ಸತ್ಯವಾದರೋ ಎಂದೂ ಹೇಳಲು ಕಹಿ, ಯಾವಾಗಲೂ ನಿಷ್ಠುರವನ್ನೇ ತಂದೊಡ್ಡುತ್ತದೆ. ಸತ್ಯವನ್ನೇ ಹೇಳಿದರೆ ಕೇಳುವವರಿಗೆ ಅದನ್ನು ಅರಗಿಸಿಕೊಳ್ಳಲು ಕಷ್ಟವಾಗುತ್ತದೆ ಹಾಗೂ ಸತ್ಯ ಹೇಳಿದವರು ಇಷ್ಟವಾಗುವುದಿಲ್ಲ. ಎಷ್ಟಾದರೂ ‘ಕಂಡದ್ದನ್ನು ಕಂಡ ಹಾಗೇ ಹೇಳಿದರೆ ಕೆಂಡದಂಥ ಸಿಟ್ಟಲ್ಲವೇ?’ ಆದುದರಿಂದ ಜನ ಸತ್ಯ ಹೇಳುವುದರಿಂದ ಹಿಂದೆ ಸರಿಯುತ್ತಾರೆ. ಸತ್ಯ ಹೇಳಿ ನಾವೇಕೆ ಕೆಟ್ಟವರಾಗಬೇಕೆಂದು ತಿಳಿದು ಸುಮ್ಮನಾಗುತ್ತಾರೆ. ಪರಿಣಾಮವಾಗಿ ಸತ್ಯ ಮೂಲೆಗುಂಪಾಗುತ್ತದೆ. ಆದರೆ ನಮ್ಮ ಹಿತಚಿಂತಕರು ಸತ್ಯವನ್ನು ಹೇಳಲು ಹಿಂದೆಮುಂದೆ ನೋಡುವುದಿಲ್ಲ. ಸತ್ಯವನ್ನೇ ನುಡಿಯುವುದರಿಂದ ಆಗುವ ಒಂದು ಲಾಭ ಏನೆಂದರೆ, ಏನನ್ನೂ ನೆನಪಿನಲ್ಲಿ ಇಟ್ಟುಕೊಳ್ಳುವ ಅವಶ್ಯಕತೆ ಇರುವುದಿಲ್ಲ. ಸತ್ಯ ಎಷ್ಟೇ ಕಹಿಯಾಗಿದ್ದರೂ, ಕಟುವಾಗಿದ್ದರೂ, ನಯವಾದ ಕೇಳಲು ಸಿಹಿಯಾದ ಸುಳ್ಳಿಗಿಂತ ಎಂದೆಂದೂ ಮೇಲು. ನೀರು ಎಷ್ಟೇ ಬಿಸಿಯಾಗಿದ್ದರೂ ಬೆಂಕಿಯನ್ನು ಆರಿಸಬಲ್ಲದು. ಅಂತೇಯೆ ಸತ್ಯ ಎಷ್ಟೇ ಕಠೋರವಾಗಿದ್ದರೂ ಸುಳ್ಳನ್ನು ನಾಶಮಾಡಬಲ್ಲದು. ಸತ್ಯದ ಶಕ್ತಿ ಅಪಾರ ಮತ್ತು ಅಗಾಧ. ಸುಳ್ಳು ತಾತ್ಕಾಲಿಕವಾಗಿ ಪರಿಹಾರ ನೀಡಿದರೂ ಶಾಶ್ವತವಾಗಿ ಸುಖ, ನೆಮ್ಮದಿಯನ್ನು ನೀಡೋದು ಸತ್ಯವೊಂದೆ. ಸತ್ಯಕ್ಕಾಗಿ ಎಲ್ಲವನ್ನೂ ತ್ಯಾಗ ಮಾಡಬಹುದು. ಆದರೆ ಯಾವ ಕಾರಣಕ್ಕೂ ಸತ್ಯವನ್ನು ತ್ಯಾಗ ಮಾಡಬಾರದು.
