ಇದನ್ನೂ ಓದಿ : ಸಾವಿನ ನಂತರವೂ ಉಗುರು ಮತ್ತು ಕೂದಲು ಬೆಳೆಯುತ್ತವೆಯೇ? ಶವದ ಉಗುರು ಉದ್ದವಾಗುತ್ತೆ ಎನ್ನುವ ನಂಬಿಕೆಯ ಹಿಂದಿನ ಸತ್ಯವೇನು?Do nails grow after death
ಮಧ್ಯರಾತ್ರಿ 12 ಗಂಟೆಯೇ ಏಕೆ ವಿಶೇಷ?
ಮಧ್ಯರಾತ್ರಿ ಎಂದರೆ ದಿನ ಮುಗಿದು ಮತ್ತೊಂದು ದಿನ ಆರಂಭವಾಗುವ ಸಮಯ. ಸುತ್ತಮುತ್ತ ನಿಶ್ಶಬ್ದ, ಕಡಿಮೆ ಬೆಳಕು ಮತ್ತು ನಿರ್ಜನ ವಾತಾವರಣ ಇರುವುದರಿಂದ ಈ ಸಮಯಕ್ಕೆ ಸಂಬಂಧಿಸಿದಂತೆ ಅನೇಕ ಭಯಾನಕ ಕಥೆಗಳು ಜನಪ್ರಿಯವಾಗಿವೆ. ಯುರೋಪ್ ಮತ್ತು ಅಮೆರಿಕದ ಕೆಲವು ಹಳೆಯ ಜನಪದ ಸಂಪ್ರದಾಯಗಳಲ್ಲಿ ಮಧ್ಯರಾತ್ರಿ ಮೇಣದಬತ್ತಿಯ ಬೆಳಕಿನಲ್ಲಿ ಕನ್ನಡಿಯನ್ನು ದಿಟ್ಟಿಸಿ ನೋಡಿದರೆ ಭವಿಷ್ಯದ ಸಂಗಾತಿಯ ಮುಖ ಕಾಣಿಸುತ್ತದೆ ಎಂಬ ಭವಿಷ್ಯ ಹೇಳುವ ಆಚರಣೆಗಳಿದ್ದವು. ಇನ್ನು ಕೆಲವು ಕಥೆಗಳಲ್ಲಿ ಕನ್ನಡಿಯಲ್ಲಿ ಭಯಾನಕ ಆಕೃತಿಗಳು ಕಾಣಿಸುತ್ತವೆ ಎಂಬ ನಂಬಿಕೆಗಳೂ ಹರಡಿದ್ದವು.
ಕತ್ತಲಲ್ಲಿ ಕನ್ನಡಿಯಲ್ಲಿ ಮುಖ ಬೇರೆಯಾಗಿ ಕಾಣುವುದೇಕೆ?
ಇಲ್ಲಿ ವಿಜ್ಞಾನವೂ ಒಂದು ಕುತೂಹಲಕಾರಿ ವಿವರಣೆ ನೀಡುತ್ತದೆ. ಇಟಲಿಯ ಉರ್ಬಿನೋ ವಿಶ್ವವಿದ್ಯಾಲಯದ ಸಂಶೋಧಕ ಜಿಯೋವಾನಿ ಕಪುಟೊ ಅವರು 2010ರಲ್ಲಿ ನಡೆಸಿದ ಅಧ್ಯಯನದಲ್ಲಿ ಕಡಿಮೆ ಬೆಳಕಿನಲ್ಲಿ ಕನ್ನಡಿಯಲ್ಲಿನ ತಮ್ಮ ಮುಖವನ್ನು ದೀರ್ಘಕಾಲ ದಿಟ್ಟಿಸಿ ನೋಡಿದಾಗ ಕೆಲವರಿಗೆ ಮುಖದ ಆಕಾರ ಬದಲಾಗುತ್ತಿರುವಂತೆ, ಅಪರಿಚಿತ ವ್ಯಕ್ತಿಯ ಮುಖ ಅಥವಾ ವಿಚಿತ್ರ ಆಕೃತಿಗಳು ಕಾಣಿಸಿದ ಅನುಭವವಾಗಿತ್ತು. ಇದನ್ನು Strange-Face in the Mirror Illusion ಎಂದು ಕರೆಯಲಾಗುತ್ತದೆ. ಕಡಿಮೆ ಬೆಳಕು ಮತ್ತು ಒಂದೇ ಮುಖವನ್ನು ದೀರ್ಘಕಾಲ ದಿಟ್ಟಿಸುವುದರಿಂದ ದೃಷ್ಟಿ ಗ್ರಹಿಕೆಯಲ್ಲಿ ಬದಲಾವಣೆ ಉಂಟಾಗಿ ಇಂತಹ ಭ್ರಮೆಗಳು ಕಾಣಿಸಿಕೊಳ್ಳಬಹುದು ಎಂದು ಅಧ್ಯಯನ ವಿವರಿಸಿದೆ. ಹೀಗಾಗಿ ಕತ್ತಲ ಕೋಣೆಯಲ್ಲಿ ಕನ್ನಡಿಯ ಮುಂದೆ ನಿಂತಾಗ ನಮ್ಮ ಮುಖವೇ ಬೇರೆಯಾಗಿ ಕಾಣಿಸಿಕೊಳ್ಳುವುದು ಆತ್ಮ ಅಥವಾ ಭೂತ ಇರುವುದಕ್ಕೆ ಸಾಕ್ಷಿಯಲ್ಲ. ಇದು ದೃಷ್ಟಿ ಗ್ರಹಿಕೆಗೆ ಸಂಬಂಧಿಸಿದ ಅನುಭವವಾಗಿರಬಹುದು.
ಹಾಗಾದರೆ ಮಧ್ಯರಾತ್ರಿ ಕನ್ನಡಿಯಲ್ಲಿ ಮುಖ ನೋಡಬಾರದಾ?
ವೈಜ್ಞಾನಿಕವಾಗಿ ರಾತ್ರಿ 12 ಗಂಟೆಗೆ ಕನ್ನಡಿಯಲ್ಲಿ ಮುಖ ನೋಡಬಾರದು ಅಥವಾ ಹಾಗೆ ನೋಡುವುದರಿಂದ ದುರದೃಷ್ಟ ಸಂಭವಿಸುತ್ತದೆ ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ. ಬೇಕಾದರೆ ಮಧ್ಯರಾತ್ರಿಯಲ್ಲಿಯೂ ಕನ್ನಡಿಯಲ್ಲಿ ಮುಖ ನೋಡಬಹುದು. ಆದರೆ ಕಡಿಮೆ ಬೆಳಕಿನಲ್ಲಿ ದೀರ್ಘಕಾಲ ಪ್ರತಿಬಿಂಬವನ್ನೇ ದಿಟ್ಟಿಸಿ ನೋಡುವುದರಿಂದ ಕೆಲವರಿಗೆ ವಿಚಿತ್ರ ದೃಶ್ಯಗಳು ಕಾಣಿಸಿದಂತೆ ಅನಿಸಬಹುದು. ಕನ್ನಡಿಯ ಕುರಿತ ಇಂತಹ ಕಥೆಗಳು ತಲೆಮಾರಿನಿಂದ ತಲೆಮಾರಿಗೆ ಹರಡುತ್ತಾ ಬಂದಿವೆ. ನಂಬಿಕೆಗಳ ಹಿಂದೆ ಭಯಾನಕ ಕಥೆಗಳಿದ್ದರೂ, ಅವುಗಳ ಹಿಂದಿನ ವಿಜ್ಞಾನ ತಿಳಿದುಕೊಂಡಾಗ ಅನೇಕ ರಹಸ್ಯಗಳಿಗೆ ಸಹಜವಾದ ವಿವರಣೆ ಸಿಗುತ್ತದೆ.( ಏಜೇನ್ಸಿಸ್)
