ಆದಾಯ ತಂದ ಕಾಸರಗೋಡು ಗಿಡ್ಡ : ಬೇಳ ಹಸು ಸಾಕಣೆ ಕೇಂದ್ರಕ್ಕೆ 16 ಲಕ್ಷ ರೂ. ಸಂಪಾದನೆ

ವಿಜಯವಾಣಿ ಸುದ್ದಿಜಾಲ ಬದಿಯಡ್ಕ

ಬದಿಯಡ್ಕ ಪಂಚಾಯಿತಿ ನೀರ್ಚಾಲು ಬಳಿಯ ಬೇಳದಲ್ಲಿ ಕಾಸರಗೋಡು ಕುಬ್ಜ ತಳಿ ಹಸು ಸಂವರ್ಧನಾ ಕೇಂದ್ರ ಕಳೆದ ಹಣಕಾಸು ವರ್ಷದಲ್ಲಿ 16,83,572ರೂ. ಆದಾಯ ಗಳಿಸುವ ಮೂಲಕ ಮಾದರಿಯಾಗಿದೆ.

ಕಾಸರಗೋಡಿನ ವಿಶಿಷ್ಟ ಸಂಪತ್ತಾಗಿರುವ, ರೋಗಗಳಿಗೆ ನಿರೋಧಕವಾಗಿರುವ, ಹವಾಮಾನಕ್ಕೆ ಸೂಕ್ತವಾಗಿರುವ ಮತ್ತು ಕಡಿಮೆ ವೆಚ್ಚದಲ್ಲಿ ಸಾಕಬಹುದಾದ ಸ್ಥಳೀಯ ಹಸುಗಳ ಸಂಖ್ಯೆ ದಿನೇ ದಿನೇ ಕಡಿಮೆಯಾಗುತ್ತಿದೆ. ಸರ್ಕಾರಿ ಯೋಜನೆ ಮೂಲಕ ಅವುಗಳನ್ನು ರಕ್ಷಿಸದಿದ್ದರೆ ಅವು ಅಳಿದುಹೋಗುವ ಸಾಧ್ಯತೆ ಮನಗಂಡು 2015ರ ಸೆಪ್ಟೆಂಬರ್ 29ರಂದು ಬೇಳದಲ್ಲಿ ಕಾಸರಗೋಡು ಕುಬ್ಜ ತಳಿ ಹಸು ಸಂವರ್ಧನಾ ಕೇಂದ್ರವನ್ನು ಆರಂಭಿಸಲಾಯಿತು. ಪ್ರಸ್ತುತ ಈ ಕೇಂದ್ರ ಕಾಸರಗೋಡು ಗಿಡ್ಡ ತಳಿಯ ಸಂರಕ್ಷಣೆಯಲ್ಲಿ ಮಹತ್ವದ ಪಾತ್ರ ವಹಿಸಿದೆ.

ಆರಂಭದಲ್ಲಿದ್ದ ಹಸುಗಳು 108. ಕೇರಳ ಜಾನುವಾರು ಅಭಿವೃದ್ಧಿ ಮಂಡಳಿಯಿಂದ ಪಡೆದ ಕಾಸರಗೋಡು ಸ್ಥಳೀಯ ಹೋರಿಗಳ ವೀರ್ಯವನ್ನು ಬಳಸಿ ಇಲ್ಲಿಯ ಹಸುಗಳಿಗೆ ಕೃತಕ ಗರ್ಭಧಾರಣೆ ಮಾಡಲಾಗುತ್ತದೆ. ಕೃತಕ ಗರ್ಭಧಾರಣೆ ಮೂಲಕ ಹೆಚ್ಚಿನ ಸಂಖ್ಯೆಯ ಕರುಗಳು ಜನಿಸಿವೆ ಮತ್ತು 2020ರಲ್ಲಿ ಜಾನುವಾರುಗಳ ಸಂಖ್ಯೆ 200 ತಲುಪಿವೆ. ಕರುಗಳು ಮತ್ತು ಹಸುಗಳು ಸೇರಿದಂತೆ ಒಟ್ಟು 150 ಜಾನುವಾರುಗಳನ್ನು ಸಂತಾನೋತ್ಪತ್ತಿಗಾಗಿ ಅಗತ್ಯವಿರುವವರಿಗೆ ನೀಡಲಾಗಿದೆ. ಪ್ರಸ್ತುತ, ಈ ಫಾರ್ಮ್‌ನಲ್ಲಿ ಒಟ್ಟು 148 ಜಾನುವಾರುಗಳಿವೆ. ಇದರಲ್ಲಿ 72 ಹಸುಗಳು, 14 ಗಂಡು ಕರುಗಳು ಮತ್ತು 58 ಹೆಣ್ಣು ಕರುಗಳು ಸೇರಿವೆ.

ಹುಲ್ಲು ಬೆಳೆಸಲು ಯೋಜನೆ

ಬದಿಯಡ್ಕ ಗ್ರಾಮ ಪಂಚಾಯಿತಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿ 3.5 ಎಕರೆ ಜಮೀನಿನಲ್ಲಿ ಮೇವಿನ ಹುಲ್ಲನ್ನು ಬೆಳೆಸಲಾಗುತ್ತಿದೆ. ಇಲ್ಲಿರುವ 66 ಅಕೇಶಿಯಾ ಮರಗಳನ್ನು ಕಡಿದು ಆ ಪ್ರದೇಶದಲ್ಲಿ ಮೇವಿನ ಹುಲ್ಲನ್ನು ಬೆಳೆಸಲು ಯೋಜನೆಯನ್ನು ಸಿದ್ಧಪಡಿಸಲಾಗಿದೆ. ಜಮೀನಿನಲ್ಲಿರುವ ಜಾನುವಾರುಗಳಿಗೆ ಅಗತ್ಯವಿರುವ ಸಂಪೂರ್ಣ ಹುಲ್ಲನ್ನು ಜಮೀನಿನಲ್ಲಿಯೇ ಉತ್ಪಾದಿಸಬಹುದಾಗಿದೆ.

ಸರ್ಕಾರಿ ಮಟ್ಟದ ಏಕೈಕ ತಾಣ

ಕಾಸರಗೋಡು ಕುಬ್ಜ ಹಸುಗಳಿಗೆ ಸರ್ಕಾರಿ ಮಟ್ಟದ ಏಕೈಕ ಸಂರಕ್ಷಣಾ ಕೇಂದ್ರವಾಗಿರುವುದರಿಂದ, ಕೇರಳ ಪಶುವೈದ್ಯಕೀಯ ವಿಜ್ಞಾನ ವಿಶ್ವವಿದ್ಯಾಲಯ, ಡೇರಿ ಸೈನ್ಸ್ ಕಾಲೇಜು ಮತ್ತು ಕೇಂದ್ರ ವಿಶ್ವವಿದ್ಯಾಲಯದ ಅನೇಕ ವಿದ್ಯಾರ್ಥಿಗಳು ಸಂಶೋಧನೆ ಸಂಬಂಧಿತ ಅಧ್ಯಯನಗಳಿಗಾಗಿ ಫಾರ್ಮ್‌ಗೆ ಭೇಟಿ ನೀಡುತ್ತಿದ್ದಾರೆ.

ವರದಿ ಸಿದ್ಧಪಡಿಸುವ ಕೆಲಸ ಪೂರ್ಣ

ಕಾಸರಗೋಡು ಸ್ಥಳೀಯ ಹಸುಗಳನ್ನು ಗುರುತಿಸುವ ಕೆಲಸವನ್ನು ಕೇರಳ ಜಾನುವಾರು ಅಭಿವೃದ್ಧಿ ಮಂಡಳಿ ಸಹಯೋಗದೊಂದಿಗೆ ನಡೆಸಲಾಯಿತು ಮತ್ತು ಅದರ ವರದಿ ಸಿದ್ಧಪಡಿಸುವ ಕೆಲಸ ಪೂರ್ಣಗೊಂಡಿದೆ. ಕಾಸರಗೋಡು ಮತ್ತು ಮಂಜೇಶ್ವರ ತಾಲೂಕುಗಳಲ್ಲಿ ಸ್ಥಳೀಯ ಹಸುಗಳನ್ನು ಸಾಕುವ ರೈತರ ಮನೆಗಳಲ್ಲಿ ಆಯ್ಕೆ ಮಾಡಿ ತರಬೇತಿ ಪಡೆದ 30 ಹಸು ಸಹಚರರನ್ನು ಬಳಸಿಕೊಂಡು ಡೇಟಾ ಸಂಗ್ರಹಣೆ ಕೈಗೊಳ್ಳಲಾಗಿದೆ.

https://www.vijayavani.net/appeal-for-upgrading-bajattur-government-school

https://www.vijayavani.net/thieves-enter-house-while-family-is-sleeping-steal-jewellery-and-cash-worth-lakhs-of-rupees-escape-within-24-hours-in-bengaluru