17 ವರ್ಷದ ಐಪಿಎಲ್ ಇತಿಹಾಸದಲ್ಲಿ ಇದೇ ಮೊದಲು: ವಿಶೇಷ ದಾಖಲೆಗೆ ಸಾಕ್ಷಿಯಾಯ್ತು ಈ ಸೀಸನ್​!

ನವದೆಹಲಿ: ಇತ್ತೀಚೆಗಷ್ಟೇ ಮುಕ್ತಾಯವಾದ ಇಂಡಿಯನ್​ ಪ್ರೀಮಿಯರ್​ ಲೀಗ್​ (ಐಪಿಎಲ್​) 17ನೇ ಸೀಸನ್​ ಕ್ರಿಕೆಟ್ ಪ್ರೇಮಿಗಳಿಗೆ ಮನರಂಜನೆಯ ರಸದೌತಣವನ್ನು ಉಣಬಡಿಸಿತು. ಈ ಸೀಸನ್​ನಲ್ಲಿ ದಾಖಲೆಗಳ ಮೇಲೆ ದಾಖಲೆಗಳು ಮುರಿದಿವೆ. ರನ್‌ಗಳ ಸುರಿಮಳೆಯಿಂದಾಗಿ ಬ್ಯಾಟರ್‌ಗಳು ವಿಶ್ವದಾಖಲೆಗಳನ್ನು ರಚಿಸಿದರು. ಈ ಸೀಸನ್ 17 ವರ್ಷಗಳ ಐಪಿಎಲ್ ಇತಿಹಾಸದಲ್ಲೇ ಅಪರೂಪದ ಸಾಧನೆ ಬರೆದಿದೆ. ಇಷ್ಟು ಸೀಸನ್​ನಲ್ಲಿ ಈ ಸಾಧನೆ ದಾಖಲಾಗಿರುವುದು ಇದೇ ಮೊದಲು. ಅಷ್ಟಕ್ಕೂ ಆ ದಾಖಲೆ ಏನು? ಎಂಬುದನ್ನು ನಾವೀಗ ತಿಳಿಯೋಣ.

17 ವರ್ಷಗಳ ಐಪಿಎಲ್ ಇತಿಹಾಸದಲ್ಲಿ 2024ರ ಸೀಸನ್ ಇತಿಹಾಸ ಸೃಷ್ಟಿಸಿದೆ. ಶತಕಗಳ ಸಾರ್ವಕಾಲಿಕ ದಾಖಲೆಯನ್ನು ಬರೆದಿದೆ. ಹಿಂದಿನ ಯಾವುದೇ ಸೀಸನ್​ನಲ್ಲಿ ಇಷ್ಟೊಂದು ಶತಕಗಳು ದಾಖಲಾಗಿರಲಿಲ್ಲ. ಈ ಸೀಸನ್​ನಲ್ಲಿ ದಾಖಲೆಯ 14 ಶತಕಗಳು ಬಂದಿವೆ. ಈ ಮೂಲಕ ಐಪಿಎಲ್-2024 ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ಶತಕಗಳನ್ನು ಗಳಿಸಿದ ಸೀಸನ್​ ಆಯಿತು. 2023ರ ಸೀಸನ್​ನಲ್ಲಿ 12 ಶತಕಗಳು ಸಿಡಿದಿದ್ದವು. ಆ ದಾಖಲೆಯನ್ನು ಈ ಸೀಸನ್​ ಮುರಿದಿದೆ.

ವಿವಿಧ ಫ್ರಾಂಚೈಸಿಗಳ ಪರವಾಗಿ 13 ಆಟಗಾರರು ಶತಕ ಗಳಿಸಿದ್ದಾರೆ. ಇದರಲ್ಲಿ ಜಾಸ್ ಬಟ್ಲರ್ ರಾಜಸ್ಥಾನ ರಾಯಲ್ಸ್​ ಪತ ಎರಡು ಶತಕ ಗಳಿಸಿದ್ದಾರೆ. ಮಾರ್ಕಸ್ ಸ್ಟೊಯಿನಿಸ್ ಈ ಸೀಸನ್​ನಲ್ಲಿ ಮೊದಲ ಶತಕ ಗಳಿಸಿದ ಆಟಗಾರ ಎನಿಸಿಕೊಂಡರು. ಅವರು ಲಖನೌ ತಂಡವನ್ನು ಪ್ರತಿನಿಧಿಸಿ ಈ ಸಾಧನೆ ಮಾಡಿದರು. ವೇಗದ ಶತಕವನ್ನು ವಿಲ್ ಜಾಕ್ಸ್ ಮತ್ತು ಟ್ರಾವಿಸ್ ಹೆಡ್ ಜಂಟಿಯಾಗಿ ನೋಂದಾಯಿಸಿದ್ದಾರೆ. ಅವರು 41 ಎಸೆತಗಳಲ್ಲಿ ಶತಕ ಗಳಿಸಿದರು. ಇನ್ನು ಆರ್​ಸಿಬಿ ಆಟಗಾರ ವಿರಾಟ್​ ಕೊಹ್ಲಿ ಅವರು ಏಪ್ರಿಲ್ 6 ರಂದು ರಾಜಸ್ಥಾನ ರಾಯಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ 72 ಎಸೆತಗಳಲ್ಲಿ ಅಜೇಯ 113 ರನ್ ಗಳಿಸಿದರು.

ಐಪಿಎಲ್​-2024ರಲ್ಲಿ ಶತಕ ಬಾರಿಸಿದ ಆಟಗಾರರು

ಮಾರ್ಕಸ್ ಸ್ಟೊಯಿನಿಸ್, ವಿರಾಟ್ ಕೊಹ್ಲಿ, ಸುನಿಲ್ ನಾರಾಯಣ್​, ಜಾನಿ ಬೈರ್‌ಸ್ಟೋವ್, ರುತುರಾಜ್ ಗಾಯಕ್ವಾಡ್, ಜಾಸ್ ಬಟ್ಲರ್ (ಎರಡು ಶತಕ), ರೋಹಿತ್ ಶರ್ಮ, ಯಶಸ್ವಿ ಜೈಸ್ವಾಲ್, ಶುಭಮನ್ ಗಿಲ್, ಸಾಯಿ ಸುದರ್ಶನ್, ಸೂರ್ಯಕುಮಾರ್ ಯಾದವ್, ಟ್ರಾವಿಸ್ ಹೆಡ್ ಮತ್ತು ವಿಲ್ ಜಾಕ್ಸ್. (ಏಜೆನ್ಸೀಸ್​)

https://www.vijayavani.net/premeditated-fraud-police-report-against-manjummel-boys-makers

https://www.vijayavani.net/25-crores-for-starc-in-ipl-55-lakhs-for-you-rinku-dimmatirige-answer-to-this-question