ಮೀನುಗಳನ್ನು ಖರೀದಿಸುವಾಗ ಇದನ್ನು ಗಮನಿಸದಿದ್ದರೆ ವಿಷ ತಿಂದಂತೆ: ಹಾಗಾದ್ರೆ ತಾಜಾ ಮೀನು ಗುರುತಿಸುವುದು ಹೇಗೆ? Fish

Fish : ಆರೋಗ್ಯಕರ ಆಹಾರಗಳ ಪಟ್ಟಿಯಲ್ಲಿ ಮೀನಿಗೆ ಸದಾ ಅಗ್ರಸ್ಥಾನವಿದೆ. ಪ್ರೋಟೀನ್, ಒಮೆಗಾ-3 ಕೊಬ್ಬಿನಾಮ್ಲಗಳು ಹಾಗೂ ದೇಹಕ್ಕೆ ಬೇಕಾದ ಹಲವಾರು ಜೀವಸತ್ವಗಳು ಮತ್ತು ಖನಿಜಾಂಶಗಳನ್ನು ಮೀನು ತುಂಬಿಕೊಂಡಿದೆ. ಆದರೆ, ಮೀನು ತಿನ್ನುವುದು ಎಷ್ಟು ಆರೋಗ್ಯಕರವೋ, ಮಾರುಕಟ್ಟೆಯಿಂದ ಸರಿಯಾದ ಮತ್ತು ತಾಜಾವಾದ ಮೀನನ್ನು ಆರಿಸಿ ತರುವುದು ಕೂಡ ಅಷ್ಟೇ ಮುಖ್ಯವಾಗಿದೆ. ಸ್ವಲ್ಪ ಎಚ್ಚರ ತಪ್ಪಿದರೆ ಕೊಳೆತ ಅಥವಾ ಹಳೆಯ ಮೀನುಗಳನ್ನು ಖರೀದಿಸಿ ಅನಾರೋಗ್ಯಕ್ಕೆ ತುತ್ತಾಗಬೇಕಾಗುತ್ತದೆ. ತಾಜಾ ಮೀನನ್ನು ಗುರುತಿಸಲು ಕಿವಿರುಗಳನ್ನು ನೋಡುವುದು ಯಾಕೆ ಅತ್ಯಂತ ಮುಖವೆಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಮೀನುಗಳು ನೀರಿನಲ್ಲಿ ಉಸಿರಾಡಲು ಕಿವಿರುಗಳನ್ನು ಬಳಸುತ್ತವೆ. ಇವು ಮೀನಿನ ತಲೆಯ ಎರಡೂ ಬದಿಗಳಲ್ಲಿ ಇರುತ್ತವೆ. ತಾಜಾ ಮೀನಿನ ಕಿವಿರುಗಳು ಸಾಮಾನ್ಯವಾಗಿ ಕೆಂಪು ಅಥವಾ ಗುಲಾಬಿ ಬಣ್ಣದಿಂದ ಕೂಡಿ ತೇವವಾಗಿರುತ್ತವೆ. ಮೀನು ಖರೀದಿಸುವಾಗ ಈ ಕಿವಿರುಗಳನ್ನು ಸೂಕ್ಷ್ಮವಾಗಿ ಪರಿಶೀಲಿಸುವುದು ಅತ್ಯಂತ ಜಾಣತನದ ಕೆಲಸ. ಒಂದು ವೇಳೆ ಮೀನಿನ ಕಿವಿರುಗಳು ಕಂದು ಬಣ್ಣಕ್ಕೆ ತಿರುಗಿದ್ದರೆ, ಬೂದು ಬಣ್ಣದಲ್ಲಿದ್ದರೆ ಅಥವಾ ಅವುಗಳ ಮೇಲೆ ಅಂಟು ಪದಾರ್ಥವಿದ್ದರೆ ಅಂತಹ ಮೀನುಗಳನ್ನು ಕೊಳ್ಳಲು ಹೋಗಬೇಡಿ.

ಬಣ್ಣವೊಂದೇ ಅಲ್ಲ, ಇತರೆ ಅಂಶಗಳೂ ಮುಖ್ಯ

ಕಿವಿರುಗಳ ಬಣ್ಣವು ಮೀನಿನ ವಿಧ, ಅದನ್ನು ಶೇಖರಿಸಿಟ್ಟ ರೀತಿ ಮತ್ತು ಮೀನು ಹಿಡಿದು ಕಳೆದ ಸಮಯದ ಆಧಾರದ ಮೇಲೆ ಬದಲಾಗಬಹುದು. ಹಾಗಾಗಿ ಕೇವಲ ಬಣ್ಣವನ್ನು ಮಾತ್ರ ನೋಡಿ ಮೀನಿನ ತಾಜಾತನವನ್ನು ನಿರ್ಧರಿಸಲು ಸಾಧ್ಯವಿಲ್ಲ. ಕಿವಿರುಗಳ ಬಣ್ಣದ ಜೊತೆಗೆ ಅವುಗಳ ಮೇಲಿನ ತೇವಾಂಶ ಮತ್ತು ಸ್ವಚ್ಛತೆಯನ್ನು ಕೂಡ ಗಮನಿಸಬೇಕು. ಯಾವುದೇ ರಾಸಾಯನಿಕಗಳನ್ನು ಬಳಸಿ ಮೀನುಗಳನ್ನು ಕೆಡದಂತೆ ಸಂರಕ್ಷಿಸಲಾಗಿದೆಯೇ ಎಂಬುದನ್ನು ಎಚ್ಚರಿಕೆಯಿಂದ ಪರಿಶೀಲಿಸುವುದು ಒಳ್ಳೆಯದು.

ವಾಸನೆಯ ಮೂಲಕ ತಾಜಾತನ ಪತ್ತೆ

ತಾಜಾ ಮೀನು ಎಂದಿಗೂ ತೀವ್ರವಾದ ವಾಸನೆ ಬೀರುವುದಿಲ್ಲ, ಬದಲಿಗೆ ಅದು ಸೌಮ್ಯವಾದ ಸಮುದ್ರ ಅಥವಾ ನೀರಿನ ಸುವಾಸನೆಯನ್ನು ಹೊಂದಿರುತ್ತದೆ. ಮೀನಿನಿಂದ ಕೊಳೆತ, ಹುಳಿ ಅಥವಾ ತೀವ್ರವಾದ ಅಮೋನಿಯಾದಂತಹ ವಾಸನೆ ಬರುತ್ತಿದ್ದರೆ, ಆ ಮೀನು ಬಹಳ ದಿನಗಳಿಂದ ಕೆಟ್ಟುಹೋಗಿದೆ ಎಂದರ್ಥ. ಅಂತಹ ಮೀನನ್ನು ಯಾವುದೇ ಕಾರಣಕ್ಕೂ ಖರೀದಿಸಬೇಡಿ. ಮೀನನ್ನು ಮುಟ್ಟಿ ಪರೀಕ್ಷಿಸುವಾಗ ಕೈಗಳನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಆರೋಗ್ಯದ ದೃಷ್ಟಿಯಿಂದ ಸುರಕ್ಷಿತ.

ಕಣ್ಣು ಮತ್ತು ಚರ್ಮದ ಪರೀಕ್ಷೆ

ತಾಜಾ ಮೀನಿನ ಕಣ್ಣುಗಳು ಸ್ಪಷ್ಟವಾಗಿ ಮತ್ತು ಹೊರಗೆ ಉಬ್ಬಿಕೊಂಡಂತೆ ಕಾಣಿಸುತ್ತವೆ. ಕಣ್ಣುಗಳು ಸಂಪೂರ್ಣವಾಗಿ ಮಂದವಾಗಿದ್ದರೆ ಅಥವಾ ಒಳಗೆ ಕುಸಿದಿದ್ದರೆ, ಅದು ದೀರ್ಘಕಾಲದವರೆಗೆ ಶೇಖರಿಸಿಟ್ಟ ಮೀನು ಎಂಬುದರ ಸ್ಪಷ್ಟ ಸೂಚನೆಯಾಗಿದೆ. ಇದರೊಂದಿಗೆ ಮೀನಿನ ಚರ್ಮವು ತೇವವಾಗಿರಬೇಕು ಮತ್ತು ಸಹಜವಾದ ಹೊಳಪನ್ನು ಹೊಂದಿರಬೇಕು. ಮೀನಿನ ಮಾಂಸವು ತಾಜಾವಾಗಿದ್ದರೆ ಕೈಯಿಂದ ಒತ್ತಿದಾಗ ಮರಳಿ ತನ್ನ ಹಿಂದಿನ ಆಕಾರಕ್ಕೆ ಬರಬೇಕು.

ಎಚ್ಚರ ತಪ್ಪಿದರೆ ಕಸ ತಿಂದಂತೆ!

ಒಂದು ವೇಳೆ ಮೀನು ತಾಜಾವಾಗಿದೆಯೇ ಎಂದು ಪರೀಕ್ಷಿಸದೆ ಖರೀದಿಸಿದರೆ, ಅದು ಆರೋಗ್ಯಕ್ಕೆ ಒಳ್ಳೆಯದರ ಬದಲಿಗೆ ವಿಷವಾಗಿ ಪರಿಣಮಿಸಬಹುದು. ಹೀಗಾಗಿ, ಮಾರುಕಟ್ಟೆಗೆ ಹೋದಾಗ ಕೇವಲ ಬೆಲೆಯನ್ನು ನೋಡುವುದಲ್ಲದೆ, ಮೀನಿನ ಕಿವಿರು, ಕಣ್ಣು ಹಾಗೂ ವಾಸನೆಯನ್ನು ಪರಿಶೀಲಿಸಿ ಅತ್ಯಂತ ತಾಜಾ ಮೀನುಗಳನ್ನು ಮಾತ್ರ ಆಯ್ಕೆ ಮಾಡಿಕೊಳ್ಳಿ, (ಏಜೆನ್ಸೀಸ್​).