'ಥ್ಯಾಂಕ್​ಲೆಸ್​ ಜಾಬ್'​ ಎಂದ ಐಪಿಎಸ್​ ಅಧಿಕಾರಿ; ವೈರಲ್ ಆಯ್ತು ಟ್ವೀಟ್​

ಜೈಪುರ: ಮೊನ್ನೆಮೊನ್ನೆಯಷ್ಟೇ ಐಪಿಎಸ್​ ಅಧಿಕಾರಿ ಡಾ.ಡಿ. ರೂಪಾ ಟ್ವೀಟ್​ ವೈರಲ್​ ಆಗಿತ್ತು. ನಟಿ ಕಂಗನಾ ಹಾಗೂ ಅವರ ಮಧ್ಯೆ ಟ್ವಿಟರ್​ನಲ್ಲಿ ವಾಗ್ವಾದ ನಡೆದಿತ್ತು. ಇದೀಗ ಮತ್ತೊಬ್ಬ ಐಪಿಎಸ್​ ಅಧಿಕಾರಿ ಟ್ವೀಟ್​ ಕೂಡ ವೈರಲ್​ ಆಗಿದ್ದು, ಪೊಲೀಸ್ ಇಲಾಖೆಯೇ ಹುಬ್ಬೇರಿಸುವಂತೆ ಮಾಡಿದೆ.

ಏಕೆಂದರೆ ಈ ಅಧಿಕಾರಿ 'ಥ್ಯಾಂಕ್​ಲೆಸ್​ ಜಾಬ್'​ ಎಂದು ಟ್ವೀಟ್​ ಮಾಡಿದ್ದಾರೆ. 'ನೀನು ಥ್ಯಾಂಕ್​ಲೆಸ್ ಕೆಲಸವನ್ನು ಆರಿಸಿಕೊಂಡಿದ್ದಿ. ಯಾರೂ ಥ್ಯಾಂಕ್ಸ್ ಹೇಳದಾಗ ಅಪ್​ಸೆಟ್​ ಆಗಬಾರದು. ಚಪ್ಪಾಳೆ ಹಾಗೂ ಮೆಚ್ಚುಗೆಯನ್ನು ಬೆನ್ನತ್ತಬೇಡ..' ಎಂಬುದಾಗಿ ಅವರು ಟ್ವೀಟ್​ ಮಾಡಿಕೊಂಡಿದ್ದಾರೆ. ಅವರ ಈ ಟ್ವೀಟ್​ ವೈರಲ್​ ಆಗಿದ್ದು, ಎರಡೇ ದಿನಗಳಲ್ಲಿ 2 ಸಾವಿರಕ್ಕೂ ಅಧಿಕ ಮಂದಿ ಲೈಕ್ ಮಾಡಿದ್ದಾರೆ.

ಅಂದಹಾಗೆ ಇಂಥದ್ದೊಂದು ಟ್ವೀಟ್ ಮಾಡಿ ಗಮನ ಸೆಳೆದಿರುವ ಐಪಿಎಸ್​ ಅಧಿಕಾರಿಯ ಹೆಸರು ಗೌರವ್ ಯಾದವ್. ಇತ್ತೀಚೆಗೆ ಇವರನ್ನು ಎತ್ತಂಗಡಿ ಮಾಡಿದ ಹಿನ್ನೆಲೆಯಲ್ಲಿ ಹೀಗೆ ಟ್ವೀಟ್​ ಮಾಡಿದ್ದಾರೆ ಎನ್ನಲಾಗಿದ್ದರೂ ಸ್ವತಃ ಅಧಿಕಾರಿಯೇ ಅದನ್ನು ನಿರಾಕರಿಸಿದ್ದಾರೆ.

ರಾಜಸ್ಥಾನದ ಕೋಟಾದಲ್ಲಿ ಇತ್ತೀಚೆಗೆ ಕಾಂಗ್ರೆಸ್​ ಕಾರ್ಯಕರ್ತರ ಮೇಲೆ ಲಾಠಿಚಾರ್ಜ್​ ಆಗಿತ್ತು. ಅದೇ ಕಾರಣಕ್ಕೆ ಅಲ್ಲಿನ ಎಸ್​ಪಿ ಆಗಿದ್ದ ಗೌರವ್​ ಯಾದವ್​ ಅವರನ್ನು ವರ್ಗಾವಣೆ ಮಾಡಲಾಗಿದೆ ಎಂಬ ಮಾತುಗಳು ಕೇಳಿಬಂದಿವೆ. ಆದರೆ ನಾನು ಲೋಕಾಭಿರಾಮವಾಗಿ ಆ ಟ್ವೀಟ್ ಮಾಡಿದ್ದು, ಅದಕ್ಕೂ ಇತ್ತೀಚಿನ ಬೆಳವಣಿಗೆಗೂ ಯಾವುದೇ ಸಂಬಂಧವಿಲ್ಲ. ಅಷ್ಟಕ್ಕೂ ನಾನು ಅದನ್ನು ಗೆಳೆಯರೊಬ್ಬರ ವಾಲ್​ನಿಂದ ಕಾಪಿ ಮಾಡಿದ್ದಾಗಿಯೂ ಸ್ಪಷ್ಟನೆ ನೀಡಿದ್ದಾರೆ. ಗೌರವ್ ಯಾದವ್ ಸದ್ಯ ಜೈಪುರದ ಸಿಐಡಿ ಕ್ರೈಂ ಬ್ರ್ಯಾಂಚ್​ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. (ಏಜೆನ್ಸೀಸ್​)

https://www.vijayavani.net/government-holiday-list-for-year-2021-is-announced-from-gok/