ಕನ್ನಡತಿ ಕಿರಣ್ ಈಗ ಶೇರ್; ಭರ್ಜರಿ ಗಂಡು ತಂಡದಿಂದ ಇನ್ನೊಂದು ಚಿತ್ರ

‘ಭರ್ಜರಿ ಗಂಡು’ ಮುಗಿಯುತ್ತಿದ್ದಂತೆಯೇ, ಅದೇ ತಂಡದೊಂದಿಗೆ ‘ಕನ್ನಡತಿ’ ಖ್ಯಾತಿಯ ಕಿರಣ್ ರಾಜ್ ಇನ್ನೊಂದು ಚಿತ್ರ ಮಾಡುತ್ತಿದ್ದಾರೆ ಎಂಬ ಸುದ್ದಿ ಇತ್ತು. ಅದಕ್ಕೆ ಸರಿಯಾಗಿ ಆ ಚಿತ್ರ ಬಿಡುಗಡೆಗೂ ಮುನ್ನವೇ, ಅದೇ ನಿರ್ದೇಶಕರೊಂದಿಗೆ ಕಿರಣ್ ನಟಿಸುತ್ತಿರುವ ಹೊಸ ಚಿತ್ರ ಬುಧವಾರ ಪ್ರಾರಂಭವಾಗಿದೆ. ಅಂದಹಾಗೆ, ಆ ಚಿತ್ರದ ಹೆಸರು ‘ಶೇರ್’. ‘ಶೇರ್’ ಎಂದರೆ ಹಿಂದಿಯಲ್ಲಿ ಹುಲಿ ಎಂದರ್ಥ.

ಈಗಾಗಲೇ, ಕನ್ನಡ ಮತ್ತು ಇಂಗ್ಲೀಷ್​ನಲ್ಲಿ ಹುಲಿ ಹೆಸರಿನ ಚಿತ್ರಗಳು ಸಾಕಷ್ಟು ಬಂದಿರುವುದರಿಂದ, ಅವೆರಡೂ ಭಾಷೆಗಳನ್ನು ಬಿಟ್ಟು ಹಿಂದಿ ಭಾಷೆಯ ಪದದ ಮೊರೆ ಹೋಗಿದೆ ಚಿತ್ರತಂಡ. ಬೀದರ್​ನಲ್ಲಿ ವಕೀಲರಾಗಿ ಕೆಲಸ ಮಾಡುತ್ತಿರುವ ಸುದರ್ಶನ್ ಸುಂದರ್​ರಾಜ್ ಈ ಚಿತ್ರ ನಿರ್ವಿುಸಿದರೆ, ಪ್ರಸಿದ್ಧ್ ಕಥೆ-ಚಿತ್ರಕಥೆ ಬರೆದು ನಿರ್ದೇಶಿಸುತ್ತಿದ್ದಾರೆ.

ಇದೊಂದು ಪಕ್ಕಾ ಆಕ್ಷನ್ ಚಿತ್ರವಂತೆ. ಅನಾಥನೊಬ್ಬನ ಕುರಿತಾದ ಈ ಚಿತ್ರವು ಹೆಚ್ಚಾಗಿ ಎ.ಪಿ.ಎಂ.ಸಿ ಮಾರುಕಟ್ಟೆಯಲ್ಲಿ ಸಾಗುತ್ತದಂತೆ. ಈ ಚಿತ್ರದಲ್ಲಿ ಕಿರಣ್ ರಾಜ್ ಮಾಸ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಅದಕ್ಕಾಗಿ ಕಿಕ್ ಬಾಕ್ಸಿಂಗ್ ಮತ್ತು ಮಾರ್ಷಲ್ ಆರ್ಟ್ಸ್ ಅಭ್ಯಾಸ ಮಾಡಿದ್ದಾರಂತೆ. ಚಿತ್ರೀಕರಣ ಆಗಸ್ಟ್ 22ರಿಂದ ಚಿತ್ರೀಕರಣ ಪ್ರಾರಂಭವಾಗಲಿದೆ. ಈ ಚಿತ್ರದಲ್ಲಿ ನಟಿಸುತ್ತಿರುವುದಕ್ಕೆ ಖುಷಿಯಾಗಿದೆ ಎಂದು ಖುಷಿಯಿಂದ ಹೇಳಿಕೊಳ್ಳೂವ ಕಿರಣ್, ‘ಚಿತ್ರಕ್ಕಾಗಿ ಸಮರಕಲೆಗಳನ್ನು ಅಭ್ಯಾಸ ಮಾಡುತ್ತಿದ್ದೇನೆ. ಸಾಹಸ ಸನ್ನಿವೇಶಗಳಿಗೆ ಇಲ್ಲಿ ಹೆಚ್ಚು ಸ್ಕೋಪ್ ಇದೆ. ಕಥೆ ಮತ್ತು ನನ್ನ ಪಾತ್ರ ಎರಡೂ ಚೆನ್ನಾಗಿದೆ’ ಎನ್ನುತ್ತಾರೆ. ಕಿರಣ್​ಗೆ ನಾಯಕಿಯಾಗಿ ಸುರೇಖಾ ಅಭಿನಯಿಸುತ್ತಿದ್ದು, ಇನ್ನೊಂದು ಪ್ರಮುಖ ಪಾತ್ರದಲ್ಲಿ ತನೀಶಾ ನಟಿಸುತ್ತಿದ್ದಾರೆ. ಕಿಟ್ಟಿ ಕೌಶಿಕ್ ಛಾಯಾಗ್ರಹಣ ಮತ್ತು ಗುಮ್ಮಿನೇನಿ ವಿಜಯ್ ಸಂಗೀತ ಈ ಚಿತ್ರಕ್ಕಿದೆ.

https://www.vijayavani.net/ajit-doval-security-lapse-centre-removes-3-commandos-from-nsas-security-cover/

https://www.vijayavani.net/father-murdered-by-his-son-reason-yet-to-know/