2. ಮನೆಯೊಳಗಿನ ವಾಯುಮಾಲಿನ್ಯ
ಮನೆಯೊಳಗೆ ಗಾಳಿಯ ಗುಣಮಟ್ಟವೂ ಶ್ವಾಸಕೋಶದ ಆರೋಗ್ಯಕ್ಕೆ ಬಹಳ ಮುಖ್ಯ. ಅಡುಗೆ ಮಾಡುವಾಗ ಉಂಟಾಗುವ ಹೊಗೆ, ಕಟ್ಟಿಗೆ ಅಥವಾ ಇತರ ಜೈವಿಕ ಇಂಧನಗಳ ಹೊಗೆ, ಧೂಪ, ಸೊಳ್ಳೆ ಕಾಯಿಲ್ಗಳ ಹೊಗೆ ಹಾಗೂ ಸರಿಯಾದ ಗಾಳಿಯಾಡುವಿಕೆ ಇಲ್ಲದಿರುವುದು ಮನೆಯೊಳಗಿನ ಮಾಲಿನ್ಯಕ್ಕೆ ಕಾರಣವಾಗಬಹುದು. ಹೀಗಾಗಿ ಅಡುಗೆ ಮನೆಯಲ್ಲಿ ಉತ್ತಮ ಗುಣಮಟ್ಟದ ಎಕ್ಸಾಸ್ಟ್ ಫ್ಯಾನ್ ಬಳಸುವುದು, ಕಿಟಕಿ, ಬಾಗಿಲುಗಳ ಮೂಲಕ ಗಾಳಿಯಾಡುವಂತೆ ಮಾಡುವುದು ಮತ್ತು ಮನೆಯೊಳಗೆ ಹೊಗೆ ಉತ್ಪತ್ತಿಯಾಗುವುದನ್ನು ಸಾಧ್ಯವಾದಷ್ಟು ಕಡಿಮೆ ಮಾಡುವುದು ಉತ್ತಮ.
3. ಕೆಲಸದ ಸ್ಥಳದಲ್ಲಿನ ಅಪಾಯಕಾರಿ ಅಂಶಗಳು
ಕೆಲವು ಉದ್ಯೋಗಗಳಲ್ಲಿ ಧೂಳು, ರಾಸಾಯನಿಕ ಹೊಗೆ ಅಥವಾ ಕೈಗಾರಿಕಾ ಕಣಗಳಿಗೆ ನಿರಂತರವಾಗಿ ಒಡ್ಡಿಕೊಳ್ಳುವ ಸಾಧ್ಯತೆ ಇರುತ್ತದೆ. ನಿರ್ಮಾಣ, ಉತ್ಪಾದನಾ ಘಟಕ, ಪ್ರಯೋಗಾಲಯ ಹಾಗೂ ಕಾರ್ಖಾನೆಗಳಲ್ಲಿ ಕೆಲಸ ಮಾಡುವವರು ಈ ಬಗ್ಗೆ ವಿಶೇಷ ಎಚ್ಚರಿಕೆ ವಹಿಸಬೇಕು. ಇಂತಹ ವಾಯುಮಾಲಿನ್ಯದ ಕೆಲಸಗಳಿಗೆ, ವಸ್ತುಗಳಿಗೆ ದೀರ್ಘಕಾಲ ಒಡ್ಡಿಕೊಳ್ಳುವುದರಿಂದ ಉಸಿರಾಟಕ್ಕೆ ಸಂಬಂಧಿಸಿದ ಕಾಯಿಲೆಗಳ ಅಪಾಯ ಹೆಚ್ಚಾಗಬಹುದು. ಆದ್ದರಿಂದ ಕೆಲಸದ ಸ್ಥಳದಲ್ಲಿ ನಿಗದಿ ಪಡಿಸಿರುವ ಸುರಕ್ಷತಾ ನಿಯಮಗಳನ್ನು ಪಾಲಿಸುವುದು ಹಾಗೂ ಅಗತ್ಯ ರಕ್ಷಣಾ ಸಾಧನಗಳನ್ನು ಬಳಸುವುದು ಮುಖ್ಯ.
4. ಪರೋಕ್ಷ ಧೂಮಪಾನ
ಧೂಮಪಾನ ಮಾಡುವವರು ಮಾತ್ರವಲ್ಲ, ಅವರ ಸುತ್ತಮುತ್ತ ಇರುವವರೂ ಸಿಗರೇಟ್ ಸೇದುವವರ ಹೊಗೆಯಿಂದ ಹಾನಿಕಾರಕ ರಾಸಾಯನಿಕಗಳನ್ನು ಉಸಿರಾಡಬಹುದು. ಇದನ್ನೇ ಪರೋಕ್ಷ ಧೂಮಪಾನ ಅಥವಾ ಸೆಕೆಂಡ್ಹ್ಯಾಂಡ್ ಸ್ಮೋಕ್ ಎಂದು ಕರೆಯಲಾಗುತ್ತದೆ. ಮನೆ, ಕಾರು ಹಾಗೂ ಇತರ ಹಂಚಿಕೆಯ ಸ್ಥಳಗಳನ್ನು ಧೂಮಪಾನ ಮುಕ್ತವಾಗಿಡುವುದು ಮುಖ್ಯ. ವಿಶೇಷವಾಗಿ ಮಕ್ಕಳು, ವೃದ್ಧರು ಹಾಗೂ ಈಗಾಗಲೇ ಉಸಿರಾಟದ ಸಮಸ್ಯೆ ಹೊಂದಿರುವವರನ್ನು ಹೊಗೆಯಿಂದ ದೂರವಿಡಬೇಕು.
5. ದಿನನಿತ್ಯ ಬಳಸುವ ಕೆಲವು ಉತ್ಪನ್ನಗಳು
ನಾವು ಪ್ರತಿದಿನ ಬಳಸುವ ಕೆಲವು ವಸ್ತುಗಳಿಂದಲೂ ಹಾನಿಕಾರಕ ಹೊಗೆ ಅಥವಾ ರಾಸಾಯನಿಕ ಆವಿಗಳು ಹೊರಬರಬಹುದು. ಬಣ್ಣಗಳು, ಸಾಲ್ವೆಂಟ್ಗಳು ಹಾಗೂ ಕೆಲವು ಕ್ಲೀನಿಂಗ್ ಉತ್ಪನ್ನಗಳು ಇದರಲ್ಲಿ ಸೇರಿವೆ. ಇವುಗಳನ್ನು ಬಳಸುವಾಗ ಪ್ಯಾಕ್ನಲ್ಲಿರುವ ಸೂಚನೆಗಳನ್ನು ಪಾಲಿಸುವುದು ಮತ್ತು ಉತ್ತಮ ಗಾಳಿಯಾಡುವ ಸ್ಥಳದಲ್ಲಿ ಬಳಸುವುದು ಅಗತ್ಯ. ಸಾಂದ್ರವಾದ ರಾಸಾಯನಿಕ ಆವಿಗಳನ್ನು ದೀರ್ಘಕಾಲ ಉಸಿರಾಡುವುದನ್ನು ತಪ್ಪಿಸುವುದು ಉಸಿರಾಟದ ಮಾರ್ಗದ ಮೇಲಿನ ಕಿರಿಕಿರಿಯನ್ನು ಕಡಿಮೆ ಮಾಡಲು ಸಹಾಯ ಮಾಡಬಹುದು.
