ಆರೋಗ್ಯವಾಗಿರುವವರು ಅಥವಾ ಕಫ ಮತ್ತು ವಾತದೋಷಕ್ಕೆ ಸಂಬಂಧಪಟ್ಟ ಸಮಸ್ಯೆಗಳನ್ನು ಅನುಭವಿಸುತ್ತಿರುವವರು ದಿನಕ್ಕೊಮ್ಮೆ ಊಟವಾದ ನಂತರ ವೀಳ್ಯದೆಲೆಯ ಜೊತೆಗೆ ಸ್ವಲ್ಪ ಸುಣ್ಣ, ಅಡಿಕೆ, ಸೋಂಪು, ಚಿಕ್ಕ ಚೂರು ಜ್ಯೇಷ್ಠಮಧು, ಕಾಚು, ಸಣ್ಣ ಚೂರು ಲವಂಗ ಮುಂತಾದವುಗಳನ್ನು ಹಾಕಿ ಸೇವಿಸಬಹುದು. ತಂಬಾಕು ಸೇರಿದರೆ ಮಾತ್ರ ಇದು ವಿಷ ಹಾಗೂ ಕ್ಯಾನ್ಸರ್ ಕಾರಕವಾಗುವುದು. ಆದರೆ ವೀಳ್ಯದೆಲೆಯ ಉಷ್ಣ, ತೀಕ್ಷ್ಣ ಗುಣಗಳ ಕಾರಣದಿಂದ ಇದನ್ನು ದುರ್ಬಲರು, ಗರ್ಭಿಣಿಯರು, ಕೃಶದೇಹಿಗಳು, ಬೇರೆ ಬೇರೆ ರೀತಿಯ ಗಂಭೀರ ಕಾಯಿಲೆಗಳಿಂದ ಬಳಲುತ್ತಿರುವವರು ಸೇವಿಸುವ ಮೊದಲು ವೈದ್ಯರ ಸಲಹೆಯನ್ನು ಪಡೆದುಕೊಳ್ಳುವುದು ಒಳ್ಳೆಯದು. ಆದರೆ, ಅತಿಯಾದ ಸೇವನೆ ಬೇಡ. ವೀಳ್ಯದೆಲೆಯಲ್ಲಿ ವಿಟಮಿನ್ ಸಿ ನಮಗೆ ಉತ್ತಮ ಪ್ರಮಾಣದಲ್ಲಿ ದೊರೆಯುತ್ತದೆ. ಬೀಟಾ ಕೆರೋಟಿನ್ (ಇದೇ ಮುಂದೆ ವಿಟಮಿನ್ ಎ ಆಗುವುದು) ಕೂಡ ಸಾಕಷ್ಟು ಪ್ರಮಾಣದಲ್ಲಿ ಇದರಲ್ಲಿ ಇದೆ.
