ಹಾಗಾದರೆ ಕ್ಯಾನ್ಸರ್ ಬರುತ್ತದೆಯೇ?
ಇಲ್ಲಿಯೇ ಮುಖ್ಯವಾದ ವಿಷಯವಿದೆ. ಸೊಳ್ಳೆ ಕಾಯಿಲ್ ಬಳಸಿದರೆ ಖಂಡಿತ ಕ್ಯಾನ್ಸರ್ ಬರುತ್ತದೆ ಎಂದು ಹೇಳಲು ಪ್ರಸ್ತುತ ಸಾಕಷ್ಟು ವೈಜ್ಞಾನಿಕ ಪುರಾವೆ ಇಲ್ಲ. ಆದರೆ, ಕಾಯಿಲ್ ಹೊಗೆಯಲ್ಲಿ ಇರುವ ಕೆಲವು ಮಾಲಿನ್ಯಕಾರಕಗಳಿಗೆ ದೀರ್ಘಕಾಲ ಮತ್ತು ಹೆಚ್ಚಿನ ಪ್ರಮಾಣದಲ್ಲಿ ಒಡ್ಡಿಕೊಳ್ಳುವುದು ಆರೋಗ್ಯದ ಅಪಾಯಗಳನ್ನು ಹೆಚ್ಚಿಸಬಹುದೆಂಬ ಆತಂಕವಿದೆ. ಕೆಲವು ಅಧ್ಯಯನಗಳು ಸೊಳ್ಳೆ ಕಾಯಿಲ್ ಹೊಗೆಗೆ ಹೆಚ್ಚಿನ ಪ್ರಮಾಣದಲ್ಲಿ ಒಡ್ಡಿಕೊಳ್ಳುವುದು, ದಿನನಿತ್ಯ ಸೊಳ್ಳೆ ಕಾಯಿಲ್ ಮನೆಯಲ್ಲಿ ಬಳಸುವುದರಿಂದ ಹೊಗೆಯ ಪ್ರಮಾಣ ಹೆಚ್ಚಾಗಿ ಶ್ವಾಸಕೋಶದ ಕ್ಯಾನ್ಸರ್ ಅಪಾಯದೊಂದಿಗೆ ಸಂಬಂಧ ಹೊಂದಿರಬಹುದೆಂದು ಸೂಚಿಸಿವೆ. ಆದರೆ ಇಂತಹ ಅಧ್ಯಯನಗಳು ಕಾಯಿಲ್ ಹೊಗೆಯೇ ನೇರವಾಗಿ ಕ್ಯಾನ್ಸರ್ ಉಂಟುಮಾಡುತ್ತದೆ ಎಂದು ಖಚಿತಪಡಿಸುವುದಿಲ್ಲ.
ಮುಚ್ಚಿದ ಕೋಣೆಯಲ್ಲಿ ಕಾಯಿಲ್ ಹಚ್ಚುವುದು ಅಪಾಯವೇ?
ಹೌದು, ಎಚ್ಚರಿಕೆ ಅಗತ್ಯ. ಕಿಟಕಿ, ಬಾಗಿಲು ಮುಚ್ಚಿದ ಸಣ್ಣ ಕೋಣೆಯಲ್ಲಿ ಗಂಟೆಗಟ್ಟಲೆ ಕಾಯಿಲ್ ಉರಿಯುವುದರಿಂದ ಹೊಗೆ ಮತ್ತು ಸೂಕ್ಷ್ಮ ಕಣಗಳ ಸಾಂದ್ರತೆ ಹೆಚ್ಚಬಹುದು. ಮತ್ತು ಆ ಹೊಗೆಯು ಕೋಣೆಯಲ್ಲಿಯೇ ಆವರಿಸುತ್ತದೆ. ಇದರಿಂದ ಕೆಲವರಿಗೆ ಕಣ್ಣು ಮತ್ತು ಗಂಟಲಿನಲ್ಲಿ ಉರಿ, ಕೆಮ್ಮು, ತಲೆನೋವು ಅಥವಾ ಉಸಿರಾಟದ ತೊಂದರೆ ಉಂಟಾಗಬಹುದು. ಅಸ್ತಮಾ ಅಥವಾ ಇತರ ಉಸಿರಾಟದ ಸಮಸ್ಯೆ ಇರುವವರು ವಿಶೇಷವಾಗಿ ಜಾಗರೂಕರಾಗಬೇಕು. ಇದರಿಂದ ಅವರಿಗೆ ಉಸಿರಾಟದ ತೊಂದರೆ ಹೆಚ್ಚಾಗಬಹುದು ಮತ್ತು ಶ್ವಾಸಕೋಶದ ಸಮಸ್ಯೆ ಹೆಚ್ಚಾಗಬಹುದು.
