ಇನ್ನು ಉಸಿರಾಟದ ತೊಂದರೆ ತೀವ್ರಗೊಂಡಿರುವ ಮೂರ್ನಾಲ್ಕು ಪ್ರತಿಶತ ರೋಗಿಗಳಲ್ಲೂ ಅನೇಕರು ಗುಣಮುಖ ಆಗಿರುವುದರಿಂದ ವೈರಾಣು ಹೇಗೆ ಪ್ರಬಲವಾಗುತ್ತದೆ? ರೋಗ ಬಂದ ಮೇಲೆ ಚಿಕಿತ್ಸೆಗೆ ಹಲವಾರು ದಿನಗಳ ಅವಕಾಶ ಕೊಡುವ ವೈರಾಣು ಬಹಳ ಶಕ್ತಿಯುತವೇ? ಹಿಂದೆ ಬಂದ ಡೆಂಘೀ, ಚಿಕುನ್ಗುನ್ಯಾ, ಹೆಚ್1ಎನ್1ನಂತಹ ರೋಗಗಳು ರೋಗಕ್ಕೊಳಗಾದ ಎಲ್ಲರನ್ನೂ ತೀವ್ರ ಲಕ್ಷಣಗಳಿಂದ ಬಹುವಾಗಿ ಕಾಡಿದ್ದವು. ಕನಿಷ್ಠಪಕ್ಷ ಅಂತಹ ತೊಂದರೆಯನ್ನೂ ಕೊಡಲಾರದ ಕರೊನಾ ಅದು ಹೇಗೆ ಪ್ರಬಲವೆನ್ನುತ್ತೀರಿ? ಹಿಂದಿನೆಲ್ಲ ಈ ರೋಗಗಳು ಯುವಕರನ್ನು, ಮಕ್ಕಳನ್ನು, ಬೇರೆ ಯಾವುದೇ ಕಾಯಿಲೆಗಳಿರದ ಅನೇಕ ಸದೃಢರನ್ನೂ ಬಲಿತೆಗೆದುಕೊಂಡಿತು. ಈ ಕರೊನಾ ವೈರಾಣು ದುರ್ಬಲರನ್ನು, ವಯಸ್ಸಾದವರನ್ನು, ತೀವ್ರ ಉಸಿರಾಟದ ತೊಂದರೆ ಇರುವವರನ್ನೇ ಹುಡುಕುತ್ತ ಹೋಗುವುದು ಅದರ ಬಲಹೀನತೆ ಎನಿಸುವುದಿಲ್ಲವೇ? ನಿಜಕ್ಕೂ ಶಕ್ತಿಯಿದ್ದರೆ ಶಕ್ತಿವಂತರನ್ನೂ ಮಟ್ಟಹಾಕುವ ಗಟ್ಟಿತನ ಇರಬೇಕು ಹೊರತು ದುರ್ಬಲರನ್ನು ಹುಡುಕಿ ಕಾದಾಡುವುದಲ್ಲ. ಹೆಚ್ಚು ಜನರಲ್ಲಿ ಪರೀಕ್ಷಿಸಿದರೆ ರೋಗಿಷ್ಟರ ಸಂಖ್ಯೆ ಹೆಚ್ಚಾಗುತ್ತದೆ. ಆದರೆ ಪ್ರಾಣ ಬಿಟ್ಟವರ ಸಂಖ್ಯೆ ಅಷ್ಟೇ ಇರುತ್ತದೆ. ಮರಣದ ವಾಸ್ತವ ಪ್ರಮಾಣ ಈಗ ಕಾಣುತ್ತಿರುವುದಕ್ಕಿಂತಲೂ ಅದೆಷ್ಟೋ ಕಡಿಮೆಯಿದೆ! ನಿಜಪ್ರಮಾಣ ಐನೂರರಲ್ಲಿ ಒಂದಿರಬಹುದೇನೋ. ನೀವೇ ಹೇಳಿ, ಕರೊನಾ ಪ್ರಾಣ ತೆಗೆಯುವ ವಿಚಾರದಲ್ಲಿ ಪ್ರಬಲವೇ? ಈ ದುರ್ಬಲ ವೈರಾಣು ವಿಚಾರದಲ್ಲಿ ಅತಿ ಎಚ್ಚರದ ನಡೆ ಬೇಕೇ ಹೊರತು ಪ್ರಾಣಭಯವಲ್ಲ.
