ಹುಲಿನಾಯಕ ಫಸ್ಟ್​ ಲುಕ್​ ರಿಲೀಸ್​ ; ವೀರ ಸಿಂಧೂರ ಲಕ್ಷ್ಮಣ ಜೀವನಾಧಾರಿತ ಚಿತ್ರಕ್ಕೆ ಕಿಚ್ಚನ ಬಲ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ನಟ, ನಿರ್ದೇಶಕ, ಪತ್ರಕರ್ತ ಚಕ್ರವರ್ತಿ ಚಂದ್ರಚೂಡ್​ ಸ್ವಾತಂತ್ರ್ಯ ಸೇನಾನಿ ವೀರ ಸಿಂಧೂರ ಲಕ್ಷ್ಮಣ ಜೀವನಾಧಾರಿತ ಸಿನಿಮಾ ಮಾಡಲಿದ್ದಾರೆ ಎಂಬುದು ತಿಳಿದಿತ್ತು. ಆ ಚಿತ್ರಕ್ಕೆ "ಹುಲಿನಾಯಕ' ಎಂಬ ಟೈಟಲ್​ ಕೂಡ ಫಿಕ್ಸ್​ ಆಗಿತ್ತು. ಇತ್ತೀಚೆಗಷ್ಟೆ ನಟ ಕಿಚ್ಚ ಸುದೀಪ್​ ಚಿತ್ರದ ಫಸ್ಟ್​ ಲುಕ್​ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭಹಾರೈಸಿದರು. ಇದೇ ಸಂದರ್ಭದಲ್ಲಿ ಕೃಷಿ ಸಚಿವ ಚಲುವರಾಯಸ್ವಾಮಿ ಸುದೀಪ್​ ಹುಟ್ಟುಹಬ್ಬದ ಪ್ರಯುಕ್ತ ಒಂದು ಲಕ್ಷ ಸಸಿ ನಡೆಯುವ "ಹುಲಿನಾಯಕ' ಚಿತ್ರತಂಡದ ಅಭಿಯಾನಕ್ಕೆ ಚಾಲನೆ ನೀಡಿದರು.

ಇದನ್ನೂ ಓದಿ : ಜೋಗ್ 101 ಫಸ್ಟ್ ಲುಕ್; ವಿಜಯ್ ಆ್ಯಂಡ್ ವಿಜಯ್ ಕಾಂಬಿನೇಷನ್‌ನ ಸಿನಿಮಾ

ಅಭಿನಯ ತಿಲಕ ಎಂಬ ಹಾಡನ್ನು ಚಲವಾದಿ ಮಹಾಸಭಾದ ಜ್ಞಾನಪ್ರಕಾಶ ಸ್ವಾಮೀಜಿ ಬಿಡುಗಡೆ ಮಾಡಿದರು. ನಿರ್ದೇಶಕ ಚಕ್ರವರ್ತಿ, "ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಸಿಂಧೂರ ವೀರ ಲಕ್ಷ್ಮಣ ನಾಯಕ ಅವರ ಕುರಿತ ಚಿತ್ರವಿದು. ಫಸ್ಟ್​ ಲುಕ್​ ಮತ್ತು ಮೋಷನ್​ ಪೋಸ್ಟರ್​ ಬಿಡುಗಡೆಯಾಗಿದೆ. ಮುಂದಿನ ದಿನಗಳಲ್ಲಿ ಚಿತ್ರದ ಬಗ್ಗೆ ಹೆಚ್ಚು ಮಾಹಿತಿ ನೀಡುತ್ತೇನೆ' ಎಂದರು. "ವೀಕೆಂಡ್​' ಚಿತ್ರದ ಮೂಲಕ ನಾಯಕನಾಗಿ ಸ್ಯಾಂಡಲ್​ವುಡ್​ ಡೆಬ್ಯೂ ಮಾಡಿದ, ಸದ್ಯ ಇತ್ತೀಚೆಗಷ್ಟೆ "ಅನ್​ಲಾಕ್​ ರಾಘವ' ಚಿತ್ರದ ಚಿತ್ರೀಕರಣ ಪೂರ್ಣಗೊಳಿಸಿರುವ ಮಿಲಿಂದ್​ ಗೌತಮ್​ ಲಕ್ಷ್ಮಣ ನಾಯಕನ ಪಾತ್ರದಲ್ಲಿ ಅಭಿನಯಿಸಲಿದ್ದಾರೆ.

ಇದನ್ನೂ ಓದಿ : ಭಾವಪೂರ್ಣ ಟ್ರೇಲರ್; ಚೇತನ್ ನಿರ್ದೇಶನಕ್ಕೆ ರಮೇಶ್ ಪಂಡಿತ್ ಹೀರೋ

ಈ ಸಂದರ್ಭದಲ್ಲಿ ಸಿಂಧೂರ ಲಕ್ಷ್ಮಣ ನಾಯಕ ಅವರ ಕುಟುಂಬದವರು ಹಾಗೂ ನಿರ್ದೇಶಕ ಪಲ್ಲಕ್ಕಿ ರಾಧಾಕೃಷ್ಣ ಅವರನ್ನು ಸನ್ಮಾನಿಸಲಾಯಿತು. ಕಾರ್ಯಕ್ರಮದಲ್ಲಿ ಶಾಸಕ ರಾಜು ಗೌಡ ನಾಯಕ, ಇದೇ ಸಂದರ್ಭದಲ್ಲಿ ಡಾಲಿ ಧನಂಜಯ, ನೆನಪಿರಲಿ ಪ್ರೇಮ್​, ವಸಿಷ್ಠ ಸಿಂಹ, ಪೂಜಾಗಾಂಧಿ, ಸಂಜನಾ ಗಲ್ರಾನಿ, ವೀರಕಪುತ್ರ ಶೀನಿವಾಸ್​, ತಮಿಳು ನಿರ್ದೇಶಕ ಚೇರನ್​ ಸೇರಿ ಹಲವರು ಹಾಜರಿದ್ದರು.