ಸುಳ್ಯ ನಗರದಲ್ಲಿ ಅನುಷ್ಠಾನ ಆಗುತ್ತಿರುವ ಅಮೃತ್ 2 ಕುಡಿಯುವ ನೀರಿನ ಯೋಜನೆಯ ಕಾಮಗಾರಿ ನಡೆಯುವ ಕಾರಣ ಅಲ್ಲಲ್ಲಿ ರಸ್ತೆ ಬದಿ, ರಸ್ತೆ ಕಡಿದು ಹಾಕಿ ಪೈಪ್ ಅಳವಡಿಕೆ ಮಾಡುವ ಕಾಮಗಾರಿ ನಡೆಸಲಾಗಿದೆ. ರಸ್ತೆ ಬದಿಯ ಚರಂಡಿ, ಕಡಿದು ಹಾಕಿದ ರಸ್ತೆ, ಕಾಂಕ್ರೀಟ್, ಇಂಟರ್ಲಾಕ್ಗಳು ಇನ್ನೂ ಪೂರ್ವ ಸ್ಥಿತಿಗೆ ಬಂದಿಲ್ಲ. ಇದು ಸರಿಪಡಿಸದಿದ್ದಲ್ಲಿ ಮಳೆಗಾಲದಲ್ಲಿ ಪರಿಸ್ಥಿತಿ ಇನ್ನಷ್ಟು ಬಿಗಡಾಯಿಸಬಹುದು. ರಸ್ತೆ ಬದಿ ಹೂತು ಹೋಗಿ ರಸ್ತೆಗಳು, ರಸ್ತೆ ಬದಿ ಕೆಸರುಮಯವಾಗಿ ಸಂಚಾರ ದುಸ್ತರವಾಗುವ ಅಪಾಯ ಇದೆ. ಸುಳ್ಯ ನಗರದ ಬಹುತೇಕ ರಸ್ತೆ ಬದಿ ಈ ರೀತಿ ಅಗೆಯಲಾಗಿದೆ. ಕೆಲವೆಡೆ ರಸ್ತೆ ಮಧ್ಯೆಯೂ ಕಡಿದು ಹಾಕಿ ಪೈಪ್ ಅಳವಡಿಸಲಾಗಿದೆ. ಈ ಕುರಿತು ಒಳಚರಂಡಿ ಮಂಡಳಿ ಇಂಜಿನಿಯರ್ಗಳ ಸಭೆಯನ್ನು ನಗರ ಪಂಚಾಯಿತಿನಲ್ಲಿ ನಡೆಸಲಾಗಿದೆ. ಅಗೆದು ಹಾಕಿದ ರಸ್ತೆಯ ಡಾಮರು, ಕಾಂಕ್ರೀಟ್, ಇಂಟರ್ಲಾಕ್ಗಳನ್ನು ಪೂರ್ವ ಸ್ಥಿತಿಗೆ ತರುವುದಾಗಿ ಇಂಜಿನಿಯರ್ಗಳು ಭರವಸೆ ನೀಡಿದ್ದಾರೆ ಎಂದು ನಗರ ಪಂಚಾಯಿತಿ ಮುಖ್ಯಾಧಿಕಾರಿ ಸುಧಾಕರ ಎಂ.ಎಚ್. ತಿಳಿಸಿದ್ದಾರೆ.
