'ಇಂಡಿಯಾ' ಹೆಸರನ್ನು 'ಭಾರತ' ಎಂದು ಬದಲಾಯಿಸಿ: ಬಿಜೆಪಿ ಸಂಸದ

ನವದೆಹಲಿ: ಬಿಜೆಪಿ ಸಂಸದ ನರೇಶ್ ಬನ್ಸಾಲ್ ಅವರು ಶುಕ್ರವಾರ ರಾಜ್ಯಸಭೆಯಲ್ಲಿ 'ಭಾರತ' ಎಂಬ ಹೆಸರು "ವಸಾಹತುಶಾಹಿ ಗುಲಾಮಗಿರಿ"ಯ ಸಂಕೇತವಾಗಿದ್ದು ಅದನ್ನು ಸಂವಿಧಾನದಿಂದ ತೆಗೆದುಹಾಕಬೇಕು ಎಂದು ಹೇಳಿ ಸಂಸತ್ತಿನಲ್ಲಿ ಗದ್ದಲ ಎಬ್ಬಿಸಿದರು. ದೇಶದ ಹೆಸರನ್ನು ‘ಭಾರತ’ ಎಂದು ಮರುನಾಮಕರಣ ಮಾಡುವಂತೆಯೂ ಅವರು ಕೋರಿದ್ದರು.

ಬಿಜೆಪಿ ಸಂಸದ ಬನ್ಸಾಲ್ ಅವರು ಮೇಲ್ಮನೆಯಲ್ಲಿ ಮಾತನಾಡುತ್ತಾ, 'ಇಂಡಿಯಾ' ಎಂಬ ಪದವನ್ನು ಬ್ರಿಟಿಷ್ ವಸಾಹತುಶಾಹಿ ಆಡಳಿತಗಾರರು ಹೇರಿದ್ದಾರೆ ಎಂದು ಪ್ರತಿಪಾದಿಸಿದರು. ದೇಶದ ನಿಜವಾದ ಪ್ರಾಚೀನ ಹೆಸರು 'ಭಾರತ'. ಇದಕ್ಕೆ ಪ್ರಾಚೀನ ಸಂಸ್ಕೃತ ಪಠ್ಯಗಳಲ್ಲಿ ಆಧಾರ ಇದ್ದು ಸಾವಿರಾರು ವರ್ಷಗಳಿಂದ ಬಳಕೆಯಲ್ಲಿದೆ ಎಂದು ಅವರು ಒತ್ತಿ ಹೇಳಿದರು.

ಇದನ್ನೂ ಓದಿ: ರಾತ್ರಿ ಖೆಡ್ಡಾ ತೋಡಿ ಹಗಲಿನಲ್ಲಿ ತಾನೇ ಬಿತ್ತು ಕಾಂಗ್ರೆಸ್ಸು!

ಶ್ರೀಮಂತ ಐತಿಹಾಸಿಕ ಗುರುತನ್ನು ಹೊಂದಿರುವ ರಾಷ್ಟ್ರವಾಗಿ ಭಾರತವು ವಸಾಹತುಶಾಹಿ ಯುಗದ ಪದನಾಮವನ್ನು ತ್ಯಜಿಸಬೇಕು ಎಂದು ಬಿಜೆಪಿ ಸಂಸದರು ಹೇಳಿದ್ದಾರೆ. "ಬ್ರಿಟಿಷರು ಭಾರತದ ಹೆಸರನ್ನು ಇಂಡಿಯಾ ಎಂದು ಬದಲಾಯಿಸಿದರು. ಸಂವಿಧಾನದ ಆರ್ಟಿಕಲ್ 1 ರ ಅಡಿಯಲ್ಲಿ, 'India, which is Bharath' ಎಂದೇ ಉಲ್ಲೇಖವಾಗಿದೆ. ನಮ್ಮ ದೇಶವು ಸಾವಿರಾರು ವರ್ಷಗಳಿಂದ 'ಭಾರತ' ಎಂಬ ಹೆಸರಿನಿಂದ ಕರೆಯಲ್ಪಟ್ಟಿದೆ . ಇದು ಈ ದೇಶದ ಪ್ರಾಚೀನ ಹೆಸರಾಗಿದ್ದು ಪುರಾತನ ಸಂಸ್ಕೃತ ಪಠ್ಯಗಳಲ್ಲಿ ಕಂಡುಬರುತ್ತದೆ. 'ಇಂಡಿಯಾ' ಎಂಬ ಹೆಸರನ್ನು ವಸಾಹತುಶಾಹಿ ಬ್ರಿಟೀಷರಿಂದ ನೀಡಲಾಗಿದೆ. ಹೀಗಾಗಿ ಇದು ಗುಲಾಮಗಿರಿಯ ಸಂಕೇತವಾಗಿದೆ. ಇಂಡಿಯಾ ಎಂಬ ಹೆಸರನ್ನು ಸಂವಿಧಾನದಿಂದ ತೆಗೆದುಹಾಕಬೇಕು'' ಎಂದು ಬನ್ಸಾಲ್ ಹೇಳಿದರು.

ಮೋದಿ ಭಾಷಣವೇ ಸ್ಫೂರ್ತಿ!

ಕಳೆದ ವರ್ಷ ಆಗಸ್ಟ್ 15 ರಂದು ಪ್ರಧಾನಿ ನರೇಂದ್ರ ಮೋದಿಯವರ ಭಾಷಣವನ್ನು ಉಲ್ಲೇಖಿಸಿ ಅವರು , "ಪ್ರಧಾನಿ ಮೋದಿ ವಸಾಹತುಶಾಹಿಯ ಎಲ್ಲಾ ಅವಶೇಷಗಳನ್ನು ನಿರ್ಮೂಲನೆ ಮಾಡಲು ಹೇಳಿದ್ದರು. "ಸ್ವಾತಂತ್ರ್ಯದ ಅಮೃತ್ ಕಾಲ್ ಅಡಿಯಲ್ಲಿ, ನಾವು ಆರ್ಟಿಕಲ್ 1ರ ಆರಂಭವನ್ನು ಸರಳವಾಗಿ ಭಾರತಕ್ಕೆ ಬದಲಾಯಿಸಿ 'ಇಂಡಿಯಾ' ಎಂಬ ಹೆಸರನ್ನು ತೆಗೆದುಹಾಕಬೇಕು ಎಂದು ನಾನು ಪ್ರಸ್ತಾಪಿಸುತ್ತೇನೆ' ಎಂದು ಅವರು ಹೇಳಿದರು.

ಪ್ರತಿಪಕ್ಷದವರು ಹೇಳಿದ್ದೇನು?

ಏತನ್ಮಧ್ಯೆ, ಎಲ್ಲಾ ವಸಾಹತುಶಾಹಿ ಪರಂಪರೆಯನ್ನು ತೊಡೆದುಹಾಕಲು ಬಿಜೆಪಿ ಅಚಲವಾಗಿರುವಂತೆ ಕಾಣಿಸಿಕೊಳ್ಳುತ್ತಿದ್ದರೂ, ಬಿಜೆಪಿ ಸರ್ಕಾರವು ತನ್ನ ಪ್ರಮುಖ ಯೋಜನೆಗಳಾದ ಮೇಕ್ ಇನ್ ಇಂಡಿಯಾ, ಸ್ಟಾರ್ಟಪ್ ಇಂಡಿಯಾ, ಅಪ್ ಇಂಡಿಯಾ, ನ್ಯೂ ಇಂಡಿಯಾ ಸೇರಿದಂತೆ ಇತರ ಯೋಜನೆಗಳಲ್ಲಿ 'ಇಂಡಿಯಾ' ಹೆಸರನ್ನು ಬಳಸುವುದನ್ನು ಮುಂದುವರೆಸಿದೆ ಎಂದು ಅನೇಕ ಕಾಂಗ್ರೆಸ್ ನಾಯಕರು ಟೀಕಿಸಿದರು. (ಏಜೆನ್ಸೀಸ್)