ಅದು 1849 ರ ಮೇ 29. ಅಂದು ವಿವಾಹದ ಶುಭಮುಹೂರ್ತವಿತ್ತು. ವಿವಾಹಕ್ಕೆಂದು ಸಕಲ ಸಿದ್ಧತೆಗಳು ಆಗಿದ್ದವು. ಅಹ್ವಾನಿತ ಅತಿಥಿಗಳು, ವಧು-ವರರ ಪರಿವಾರದವರೆಲ್ಲರೂ ಆಗಮಿಸಿದ್ದರು. ವಿವಾಹದ ವಿಧಿ-ವಿಧಾನಗಳನ್ನು ನೆರವೇರಿಸಲು ಪಾದ್ರಿ ಕೂಡ ಬಂದಾಗಿತ್ತು. ಎಲ್ಲರೂ ಮದುವೆ ಕಣ್ತುಂಬಿಕೊಳ್ಳುವ ನಿರೀಕ್ಷೆಯಲ್ಲಿದ್ದರು. ಆದರೆ ಕಾರ್ಯಕ್ರಮದ ಮುಖ್ಯ ವ್ಯಕ್ತಿ ಅಂದರೆ ವರನೇ ಅಲ್ಲಿ ಇರಲಿಲ್ಲ. ಕೆಲವರಿಗೆ ಗಾಬರಿ. ವರನಿಗಾಗಿ ಹುಡುಕಾಟ ಪ್ರಾರಂಭವಾಯಿತು. ಆಗ, ಈ ಮದುಮಗನ ಬಗ್ಗೆ ಸರಿಯಾಗಿ ತಿಳಿದ ಅವನ ಮಿತ್ರ ‘ಚಪ್ಪುಇಸ್’ ಎಂಬುವವ ಹೇಳಿದ, ‘ಅವನು ಎಲ್ಲಿದ್ದಾನೆ ಎಂದು ನನಗೆ ಗೊತ್ತು. ಬೇಕಾದರೆ ನೋಡಿ, ತನ್ನ ಪ್ರಯೋಗ ಶಾಲೆಯಲ್ಲಿ ಏನಾದರೂ ಹೊಸ ಪ್ರಯೋಗವನ್ನು ಮಾಡುತ್ತಾ ಕುಳಿತಿರುತ್ತಾನೆ’. ಸರಿ, ವರನ ಹುಡುಕಾಟಕ್ಕಾಗಿ ಎಲ್ಲರೂ ಅಲ್ಲಿಗೆ ಹೋದರು. ಸ್ನೇಹಿತನ ಮಾತು ಸತ್ಯವಾಗಿತ್ತು! ವರಮಹಾಶಯ ಅಲ್ಲಿಯೇ ಇದ್ದ. ಪ್ರಯೋಗದಲ್ಲಿ ಮಗ್ನನಾಗಿದ್ದ!
