ರಾಂಚಿ ಟೆಸ್ಟ್​ನಲ್ಲಿ ಧ್ರುವ ಜುರೆಲ್​ ಸೆಲ್ಯೂಟ್​ ಹೊಡೆದಿದ್ದೇಕೆ? ಏನಿದರ ಅರ್ಥ? ಇಲ್ಲಿದೆ ವಿವರಣೆ...

ರಾಂಚಿ: ಭಾರತ ತಂಡ ಪ್ರವಾಸಿ ಇಂಗ್ಲೆಂಡ್​ ವಿರುದ್ಧದ 4ನೇ ಟೆಸ್ಟ್​ ಪಂದ್ಯದ 3ನೇ ದಿನದಾಟದಲ್ಲಿ ಮತ್ತೆ 88 ರನ್​ ಪೇರಿಸಿ ಮೊದಲ ಇನಿಂಗ್ಸ್​ ಹಿನ್ನಡೆಯನ್ನು ಭಾರಿ ಪ್ರಮಾಣದಲ್ಲಿ ತಗ್ಗಿಸುವಲ್ಲಿ 23 ವರ್ಷದ ಧ್ರುವ ಜುರೆಲ್​ ಮಹತ್ವದ ಪಾತ್ರ ನಿರ್ವಹಿಸಿದರು. ಶತಕವಂಚಿತರಾದ ಜುರೆಲ್​ 90 ರನ್​ಗಳ ಇನಿಂಗ್ಸ್​ನಲ್ಲಿ ಅರ್ಧಶತಕ ಪೂರೈಸಿದಾಗ ಸೆಲ್ಯೂಟ್​ ಹೊಡೆದು ಸಂಭ್ರಮಿಸಿದರು. ಇದರ ಹಿಂದಿನ ಅರ್ಥವೇನು ಗೊತ್ತೇ?

ಧ್ರುವ ಜುರೆಲ್​ ಚೊಚ್ಚಲ ಅರ್ಧಶತಕ ಪೂರೈಸಿದ ಬೆನ್ನಲ್ಲೇ ಸೆಲ್ಯೂಟ್​ ಹೊಡೆಯುವ ಮೂಲಕ 1999ರ ಕಾರ್ಗಿಲ್​ ಯುದ್ಧದಲ್ಲಿ ಭಾಗವಹಿಸಿದ ಯೋಧರಾಗಿರುವ ತಂದೆ ನೇಮ್​ ಚಂದ್​ಗೆ ಗೌರವ ಸಲ್ಲಿಸಿದರು. ಪಂದ್ಯಕ್ಕೆ ಮುನ್ನ ತಂದೆ ತನ್ನ ಬಳಿ ಇಂಥದ್ದೊಂದು ಕೋರಿಕೆಯನ್ನು ಇರಿಸಿದ್ದರು. ನನಗಾಗಿ ಎಲ್ಲವನ್ನೂ ಮಾಡಿರುವ ಅವರಿಗೆ ಈ ಸೆಲ್ಯೂಟ್​ ಅರ್ಪಣೆ ಎಂದು 23 ವರ್ಷದ ಧ್ರುವ ಜುರೆಲ್​ ದಿನದಾಟದ ಬಳಿಕ ಹೇಳಿಕೊಂಡರು. ಶತಕ ತಪ್ಪಿದ ಬಗ್ಗೆ ಬೇಸರವೂ ನನಗಿಲ್ಲ. ತಂಡಕ್ಕಾಗಿ ಉತ್ತಮ ಕೊಡುಗೆ ನೀಡಿದ ಸಮಾಧಾನವಿದೆ ಎಂದೂ ಅವರು ಹೇಳಿದ್ದಾರೆ.

ಜುರೆಲ್​ ಕ್ರೀಸ್​ಗೆ ಇಳಿದಾಗ ಭಾರತ 161 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿತ್ತು ಮತ್ತು ಇನ್ನೂ 192 ರನ್​ ಹಿನ್ನಡೆಯಲ್ಲಿತ್ತು. ಅವರು ಕ್ರೀಸ್​ನಲ್ಲಿದ್ದಾಗಲೇ ಭಾರತ ಸ್ರಾರ್ಜ್​ ಖಾನ್​ ಮತ್ತು ಅಶ್ವಿನ್​ ವಿಕೆಟ್​ ಕಳೆದುಕೊಂಡು ಇನ್ನಷ್ಟು ದುಸ್ಥಿತಿ ತಲುಪಿತ್ತು. ಆಗ ಕುಲದೀಪ್​ ಜತೆಗೂಡಿ 8ನೇ ವಿಕೆಟ್​ಗೆ ಆಸರೆಯಾದ ಜುರೆಲ್​, 2ನೇ ದಿನದಂತ್ಯದಲ್ಲೇ 42 ರನ್​ ಸೇರಿಸಿದ್ದರು. 3ನೇ ದಿನ ಬೆಳಗ್ಗೆ ಈ ಜತೆಯಾಟವನ್ನು 76 ರನ್​ಗಳಿಗೆ ವಿಸ್ತರಿಸಿದರು.

ಜುರೆಲ್​ಗೆ ಸಮರ್ಥ ಸಾಥ್​ ನೀಡಿದ ಕುಲದೀಪ್​ (28) ದಿನದ 16ನೇ ಓವರ್​ನಲ್ಲಿ ಆಂಡರ್​ಸನ್​ಗೆ ವಿಕೆಟ್​ ಒಪ್ಪಿಸಿದರು. ಬಳಿಕ ಆಕಾಶ್​ ದೀಪ್​ (9) ಜತೆ 9ನೇ ವಿಕೆಟ್​ಗೆ 40 ರನ್​ ಸೇರಿಸಿದ ಜುರೆಲ್​, ಇದರಲ್ಲಿ 31ರನ್​ಗಳನ್ನು ತಾವೇ ಗಳಿಸಿದರು. ಕೊನೆಯಲ್ಲಿ ಸಿರಾಜ್​ ಜತೆಗೂಡಿ ಭಾರತದ ಮೊತ್ತವನ್ನು 300ರ ಗಡಿ ದಾಟಿಸಿದ ಜುರೆಲ್​ ಚೊಚ್ಚಲ ಶತಕದಿಂದ ಕೇವಲ 10 ರನ್​ ದೂರವಿದ್ದಾಗ ಹಾರ್ಟ್ಲಿ ಎಸೆತದಲ್ಲಿ ಬೌಲ್ಡಾದರು. ಇದರೊಂದಿಗೆ ಭಾರತದ ಇನಿಂಗ್ಸ್​ ಮುಕ್ತಾಯಗೊಂಡರೂ, ಹಿನ್ನಡೆ ದೊಡ್ಡ ಪ್ರಮಾಣದಲ್ಲಿ ತಗ್ಗಿದ ಸಮಾಧಾನ ನೀಡಿದರು.

https://www.vijayavani.net/jasprit-bumrah-cheers-on-wife-sanjana-ganesan-as-she-resumes-broadcasting-duties