಾನೀಯಗಳ ಅಧಿಕ ಸೇವನೆಯಿಂದ
• ಮಾನಸಿಕ ಒತ್ತಡ, ಆತಂಕ
• ಕಬ್ಬಿಣಾಂಶದ ಕೊರತೆ, ರಕ್ತಹೀನತೆ, ಅನ್ನಾಂಗಗಳ ಕೊರತೆ
• ಮಾತನಾಡುವಾಗ ಅಥವಾ ಊಟ ಮಾಡುವಾಗ ಕೆಲವು ಬಾರಿ ಅರಿವಿಲ್ಲದಂತೆ ನಾಲಗೆಯನ್ನು ಕಚ್ಚಿಕೊಳ್ಳುವುದು
• ಕೆಲವರಲ್ಲಿ ಆಹಾರಪದಾರ್ಥಗಳಿಂದಾಗಿ ಉಂಟಾಗುವಾ ಅಲರ್ಜಿಯಿಂದಾಗಿ ನೋವು ಕಾಣಿಸಿಕೊಳ್ಳಬಹುದು
• ಹಲವು ದಿನಗಳಿಂದ ಸಕ್ಕರೆ ಕಾಯಿಲೆ ಅಥವಾ ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿರುವವರಲ್ಲಿ
• ನಾಲಗೆಯ ಮೇಲಿನ ಆಲಂಕಾರಿಕ ಆಭರಣಗಳಿಂದ
• ಬಾಯಿಯ ಕ್ಯಾನ್ಸರ್ ಆರಂಭಿಕ ಹಂತದಲ್ಲಿ ನಾಲಗೆಯ ನೋವನ್ನು ಉಂಟುಮಾಡುತ್ತದೆ.

ಸಾಮಾನ್ಯವಾಗಿ ಹುಣ್ಣಿನಿಂದಾಗಿ ನಾಲಗೆಯಲ್ಲಿ ನೋವು ಉಂಟಾಗಿದ್ದರೆ ಯಾವುದೇ ಚಿಕಿತ್ಸೆಯಿಲ್ಲದೆ ಏಳರಿಂದ 14 ದಿನಗಳಲ್ಲಿ ಗುಣವಾಗುತ್ತದೆ. ಸರಿಯಾದ ಕಾರಣವನ್ನು ಗುರುತಿಸಿ ಚಿಕಿತ್ಸೆಯನ್ನು ನೀಡಿದಾಗ ನಾಲಗೆಯ ಉರಿಯೂತ ಗುಣವಾಗುತ್ತದೆ.

ಉರಿಯೂತವನ್ನು ಕಡಿಮೆ ಮಾಡುವುದು ಚಿಕಿತ್ಸೆಯ ಪ್ರಾಥಮಿಕ ಉದ್ದೇಶವಾಗಿದ್ದು, ದಿನಕ್ಕೆ ಎರಡು ಬಾರಿ ನಾಲಗೆ ಮತ್ತು ಹಲ್ಲುಗನ್ನು ಶುಚಿಗೊಳಿಸುವುದು ಅಗತ್ಯವಾಗಿರುತ್ತದೆ. ಸೋಂಕಿನಿಂದ ಉಂಟಾಗಿದ್ದಲ್ಲಿ ಶಿಲೀಂಧ್ರನಾಶಕ, ವೈರಸ್ ನಿರೋಧಕ ಔಷಧಗಳು ಸಹಾಯ ಮಾಡುತ್ತವೆ ಮತ್ತು ಮೌಥ್​ವಾಷ್​ಗಳ ಬಳಕೆಯೂ ಉತ್ತಮ ಪರಿಹಾರವನ್ನು ನೀಡಬಲ್ಲದು.

ಅತಿಯಾದ ಬಿಸಿ ಹಾಗೂ ಮಸಾಲೆಯುಕ್ತ ಆಹಾರಗಳಿಂದ ದೂರವಿರುವುದು ಉತ್ತಮ. ಅಪೌಷ್ಟಿಕತೆ ಅಥವಾ ಅನ್ನಾಂಗದ ಕೊರತೆಯಿಂದಾಗಿ ನಾಲಗೆಯ ಉರಿಯೂತ ಉಂಟಾದಲ್ಲಿ ಆಹಾರಪದ್ಧತಿಯಲ್ಲಿ ಬದಲಾವಣೆಯನ್ನು ಸೂಚಿಸಿ ಸೂಕ್ತ ಪೂರಕಗಳನ್ನು ನೀಡಲಾಗುತ್ತದೆ.

https://www.vijayavani.net/ayurvedic-treatment-for-psoriasis/