ಬೆಂಗಳೂರಿಗೆ ಮಾರಕವಾಗುತ್ತಿದೆಯೇ ಇನ್​ಫ್ಲುಯೆಂಜಾ ರೀತಿಯ ಜ್ವರ?

ಬೆಂಗಳೂರು: ಕಳೆದ ಕೆಲವು ದಿನಗಳಿಂದ ಬೆಂಗಳೂರಿನಲ್ಲಿ ಕರೊನಾ ಸೋಂಕಿತರ ಸಂಖ್ಯೆಯ ಜತೆಗೆ ಸಾಯುವವರ ಸಂಖ್ಯೆಯೂ ಹೆಚ್ಚಾಗುತ್ತಿದೆ. ನಗರದಲ್ಲಿ ಹೆಚ್ಚುತ್ತಿರುವ ಇನ್​ಫ್ಲುಯೆಂಜಾ ರೀತಿಯ ಜ್ವರ ಪ್ರಕರಣಗಳು ಇದಕ್ಕೆ ಕಾರಣವಾಗುತ್ತಿದೆ ಎಂಬ ಅನುಮಾನ ತೀವ್ರವಾಗಿದೆ.

ಜೂನ್​ 7ರಿಂದ 11ರ ನಡುವೆ ನಗರದಲ್ಲಿ 129 ಕೋವಿಡ್​-19 ಪ್ರಕರಣಗಳು ವರದಿಯಾಗಿವೆ. ಇವುಗಳಲ್ಲಿ 43 ಜನರಿಗೆ ಇನ್​ಫ್ಲುಯೆಂಜಾ ರೀತಿಯ ಜ್ವರ ಇತ್ತು ಎಂಬುದು ಖಚಿತಪಟ್ಟಿದೆ. ಇದೇ ವೇಳೆ ಜೂನ್​ 1ರಿಂದ 5ರ ನಡುವೆ ವರದಿಯಾಗಿದ್ದ 79 ಕರೊನಾ ಪ್ರಕರಣಗಳಲ್ಲಿ ಯಾರೊಬ್ಬರಿಗೂ ಇನ್​ಫ್ಲುಯೆಂಜಾ ರೀತಿಯ ಜ್ವರ ಇರಲಿಲ್ಲ ಎಂಬುದು ಆತಂಕಕ್ಕೆ ಕಾರಣವಾಗಿದೆ.

ರಾಜ್ಯ ರಾಜಧಾನಿಗೆ ಮುಂಗಾರು ಕಾಲಿರಿಸಿದ್ದು, ಈ ವಾರ ಸಾಕಷ್ಟು ಮಳೆಯಾಗಿದೆ. ಬದಲಾಗುತ್ತಿರುವ ಋತುಮಾನದಿಂದಾಗಿ ಜ್ವರಪೀಡಿತರ ಸಂಖ್ಯೆ ಹೆಚ್ಚಾಗುತ್ತಿದೆ. ಆದರೂ ಇನ್​ಫ್ಲುಯೆಂಜಾ ರೀತಿಯ ಜ್ವರದಿಂದ ಬಳಲುತ್ತಿರುವವರನ್ನು ಕೋವಿಡ್​-19 ಪರೀಕ್ಷೆಗೂ ಒಳಪಡಿಸುತ್ತಿರುವುದರಿಂದ, ಆತಂಕಪಡುವ ಅವಶ್ಯಕತೆ ಇಲ್ಲ ಎಂದು ವೈದ್ಯರು ಹೇಳುತ್ತಿದ್ದಾರೆ.

ಇದನ್ನೂ ಓದಿ: ಮಗ, ಸೊಸೆಯೊಂದಿಗೆ ಕೊಡಗಿನ ರೆಸಾರ್ಟ್‌ನಲ್ಲಿ ಎಚ್‌ಡಿಕೆ ವಾಸ್ತವ್ಯ

ಮಳೆಗಾಲದಲ್ಲಿ ತಾಪಮಾನ ಕಡಿಮೆಯಾಗುವುದರಿಂದ ಜನರಲ್ಲಿ ನೆಗಡಿ, ಕೆಮ್ಮು ಮತ್ತು ಜ್ವರ ಕಾಣಿಸಿಕೊಳ್ಳುವುದು ಸಾಮಾನ್ಯ. ಇಂಥವರ ಪೈಕಿ ಇನ್​ಫ್ಲುಯೆಂಜಾ ರೀತಿಯ ಜ್ವರ ಇದ್ದರೆ, ಅವರಲ್ಲಿ ರೋಗನಿರೋಧಕ ಶಕ್ತಿ ಕಡಿಮೆಯಾಗಿರುತ್ತದೆ. ಹಾಗಾಗಿ ಅಂಥವರು ಕರೊನಾ ಸೋಂಕಿಗೆ ತುತ್ತಾಗುವ ಸಾಧ್ಯತೆ ಹೆಚ್ಚಾಗಿರುತ್ತದೆ ಎಂದು ಬಿಬಿಎಂಪಿಯ ವಿಶೇಷ ಆಯುಕ್ತ (ಆರೋಗ್ಯ) ಡಾ. ರವಿ ಸೂಪುರ್​ ತಿಳಿಸಿದ್ದಾರೆ.

ಸದ್ಯ ನಗರದಲ್ಲಿ ಅನ್​ಲಾಕ್​ 1.0 ಜಾರಿಯಲ್ಲಿರುವುದರಿಂದ, ಜನರ ಓಡಾಟ ಹೆಚ್ಚಾಗಿದೆ. ಇದರಿಂದಾಗಿ ನೆಗಡಿ, ಕೆಮ್ಮು ಮತ್ತು ಜ್ವರದಿಂದ ಸೋಂಕಿತರಾಗುವುದು ಸಾಮಾನ್ಯ. ಹಾಗೆಂದು ಅನಗತ್ಯವಾಗಿ ಆತಂಕಕ್ಕೆ ಒಳಗಾಗುವುದು ಬೇಡ ಎಂದು ಹೇಳುವ ಮೂಲಕ ಕೆಲ ವೈದ್ಯರು ಆತಂಕ ನಿವಾರಿಸಲು ಪ್ರಯತ್ನಿಸಿದ್ದಾರೆ.

https://www.vijayavani.net/kiccha-sudeep-child-adoption-humanity-work-assistance-to-education/