Enargy drink : ಕೆಲಸದ ಒತ್ತಡ, ರಾತ್ರಿ ಪೂರ್ತಿ ಎಚ್ಚರವಿರುವುದು ಅಥವಾ ತಕ್ಷಣದ ಎನರ್ಜಿಗಾಗಿ 18ರಿಂದ 34 ವರ್ಷದ ಯುವಜನತೆ ಈ ಕೆಫೀನ್‌ಯುಕ್ತ ಪಾನೀಯಗಳಿಗೆ ದಾಸರಾಗುತ್ತಿದ್ದಾರೆ. ಆದರೆ, ನೀವು ರೀಚಾರ್ಜ್ ಆಗಲು ಕುಡಿಯುವ ಇದೇ ಕೆಫೀನ್‌ಗಳು ನಿಮ್ಮ ಹೃದಯಕ್ಕೆ ಸೈಲೆಂಟ್ ಕಿಲರ್ ಆಗಿ ಬದಲಾಗುತ್ತಿವೆಯಾ? ಇತ್ತೀಚಿನ ಜಾಗತಿಕ ಅಧ್ಯಯನವೊಂದು ಎನರ್ಜಿ ಡ್ರಿಂಕ್ಸ್ ಸೇವನೆಯಿಂದ ಯುವಜನರಲ್ಲಿ ಹೃದಯ ಸಂಬಂಧಿ ( Heart Attack ) ಮತ್ತು ಗಂಭೀರ ಹೃದ್ರೋಗಗಳ ಅಪಾಯ ದಿಢೀರ್ ಏರಿಕೆಯಾಗಿರುವ ಆತಂಕಕಾರಿ ಸತ್ಯವನ್ನು ಹೊರಹಾಕಿದೆ!
ಅಮೆರಿಕನ್ ಹಾರ್ಟ್ ಅಸೋಸಿಯೇಷನ್ (AHA) ಬಿಡುಗಡೆ ಮಾಡಿರುವ ಸಂಶೋಧನೆಯಲ್ಲಿ ಕೆಫೀನ್ ಮತ್ತು ಇತರ ಉತ್ತೇಜಕ ಅಂಶಗಳನ್ನು ಹೊಂದಿರುವ ಉತ್ಪನ್ನಗಳ ಬಳಕೆಗೆ ಸಂಬಂಧಿಸಿದ ಹೃದಯ ಸಮಸ್ಯೆಗಳ ವರದಿಗಳನ್ನು ವಿಶ್ಲೇಷಿಸಲಾಗಿದೆ. ಅಮೆರಿಕದ ಆಹಾರ ಮತ್ತು ಔಷಧ ಆಡಳಿತ ಸಂಸ್ಥೆಗೆ ಸಲ್ಲಿಕೆಯಾಗಿದ್ದ 28 ಸಾವಿರಕ್ಕೂ ಹೆಚ್ಚು ವರದಿಗಳನ್ನು ಸಂಶೋಧಕರು ಪರಿಶೀಲಿಸಿದ್ದಾರೆ. ಈ ವಿಶ್ಲೇಷಣೆಯಲ್ಲಿ ಹೃದಯಾಘಾತ, ಅಸಹಜ ಹೃದಯ ಬಡಿತ, ಎದೆನೋವು, ಹೃದಯ ಬಡಿತ ಹೆಚ್ಚಾಗುವುದು ಹಾಗೂ ಮೂರ್ಛೆ ಹೋಗುವಂತಹ ಸಮಸ್ಯೆಗಳನ್ನು ಪರಿಗಣಿಸಲಾಗಿದೆ.
ಕೆಫೀನ್ ಮತ್ತು ಇತರ ಉತ್ತೇಜಕ ಅಂಶಗಳಿರುವ ಉತ್ಪನ್ನಗಳಿಗೆ ಸಂಬಂಧಿಸಿದ ವರದಿಗಳಲ್ಲಿ, ಇಂತಹ ಅಂಶಗಳಿಲ್ಲದ ಉತ್ಪನ್ನಗಳ ವರದಿಗಳಿಗೆ ಹೋಲಿಸಿದರೆ ಹೃದಯ ಸಂಬಂಧಿ ಕಾಯಿಲೆ ಉಲ್ಲೇಖ ಸುಮಾರು 11 ಪಟ್ಟು ಹೆಚ್ಚಾಗಿ ಕಂಡುಬಂದಿದೆ. ಇದಲ್ಲದೆ, ವರದಿಯಾದ ಹೃದಯ ಸಂಬಂಧಿ ಘಟನೆಗಳಲ್ಲಿ ಸುಮಾರು ಶೇ.45ರಷ್ಟು ಪ್ರಕರಣಗಳು 18ರಿಂದ 34 ವರ್ಷದ ಯುವ ವಯಸ್ಕರಿಗೆ ಸಂಬಂಧಿಸಿದ್ದಾಗಿವೆ. ಆದರೆ ಇದು ಯುವಜನರಲ್ಲಿ ಶೇ.45ರಷ್ಟು ಮಂದಿಗೆ ಹೃದಯ ಸಮಸ್ಯೆ ಎದುರಾಗಿದೆ ಎಂದರ್ಥವಲ್ಲ.
