Poisonous mushrooms: ಪ್ರಕೃತಿಯ ಒಡಲಿನಲ್ಲಿ ಅಡಗಿರುವ ರಹಸ್ಯಗಳು ಒಂದೊಂದಾಗಿ ಹೊರಬರುತ್ತಿವೆ. ನೋಡಲು ಸಾಮಾನ್ಯವಾಗಿ ಕಾಣುವ ಪುಟ್ಟ ಅಣಬೆಯೊಳಗೆ ಎಂತಹ ಅಪಾಯಕಾರಿ ರಾಸಾಯನಿಕಗಳು ಅಡಗಿರಬಹುದು ಎಂಬುದಕ್ಕೆ ಅಮೆರಿಕದಲ್ಲಿ ಪತ್ತೆಯಾಗಿರುವ ಹೊಸ ಅಣಬೆಯೇ ಸಾಕ್ಷಿ. ಕಂದು ಬಣ್ಣದ ಛತ್ರಿಯಾಕಾರದ ಈ ಅಣಬೆ ಇದೀಗ ವಿಜ್ಞಾನ ಲೋಕದಲ್ಲಿ ಭಾರಿ ಕುತೂಹಲ ಮೂಡಿಸಿದೆ. ಇದಕ್ಕೆ ಕಾರಣ ಒಂದೇ ಅಣಬೆಯಲ್ಲಿ ಪತ್ತೆಯಾಗಿರುವ ಎರಡು ವಿಭಿನ್ನ ಗುಣದ ರಾಸಾಯನಿಕಗಳು.
ಅಮೆರಿಕದ ಫ್ಲೋರಿಡಾ ರಾಜ್ಯದ ಜೌಗು ಪ್ರದೇಶಗಳಲ್ಲಿ ಪತ್ತೆಯಾದ ಈ ಅಣಬೆಗೆ ಗ್ಯಾಲೆರಿನಾ ಇಂಡಿಕಾ ಎಂದು ಹೆಸರಿಡಲಾಗಿದೆ. ಸಂಶೋಧಕರು ಇದನ್ನು ಡಾರ್ಕ್ ಮ್ಯಾಜಿಕ್ ಮಶ್ರೂಮ್ ಎಂದು ಕರೆದಿದ್ದಾರೆ. ಏಕೆಂದರೆ ಸಾಮಾನ್ಯವಾಗಿ ಪ್ರತ್ಯೇಕ ಶಿಲೀಂಧ್ರ ಗುಂಪುಗಳಲ್ಲಿ ಕಂಡುಬರುವ ಎರಡು ಅಪಾಯಕಾರಿ ರಾಸಾಯನಿಕಗಳನ್ನು ಈ ಒಂದೇ ಪ್ರಭೇದ ಉತ್ಪಾದಿಸುತ್ತದೆ ಎಂಬುದು ಸಂಶೋಧನೆಯಲ್ಲಿ ಬೆಳಕಿಗೆ ಬಂದಿದೆ.
ಒಂದರಲ್ಲಿ ಭ್ರಮೆ, ಮತ್ತೊಂದರಲ್ಲಿ ಪ್ರಾಣಕ್ಕೆ ಕುತ್ತು
ಈ ಅಣಬೆಯಲ್ಲಿರುವ ಪ್ರಮುಖ ಅಂಶಗಳೆಂದರೆ ಸೈಲೋಸೈಬಿನ್ ಮತ್ತು ಅಮಾಟಾಕ್ಸಿನ್ ಸೈಲೋಸೈಬಿನ್ ಮೆದುಳಿನ ಮೇಲೆ ಪರಿಣಾಮ ಬೀರುವ ಭ್ರಮೆಕಾರಕ ರಾಸಾಯನಿಕವಾಗಿದೆ. ಇದು ವ್ಯಕ್ತಿಯ ಗ್ರಹಿಕೆ, ಆಲೋಚನೆ ಹಾಗೂ ಸುತ್ತಮುತ್ತಲಿನ ಪರಿಸರವನ್ನು ಅನುಭವಿಸುವ ರೀತಿಯಲ್ಲಿ ಬದಲಾವಣೆ ಉಂಟುಮಾಡಬಹುದು.
ಇನ್ನೊಂದೆಡೆ ಅಮಾಟಾಕ್ಸಿನ್ ಅತ್ಯಂತ ವಿಷಕಾರಿ ಸಂಯುಕ್ತಗಳ ಗುಂಪಿಗೆ ಸೇರಿದೆ. ಇದು ದೇಹವನ್ನು ಸೇರಿದರೆ ಗಂಭೀರ ವಿಷಬಾಧೆ ಉಂಟಾಗಬಹುದು. ವಿಶೇಷವಾಗಿ ಯಕೃತ್ತಿನ ಮೇಲೆ ತೀವ್ರ ಪರಿಣಾಮ ಬೀರಿ ಜೀವಕ್ಕೂ ಅಪಾಯ ತಂದೊಡ್ಡಬಹುದು. ವಿಶ್ವದಾದ್ಯಂತ ಸಂಭವಿಸುವ ಮಾರಣಾಂತಿಕ ಅಣಬೆ ವಿಷಬಾಧೆಯ ಪ್ರಮುಖ ಕಾರಣಗಳಲ್ಲಿ ಅಮಾಟಾಕ್ಸಿನ್ ಕೂಡ ಒಂದು.
ಒಂದೇ ಅಣಬೆಯಲ್ಲಿ ಮನಸ್ಸಿನ ಗ್ರಹಿಕೆಯನ್ನು ಬದಲಿಸುವ ರಾಸಾಯನಿಕ ಹಾಗೂ ಜೀವಕ್ಕೆ ಅಪಾಯ ಉಂಟುಮಾಡುವ ವಿಷ ಇರುವುದು ಈ ಸಂಶೋಧನೆಯ ವಿಶೇಷತೆಯಾಗಿದೆ. ಈ ಹಿಂದೆ ಇಂತಹ ಎರಡು ರಾಸಾಯನಿಕಗಳು ಒಂದೇ ಅಣಬೆ ಪ್ರಭೇದದಲ್ಲಿ ಒಟ್ಟಿಗೆ ಕಂಡುಬಂದಿರುವುದಕ್ಕೆ ದಾಖಲೆ ಇರಲಿಲ್ಲ ಎಂದು ಸಂಶೋಧಕರು ತಿಳಿಸಿದ್ದಾರೆ.
