ಸಾಮಾನ್ಯವಾಗಿ ಎಲ್ಲರೂ ಮಂಡಿನೋವು ಪ್ರಾರಂಭವಾದ ನಂತರ ಮಂಡಿಯ ಬಗ್ಗೆ ಗಮನಹರಿಸುತ್ತಾರೆ. ಆದರೆ ಮೊದಲಿನಿಂದಲೇ ಕಾಳಜಿ ವಹಿಸಿದರೆ ಮಾತ್ರ ಮಂಡಿ ಹಾಳಾಗದಂತೆ ತಡೆಯಬಹುದು. ಒಮ್ಮೆ ಮಂಡಿ ಸವಕಳಿ ಪ್ರಾರಂಭವಾದರೆ ಅದು ನಿಧಾನವಾಗಿ ಆಗುವಂತೆ ಮಾಡಬಹುದೇ ಹೊರತು ನೂರಕ್ಕೆ ನೂರರಷ್ಟು ಸರಿ ಮಾಡುವುದು ಕಷ್ಟವಾಗುತ್ತದೆ. ಹಾಗಾಗಿ ನಮ್ಮ ಆಹಾರದಲ್ಲಿ ಸಂಧಿಗಳಿಗೆ ಪುಷ್ಟಿಕೊಡುವಂತಹ ಪೋಷಕಾಂಶಗಳು ಇರುವಂತೆ ನೋಡಿಕೊಳ್ಳಬೇಕು. ವಿಟಮಿನ್ ಡಿ, ವಿಟಮಿನ್ ಬಿ ಗುಂಪುಗಳು, ವಿಟಮಿನ್ ಸಿ, ಕೆ, ಕ್ಯಾಲ್ಸಿಯಂ, ಮೆಗ್ನಿಸಿಯಂ, ಝಿಂಕ್ ಮುಂತಾದ ಪೋಷಕಾಂಶಗಳು ಅತ್ಯಂತ ಅಗತ್ಯವಾದವು. ಇನ್ನೂ ವಿಶೇಷವಾಗಿ ಒಳ್ಳೆಯ ಕೊಬ್ಬು ಸಂಧಿಗಳಿಗೆ ಅತಿ ಅವಶ್ಯ. ಒಳ್ಳೆಯ ಕೊಬ್ಬನ್ನು ಸರಿಯಾದ ಪ್ರಮಾಣದಲ್ಲಿ ಸೇವನೆ ಮಾಡುವವರಿಗೆ ಮಾತ್ರ ನೂರು ಕಾಲ ಸಂಧಿಗಳು ಚೆನ್ನಾಗಿರಲು ಸಾಧ್ಯ. ಹಾಗಾಗಿ ಗಾಣದಲ್ಲಿ ತೆಗೆದ ಕೊಬ್ಬರಿ ಎಣ್ಣೆ, ಶೇಂಗಾ ಎಣ್ಣೆ, ಎಳ್ಳೆಣ್ಣೆಗಳನ್ನು ಆಹಾರದಲ್ಲಿ ಹೆಚ್ಚಾಗಿ ಬಳಸಬೇಕು. ಮನೆಯಲ್ಲಿ ತಯಾರಿಸಿದ ತುಪ್ಪ ಕೂಡಾ ಸಂಧಿಗಳಿಗೆ ಶಕ್ತಿಯನ್ನು ಕೊಡುತ್ತದೆ. ಹಾಲು, ಎಳ್ಳು, ಹಸಿರು ಸೊಪ್ಪು-ತರಕಾರಿಗಳು, ಹಣ್ಣುಗಳು, ಒಣಹಣ್ಣುಗಳು ಮತ್ತು ನಟ್ಗಳನ್ನು ಸೇವಿಸಬೇಕು. ಆಯುರ್ವೆದದಲ್ಲಿ ನಿತ್ಯವೂ ಅಭ್ಯಂಗ ಮಾಡಿಕೊಳ್ಳುವವರಿಗೆ ವಾತಾವ್ಯಾಧಿಗಳು ಕಾಡುವುದಿಲ್ಲ ಎಂದು ಹೇಳಿದ್ದಾರೆ. ಅಭ್ಯಂಗವೆಂದರೆ ಬೆಚ್ಚನೆಯ ಎಣ್ಣೆಯಿಂದ ಇಡೀ ದೇಹಕ್ಕೆ ಮಸಾಜ್ ಮಾಡಿಕೊಳ್ಳುವುದು ಎಂದು ಸಂಕ್ಷಿಪ್ತವಾಗಿ ಹೇಳಬಹುದು. ಹೀಗೆ ಮಾಡುವುದರಿಂದ ಮುಪ್ಪು ದೂರವಾಗುವುದಲ್ಲದೇ ಸಂಧಿಗಳ ನೋವು ಕೂಡಾ ಬರುವುದಿಲ್ಲ; ಬಂದಿದ್ದರೆ ಸವಕಳಿ ಶೀಘ್ರವಾಗಿ ಆಗುವುದಿಲ್ಲ. ಮಂಡಿ ನೋವು ಇರುವವರು ಕನಿಷ್ಠ ಮಂಡಿಗಳಿಗಾದರೂ ಎಣ್ಣೆಯ ಮಸಾಜ್ ಅನ್ನು ನಿತ್ಯವೂ ಮಾಡಿಕೊಳ್ಳಬೇಕು. ಹಾಗೆ ಮಸಾಜ್ ಮಾಡಿಕೊಂಡ ನಂತರ ಮಂಡಿಗಳ ಮೇಲೆ ಬಿಸಿ ನೀರನ್ನು ಸುರಿಯುವುದು ಅಥವಾ ಬಿಸಿ ನೀರಿನ ಪಟ್ಟಿ ಇಡುವುದನ್ನು ಮಾಡಬಹುದು. ಹುತ್ತದ ಮಣ್ಣು ಮತ್ತು ಸಾಸಿವೆಯ ಪುಡಿಗಳನ್ನು ಸೇರಿಸಿ ನೀರಿನಲ್ಲಿ ಕಲಸಿ ಬಿಸಿ ಮಾಡಿ ಲೇಪ ಮಾಡಿಕೊಂಡರೆ ತುಂಬಾ ಅನುಕೂಲವಾಗುತ್ತದೆ. ಸಂಧಿಗಳ ಸವಕಳಿ ಆಗಷ್ಟೇ ಪ್ರಾರಂಭವಾಗಿದ್ದರೆ ಈ ಸಮಸ್ಯೆಗೆಂದೇ ಇರುವ ಹಲವು ರೀತಿಯ ವ್ಯಾಯಾಮಗಳು ತುಂಬಾ ಅನುಕೂಲಕರ. ಸವಕಳಿ ಹೆಚ್ಚಾಗಿದ್ದರೆ ಸಂಧಿಗಳಿಗೆ ಪುಷ್ಟಿ ನೀಡುವಂತಹ ಆಹಾರೌಷಧಿಗಳು, ಪ್ರಕೃತಿ ಚಿಕಿತ್ಸೆ ಮತ್ತು ಪಂಚಕರ್ಮ ಚಿಕಿತ್ಸೆಗಳು ತುಂಬಾ ಅನುಕೂಲಕರ ಎಂಬುದರಲ್ಲಿ ಎರಡನೇ ಮಾತಿಲ್ಲ.
