ಇಂದಿನ ಭಾರತ 1975ರ ಭಾರತವಲ್ಲ: ಕಾಂಗ್ರೆಸ್​ಗೆ ಮತ್ತೆ ಮುಳ್ಳಾದ ಶಶಿ ತರೂರ್ ಹೇಳಿಕೆ! Shashi Tharoor

Shashi Tharoor : ಭಾರತದಲ್ಲಿ 1975ರಲ್ಲಿ ಹೇರಿದ ತುರ್ತು ಪರಿಸ್ಥಿತಿಯನ್ನು ದೇಶದ ಇತಿಹಾಸದ ಕರಾಳ ಅಧ್ಯಾಯ ಎಂದು ಮಾತ್ರ ನೆನಪಿಸಿಕೊಳ್ಳಬಾರದು, ಬದಲಾಗಿ ಅದರ ಪಾಠಗಳನ್ನು ಸಂಪೂರ್ಣವಾಗಿ ಅರ್ಥಮಾಡಿಕೊಳ್ಳಬೇಕು ಎಂದು ಹಿರಿಯ ಕಾಂಗ್ರೆಸ್ ನಾಯಕ ಶಶಿ ತರೂರ್ ಹೇಳಿದ್ದಾರೆ.

ಮಲಯಾಳಂ ದಿನಪತ್ರಿಕೆ ದೀಪಿಕಾದಲ್ಲಿ ಗುರುವಾರ (ಜುಲೈ 10) ಪ್ರಕಟವಾದ ತುರ್ತು ಪರಿಸ್ಥಿತಿಯ ಕುರಿತಾದ ಲೇಖನದಲ್ಲಿ, ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ ಸದಸ್ಯರಾದ ಶಶಿ ತರೂರ್​, 1975ರ ಜೂನ್ 25 ರಿಂದ 1977ರ ಮಾರ್ಚ್ 21 ರವರೆಗೆ ಅಂದಿನ ಪ್ರಧಾನಿ ಇಂದಿರಾ ಗಾಂಧಿ ಘೋಷಿಸಿದ ತುರ್ತು ಪರಿಸ್ಥಿತಿಯ ಕರಾಳ ಯುಗವನ್ನು ನೆನಪಿಸಿದ್ದಾರೆ. ಅಂದು ಶಿಸ್ತು ಮತ್ತು ಸುವ್ಯವಸ್ಥೆಗಾಗಿ ಕೈಗೊಂಡ ಪ್ರಯತ್ನಗಳು, ಸಮರ್ಥಿಸಲಾಗದ ಕ್ರೌರ್ಯದ ಕೃತ್ಯಗಳಾಗಿ ಮಾರ್ಪಟ್ಟವು ಎಂದು ತರೂರ್​ ಹೇಳಿದ್ದಾರೆ.

ಇಂದಿರಾ ಗಾಂಧಿಯವರ ಪುತ್ರ ಸಂಜಯ್ ಗಾಂಧಿ ಬಲವಂತದ ಸಂತಾನಹರಣ ಅಭಿಯಾನಗಳನ್ನು ನಡೆಸಿದರು. ಇದು ತುರ್ತು ಪರಿಸ್ಥಿತಿಯ ಕುಖ್ಯಾತ ಉದಾಹರಣೆಯಾಗಿದೆ. ಬಡ ಗ್ರಾಮೀಣ ಪ್ರದೇಶಗಳಲ್ಲಿ ಹಿಂಸಾಚಾರ ನಡೆಸಲಾಯಿತು. ನವದೆಹಲಿಯಂತಹ ನಗರಗಳಲ್ಲಿ ಕೊಳೆಗೇರಿಗಳನ್ನು ನಿರ್ದಯವಾಗಿ ಕೆಡವಿ ತೆರವುಗೊಳಿಸಲಾಯಿತು. ಸಾವಿರಾರು ಜನರನ್ನು ನಿರಾಶ್ರಿತರನ್ನಾಗಿ ಮಾಡಲಾಯಿತು. ಅವರ ಕಲ್ಯಾಣವನ್ನು ಪರಿಗಣಿಸಲಿಲ್ಲ ಎಂದು ತಿರುವನಂತಪುರಂ ಸಂಸದ ಶಶಿ ತರೂರ್​ ಬರೆದಿದ್ದಾರೆ.

ಇದನ್ನೂ ಓದಿ: ಆತ ಐ ಲವ್​ ಯು ಅಂತ ಹೇಳಿದ ನಾನು ಓಕೆ ಎಂದೆ: ತಮ್ಮ ಲವ್​ ಸ್ಟೋರಿ ಬಿಚ್ಚಿಟ್ಟ ಅನುಷ್ಕಾ ಶೆಟ್ಟಿ! Anushka Shetty

ಪ್ರಜಾಪ್ರಭುತ್ವವನ್ನು ಹಗುರವಾಗಿ ಪರಿಗಣಿಸಬಾರದು. ಅದು ನಿರಂತರವಾಗಿ ಪೋಷಿಸಬೇಕಾದ ಮತ್ತು ಸಂರಕ್ಷಿಸಬೇಕಾದ ಅಮೂಲ್ಯ ಪರಂಪರೆಯಾಗಿದೆ. ಇದು ಎಲ್ಲೆಡೆ ಜನರಿಗೆ ಶಾಶ್ವತವಾದ ಜ್ಞಾಪನೆಯಾಗಿ ಕಾರ್ಯನಿರ್ವಹಿಸಲಿ ಎಂದಿರುವ ಶಶಿ ತರೂರ್​, ಇಂದಿನ ಭಾರತವು 1975 ರ ಭಾರತವಲ್ಲ ಎಂದಿದ್ದಾರೆ.

ನಾವೀಗ ಹೆಚ್ಚು ಆತ್ಮವಿಶ್ವಾಸವುಳ್ಳವರು, ಹೆಚ್ಚು ಅಭಿವೃದ್ಧಿ ಹೊಂದಿದವರು ಮತ್ತು ಹಲವು ವಿಧಗಳಲ್ಲಿ ಬಲವಾದ ಪ್ರಜಾಪ್ರಭುತ್ವವನ್ನು ಹೊಂದಿದ್ದೇವೆ. ಆದರೂ, ತುರ್ತು ಪರಿಸ್ಥಿತಿಯ ಪಾಠಗಳು ತೊಂದರೆದಾಯಕ ರೀತಿಯಲ್ಲಿ ಪ್ರಸ್ತುತವಾಗಿವೆ. ಅಧಿಕಾರವನ್ನು ಕೇಂದ್ರೀಕರಿಸುವ, ಭಿನ್ನಾಭಿಪ್ರಾಯವನ್ನು ಮೌನಗೊಳಿಸುವ ಮತ್ತು ಸಾಂವಿಧಾನಿಕ ರಕ್ಷಣೆಗಳನ್ನು ಬೈಪಾಸ್ ಮಾಡುವ ಪ್ರಚೋದನೆಯೂ ವಿವಿಧ ರೂಪಗಳಲ್ಲಿ ಮತ್ತೆ ಕಾಣಿಸಿಕೊಳ್ಳಬಹುದು ಎಂದು ತರೂರ್ ಇದೇ ಸಂದರ್ಭದಲ್ಲಿ ಎಚ್ಚರಿಸಿದ್ದಾರೆ.

ಸಾಮಾನ್ಯವಾಗಿ, ಇಂತಹ ಪ್ರವೃತ್ತಿಗಳನ್ನು ರಾಷ್ಟ್ರೀಯ ಹಿತಾಸಕ್ತಿ ಅಥವಾ ಸ್ಥಿರತೆಯ ಹೆಸರಿನಲ್ಲಿ ಸಮರ್ಥಿಸಬಹುದು. ಈ ಅರ್ಥದಲ್ಲಿ, ತುರ್ತು ಪರಿಸ್ಥಿತಿಯು ಬಲವಾದ ಎಚ್ಚರಿಕೆಯಾಗಿದೆ. ಪ್ರಜಾಪ್ರಭುತ್ವದ ರಕ್ಷಕರು ಯಾವಾಗಲೂ ಜಾಗರೂಕರಾಗಿರಬೇಕು ಎಂದು ಶಶಿ ತರೂರ್​ ಕರೆ ನೀಡಿದರು. (ಏಜೆನ್ಸೀಸ್​)

https://www.vijayavani.net/man-arrested-for-filming-women-on-bengaluru-streets-posting-videos-without-consent

https://www.vijayavani.net/kolkata-lawyer-gifted-wife-rs-49000-phone-gujarat-cops-came-knocking-moment-she-turned-it-on