ಮಾಜಿ ಮುಖ್ಯಮಂತ್ರಿ ದಿ. ಜಯಲಲಿತಾ ಪುಣ್ಯತಿಥಿ; ತಲೈವಿ ಲುಕ್​ನಲ್ಲಿ ಕಂಗನಾ

ಮುಂಬೈ: ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ದಿ. ಜೆ ಜಯಲಲಿತಾ ಅವರು ಇಲ್ಲವಾಗಿ ನಾಲ್ಕು ವರ್ಷಗಳು ಗತಿಸಿದವು. ಅವರ ರಾಜಕೀಯ ಜೀವನವನ್ನೇ ಬಾಲಿವುಡ್​ ನಟಿ ಕಂಗನಾ ತಲೈವಿ ಶೀರ್ಷಿಕೆಯಲ್ಲಿ ಸಿನಿಮಾ ಮಾಡುತ್ತಿದ್ದಾರೆ. ಈಗಾಗಲೇ ಬಹುತೇಕ ಚಿತ್ರೀಕರಣವನ್ನೂ ಮುಗಿಸಿಕೊಂಡಿದೆ. ಇದೀಗ ಜಯಲಲಿತಾ ಪುಣ್ಯತಿಥಿ ನಿಮಿತ್ತ ಚಿತ್ರದ ಒಂದಷ್ಟು ಫೋಟೋಗಳನ್ನು ಕಂಗನಾ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ತಾಕತ್ತಿದ್ರೆ ನಮ್ಮಲ್ಲಿಗೆ ಬರಲಿ; ನಟಿ ಕಂಗನಾಗೆ ಚಾಲೆಂಜ್​, ಅವರ ಸಿನಿಮಾಗಳಿಗೆ ಬಹಿಷ್ಕಾರ

‘ಜಯಲಲಿತಾ ಅಮ್ಮ ಅವರ ಪುಣ್ಯತಿಥಿ ನಿಮಿತ್ತ ನಮ್ಮ ತಲೈವಿ ತಂಡದಿಂದ ಒಂದಷ್ಟು ವರ್ಕಿಂಗ್​ ಫೋಟೋಗಳು ಇಲ್ಲಿವೆ. ಇನ್ನು ನನ್ನ ಇಡೀ ತಂಡಕ್ಕೆ ತುಂಬು ಧನ್ಯವಾದಗಳು, ವಿಶೇಷವಾಗಿ ನಮ್ಮ ತಂಡದ ವಿಜಯ್ ಅವರು ಈ ಚಿತ್ರದ ಸಲುವಾಗಿ ಸೂಪರ್ ಹ್ಯೂಮನ್ ರೀತಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಇನ್ನೊಂದು ವಾರದ ಶೂಟಿಂಗ್​ ಮುಗಿದರೆ ಚಿತ್ರ ಮುಕ್ತಾಯವಾಗಲಿದೆ’ ಎಂದು ಕಂಗನಾ ಹೇಳಿಕೊಂಡಿದ್ದಾರೆ.

ಅರವಿಂದ್ ಸಾಮಿ, ಪ್ರಕಾಶ್ ರೈ, ಜಿಶ್ಶು ಸೇನ್​ಗುಪ್ತಾ, ಸೇರಿ ಸಾಕಷ್ಟು ಘಟಾನುಘಟಿ ಕಲಾವಿದರು ಈ ಚಿತ್ರದಲ್ಲಿ ನಟಿಸುತ್ತಿದ್ದು, ಹಿಂದಿ ತೆಲುಗು ಮತ್ತು ತಮಿಳಿನಲ್ಲಿ ಈ ಸಿನಿಮಾ ಬಿಡುಗಡೆ ಆಗಲಿದೆ. ವಿಷ್ಣು ವರ್ಧನ್ ಇಂದೂರಿ, ಶೈಲೇಶ್​ ಈ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದಾರೆ. ಎ.ಎಲ್ ವಿಜಯ್ ಈ ಚಿತ್ರ ನಿರ್ದೇಶಿಸುತ್ತಿದ್ದು, ಕೆ. ವಿ ವಿಜಯೇಂದ್ರ ಪ್ರಸಾದ್ ಕತೆ ಬರೆದಿದ್ದಾರೆ. (ಏಜೆನ್ಸೀಸ್​)

https://www.vijayavani.net/om-the-battle-within-poster-compare-it-with-tiger-shroffs-baaghi-3/