ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಚುನಾವಣಾ ಆಯೋಗ ಹಲವು ಕ್ರಮಗಳನ್ನು ಕೈಗೊಳ್ಳುತ್ತ ಬಂದಿದೆ ಮತ್ತು ಈ ಬಾರಿಯೂ ಅದನ್ನು ಮುಂದುವರಿಸಿದೆ. ಆದರೆ, ಇದು ಬರೀ ಆಯೋಗದ ಪ್ರಯತ್ನವಾಗಿ ಉಳಿಯಬಾರದು. ರಾಜಕೀಯ ಪಕ್ಷಗಳು, ಸಂಘಸಂಸ್ಥೆಗಳು, ಜನಸಾಮಾನ್ಯರು ಇಂಥ ಉಪಕ್ರಮಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು, ಪ್ರಜಾಪ್ರಭುತ್ವದ ಪರ್ವವನ್ನು ಯಶಸ್ವಿಗೊಳಿಸಬೇಕು. 2019ರ ಲೋಕಸಭೆ ಚುನಾವಣೆಯನ್ನೇ ಉದಾಹರಣೆಯಾಗಿ ತೆಗೆದುಕೊಂಡರೆ, ನಗರಪ್ರದೇಶದವರಿಗಿಂತ ಗ್ರಾಮೀಣಿಗರೇ ಹೆಚ್ಚಿನ ಸಂಖ್ಯೆಯಲ್ಲಿ ಮತದಾನ ಮಾಡಿ, ಪ್ರಜ್ಞಾವಂತಿಕೆ ಮೆರೆದಿದ್ದಾರೆ. ಆದರೆ, ಜನಪ್ರತಿನಿಧಿಗಳಿಂದ, ಸರ್ಕಾರದಿಂದ ಸೌಲಭ್ಯ ಅಪೇಕ್ಷಿಸುವ ನಗರವಾಸಿಗಳಲ್ಲಿ ಅದೆಷ್ಟೋ ಜನರು ಮತದಾನದ ದಿನ ಕೊಟ್ಟ ರಜೆಯನ್ನು ಪ್ರವಾಸ, ಮನರಂಜನೆಗಾಗಿ ಬಳಸುತ್ತಿರುವುದು ವಿಷಾದನೀಯ. ಇಂಥ ಮನಸ್ಥಿತಿ ಬದಲಾಗಬೇಕು. ಒಳ್ಳೆಯ ಜನಪ್ರತಿನಿಧಿ, ಆ ಮೂಲಕ ಜನಪರ ಸರ್ಕಾರ ಅಧಿಕಾರಕ್ಕೆ ಬರಬೇಕಾದರೆ ಉದಾಸೀನ ತೊರೆದು ಮತ ಚಲಾಯಿಸಬೇಕು, ಚುನಾವಣಾ ಆಯೋಗದ ಕ್ರಮಗಳನ್ನು ಬೆಂಬಲಿಸಬೇಕು.
