Do nails grow after death: ಮನುಷ್ಯ ಸತ್ತ ನಂತರ ಆತನ ದೇಹದಲ್ಲಿ ಏನೆಲ್ಲ ಬದಲಾವಣೆಗಳಾಗುತ್ತವೆ ಎಂಬ ಕುತೂಹಲ ಹಲವರಿಗಿರುತ್ತದೆ. ಅದರಲ್ಲೂ ಸಾವಿನ ನಂತರವೂ ಕೂದಲು ಮತ್ತು ಉಗುರು ಬೆಳೆಯುತ್ತವೆ ಎಂಬ ಮಾತನ್ನು ನೀವು ಕೇಳಿರಬಹುದು. ಕೆಲವರು ಇದನ್ನು ನಿಜವೆಂದು ನಂಬಿದರೆ, ಇನ್ನು ಕೆಲವರು ಇದರ ಹಿಂದೆ ಯಾವುದೋ ನಿಗೂಢ ಸಂಗತಿ ಅಡಗಿದೆ ಎಂದು ಭಾವಿಸುತ್ತಾರೆ. ಅಷ್ಟಕ್ಕೂ ವ್ಯಕ್ತಿ ಮೃತಪಟ್ಟ ನಂತರವೂ ಆತನ ಕೂದಲು ಮತ್ತು ಉಗುರು ಬೆಳೆಯುತ್ತವೆಯೇ? ಜೀವವಿಲ್ಲದ ದೇಹದಲ್ಲಿ ಇಂತಹ ಬದಲಾವಣೆ ಸಾಧ್ಯವೇ? ಈ ಪ್ರಶ್ನೆಗೆ ವಿಜ್ಞಾನ ನೀಡುವ ಉತ್ತರವೇನು?
ಸಾವಿನ ನಂತರವೂ ಉಗುರು ಬೆಳೆಯುತ್ತವೆಯೇ?
ವೈಜ್ಞಾನಿಕವಾಗಿ ಹೇಳುವುದಾದರೆ, ವ್ಯಕ್ತಿ ಮೃತಪಟ್ಟ ನಂತರ ಉಗುರುಗಳ ಬೆಳವಣಿಗೆ ಮುಂದುವರಿಯುವುದಿಲ್ಲ. ಉಗುರು ಬೆಳೆಯಲು ಜೀವಂತ ಕೋಶಗಳು, ಆಮ್ಲಜನಕ ಮತ್ತು ಪೋಷಕಾಂಶಗಳ ಅಗತ್ಯವಿರುತ್ತದೆ. ಹೃದಯ ಬಡಿತ ನಿಂತು ರಕ್ತಪರಿಚಲನೆ ಸ್ಥಗಿತಗೊಂಡ ನಂತರ ದೇಹದ ಜೀವಕೋಶಗಳಿಗೆ ಅಗತ್ಯವಾದ ಆಮ್ಲಜನಕ ಮತ್ತು ಪೋಷಕಾಂಶಗಳ ಪೂರೈಕೆ ನಿಲ್ಲುತ್ತದೆ. ಇದರಿಂದ ಉಗುರುಗಳ ಬೆಳವಣಿಗೆಯೂ ನಿಂತುಹೋಗುತ್ತದೆ. ಹಾಗಾದರೆ ಸತ್ತ ವ್ಯಕ್ತಿಯ ಉಗುರುಗಳು ಉದ್ದವಾಗಿ ಕಾಣಿಸುವುದೇಕೆ ಎಂಬ ಪ್ರಶ್ನೆ ಮೂಡಬಹುದು. ಇದಕ್ಕೆ ಕಾರಣ ಚರ್ಮದಲ್ಲಿ ಸಂಭವಿಸುವ ಬದಲಾವಣೆ.
ಉಗುರು ಉದ್ದವಾದಂತೆ ಕಾಣಲು ಕಾರಣವೇನು?
ಸಾವಿನ ನಂತರ ದೇಹದಲ್ಲಿನ ನೀರಿನ ಅಂಶ ಕಡಿಮೆಯಾಗುತ್ತಾ ಚರ್ಮ ಒಣಗಲು ಆರಂಭಿಸುತ್ತದೆ. ವಿಶೇಷವಾಗಿ ಬೆರಳುಗಳ ತುದಿಯಲ್ಲಿರುವ ಚರ್ಮ ಕುಗ್ಗುವುದರಿಂದ ಉಗುರಿನ ಹೆಚ್ಚು ಭಾಗ ಹೊರಗೆ ಕಾಣಿಸಿಕೊಳ್ಳುತ್ತದೆ. ಇದರಿಂದ ಉಗುರುಗಳು ಮೊದಲಿಗಿಂತ ಉದ್ದವಾಗಿರುವಂತೆ ಭಾಸವಾಗುತ್ತದೆ. ಅಂದರೆ ನಿಜವಾಗಿ ಉಗುರು ಬೆಳೆಯುವುದಿಲ್ಲ. ಅದರ ಸುತ್ತಲಿನ ಚರ್ಮ ಕುಗ್ಗುವುದರಿಂದ ಉಗುರು ಉದ್ದವಾದಂತೆ ಕಾಣುತ್ತದೆ. ಇದೇ ಕಾರಣದಿಂದ ಸಾವಿನ ನಂತರವೂ ಉಗುರು ಬೆಳೆಯುತ್ತದೆ ಎಂಬ ತಪ್ಪು ಕಲ್ಪನೆ ಜನರಲ್ಲಿ ಹರಡಿದೆ.
