ವಿಡಿಯೋ: ಹೀಗಿದ್ದರೆ ಕೋವಿಡ್​ ಹರಡದೇ ಇರುತ್ತಾ...? 75 ಸಿಬ್ಬಂದಿ ಸೋಂಕಿಗೊಳಗಾದ ಢಾಬಾದಲ್ಲಿ ಹೌಸ್​ಫುಲ್​ ಶೋ​...!

ನವದೆಹಲಿ: 65 ಸಿಬ್ಬಂದಿ ಕರೊನಾ ಸೋಂಕಿಗೆ ಒಳಗಾಗುವ ಮೂಲಕ ಆತಂಕ ಮೂಡಿಸಿದ್ದ ಹರಿಯಾಣಾದ ಸುಖ್​ದೇವ್​ ಢಾಬಾದ ಸುದ್ದಿ ಇನ್ನೂ ಹಸಿರಾಗಿರುವಾಗಲೇ ಮತ್ತೊಂದು ಢಾಬಾದ 10 ಜನರು ಸೋಂಕಿಗೆ ಒಳಗಾಗಿದ್ದು, ಒಟ್ಟು ಸೋಂಕಿತರ ಸಂಖ್ಯೆ ಈಗ 75ಕ್ಕೆ ಏರಿದಂತಾಗಿದೆ.

ಹರಿಯಾಣಾದ ಸೋನಿಪತ್​ ಮುರ್ಥಾಲ್​ನಲ್ಲಿರುವ ಈ ಅಮ್ರಿಕ್​ ಸುಖ್​ದೇವ್​ ಢಾಬಾ ಭಾರಿ ಪ್ರಸಿದ್ಧಿ ಹೊಂದಿದೆ. ನಿತ್ಯ ಸಾವಿರಾರು ಜನರು ಊಟೋಪಚಾರಕ್ಕಾಗಿ ಇಲ್ಲಿಗೆ ಬರುತ್ತಾರೆ. ಸೋಂಕಿನ ಸುದ್ದಿ ಹರಡುತ್ತಿದ್ದಂತೆ ಇದರ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿವೆ. ಇದನ್ನು ನೋಡಿದರೆ ಇನ್ನೆಷ್ಟು ಜನರಿಗೆ ಕೋವಿಡ್​ ಕಾಣಿಸಿಕೊಂಡಿದೆಯೋ ಎಂಬ ಭೀತಿ ಉಂಟಾಗದೇ ಇರದು.

ಇದನ್ನೂ ಓದಿ; ಹಣ ಕಟ್ಟೋವರೆಗೆ ರೋಗಿಯನ್ನು ನೋಡಲು ಬಿಡಲಿಲ್ಲ; ದುಡ್ಡು ಕೊಟ್ಟ ಮೇಲೆ ಪೇಷೆಂಟ್​ ಈಸ್​ ಡೆಡ್​ ಎಂದ್ರು….!

ಇದೊಂದೇ ಅಲ್ಲ, ದೆಹಲಿ- ಹರಿಯಾಣ ರಾಷ್ಟ್ರೀಯ ಹೆದ್ದಾರಿಗುಂಟ ಇಂಥ ಹಲವು ಢಾಬಾಗಳಿವೆ. ಭಾರಿ ಸಂಖ್ಯೆಯಲ್ಲಿ ಜನರು ಊಟಕ್ಕೆಂದು ಇಲ್ಲಿಗೆ ಬರುತ್ತಾರೆ. ಇಷ್ಟೊಂದು ನಿರ್ಲಕ್ಷ್ಯಕ್ಕೆ ಯಾರು ಕಾರಣ? ಸಿಬ್ಬಂದಿಯೇ, ಅಧಿಕಾರಿಗಳೇ ಅಥವಾ ಗ್ರಾಹಕರೇ ಎಂಬ ಚರ್ಚೆ ಹುಟ್ಟು ಹಾಕಿದೆ.

ಈ ವಿಡಿಯೋಗಳನ್ನು ಸಿಎಂ ಕಚೇರಿ, ಹಿರಿಯ ಅಧಿಕಾರಿಗಳು ಹಾಗೂ ಪೊಲೀಸರ ಟ್ವೀಟರ್​ ಖಾತೆಗೆ ಟ್ಯಾಗ್​ ಮಾಡಲಾಗಿದೆ. ಮಾತ್ರವಲ್ಲ ಪ್ರಧಾನಿ ಕಚೇರಿಗೂ ಟ್ಯಾಗ್​ ಮಾಡಿದ್ದಾರೆ. ವ್ಯಕ್ತಿಗತ ಅಂತರವನ್ನೇ ಕಾಯ್ದುಕೊಳ್ಳದ ಇವರ ಮೇಲೆ ಯಾರೂ ನಿಗಾ ಇಟ್ಟಿಲ್ಲವೇ? ಕೋವಿಡ್​ ಮಾರ್ಗಸೂಚಿಗಳನ್ನೇ ಪಾಲಿಸದ ಇಂಥ ಢಾಬಾ ಹಾಗೂ ಹೋಟೆಲ್​ಗಳಿಗೆ ಅನುಮತಿ ನೀಡಿದ್ದು ಹೇಗೆ ಎಂದು ಎಂದು ಜನರು ಪ್ರಶ್ನಿಸಿದ್ದಾರೆ. ಮುರ್ಥಾಲ್​ ಪ್ರದೇಶ ಊಟೋಪಚಾರಕ್ಕೆ ಭಾರಿ ಖ್ಯಾತವಾಗಿದೆ. ಇಲ್ಲಿನ ಢಾಭಾಗಳಿಗೆ ದೆಹಲಿಯಿಂದಲೇ ಹೆಚ್ಚಿನ ಜನರು ಬರುತ್ತಾರೆ. ಸದ್ಯ ಇವೆರಡೂ ಢಾಬಾಗಳನ್ನು ಬಂದ್​ ಮಾಡಲಾಗಿದೆ.

https://www.vijayavani.net/no-subsidy-on-domestic-lpg/