ಟಿ20 ವಿಶ್ವಕಪ್​ಗೆ ತಂಡ ಪ್ರಕಟಿಸಲು ಗಡುವು ನಿಗದಿಪಡಿಸಿದ ಐಸಿಸಿ

ನವದೆಹಲಿ: ಜೂನ್​ 2ರಿಂದ ಅಮೆರಿಕ&ವೆಸ್ಟ್​ ಇಂಡೀಸ್​ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್​ನಲ್ಲಿ ಪಾಲ್ಗೊಳ್ಳಲಿರುವ ಎಲ್ಲ 20 ದೇಶಗಳು 15 ಆಟಗಾರರ ಅಂತಿಮ ತಂಡವನ್ನು ಪ್ರಕಟಿಸಲು ಮೇ 1ರ ಗಡುವನ್ನು ಐಸಿಸಿ ನಿಗದಿಪಡಿಸಿದೆ. ಬಳಿಕ ಮೇ 25ರವರೆಗೆ ಈ ತಂಡದಲ್ಲಿ ಬದಲಾವಣೆ ಮಾಡಲು ಅವಕಾಶವಿರುತ್ತದೆ. ನಂತರದಲ್ಲಿ ಯಾವುದಾದರೂ ಬದಲಾವಣೆ ಮಾಡಬೇಕಾದರೆ ಐಸಿಸಿ ತಾಂತ್ರಿಕ ಸಮಿತಿಯ ಅನುಮತಿ ಅಗತ್ಯವಾಗಿರುತ್ತದೆ.

ವಿಶ್ವಕಪ್​ ತಂಡ ಅಂತಿಮಗೊಳಿಸಲು ಮೇ 1ರ ಗಡುವಿನಿಂದಾಗಿ ಭಾರತ ತಂಡದ ಆಯ್ಕೆಗೆ ಐಪಿಎಲ್​ನಲ್ಲಿ ಮಾರ್ಚ್​-ಏಪ್ರಿಲ್​ನಲ್ಲಿ ನಡೆಯಲಿರುವ ಪಂದ್ಯಗಳಲ್ಲಿ ಆಟಗಾರರು ತೋರುವ ನಿರ್ವಹಣೆಯೇ ನಿರ್ಣಾಯಕವಾಗಿರುತ್ತದೆ. ಆಯ್ಕೆಗಾರರ ಗಮನಸೆಳೆಯಲು ಐಪಿಎಲ್​ನ ಮೊದಲಾರ್ಧದಲ್ಲೇ ಆಟಗಾರರು ಪ್ರಯತ್ನಿಸಬೇಕಾಗಿದೆ. ಟಿ20 ವಿಶ್ವಕಪ್​ನಲ್ಲಿ ರೋಹಿತ್​ ಶರ್ಮ ಭಾರತ ತಂಡವನ್ನು ಮುನ್ನಡೆಸುವುದನ್ನು ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಕಳೆದ ತಿಂಗಳೇ ಖಚಿತಪಡಿಸಿದ್ದರು. ಭಾರತ ತಂಡ ಜೂನ್​ 5ರಂದು ನ್ಯೂಯಾರ್ಕ್​ನಲ್ಲಿ ಐರ್ಲೆಂಡ್​ ವಿರುದ್ಧ ಆಡುವ ಮೂಲಕ ಅಭಿಯಾನ ಆರಂಭಿಸಲಿದ್ದು, ಜೂನ್​ 9ರಂದು ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ವಿರುದ್ಧ ಹೈವೋಲ್ಟೇಜ್​ ಪಂದ್ಯ ಆಡಲಿದೆ.

ವಿಶ್ವಕಪ್​ಗೆ ಮುನ್ನ ಎಲ್ಲ 20 ತಂಡಗಳು ತಮ್ಮ ಆಗಮನಕ್ಕೆ ತಕ್ಕಂತೆ ತಲಾ 2 ಅಭ್ಯಾಸ ಪಂದ್ಯಗಳನ್ನು ಆಡಲಿವೆ ಎಂದು ಐಸಿಸಿ ತಿಳಿಸಿದೆ. ಟೂರ್ನಿಯ ಬಹುಮಾನ ಮೊತ್ತದ ವಿವರವನ್ನೂ ಐಸಿಸಿ ಶ್ರೀದಲ್ಲೇ ಪ್ರಕಟಿಸುವ ನಿರೀಕ್ಷೆ ಇದೆ.

https://www.vijayavani.net/devadat-padikkal-debut-in-dharamshala-a-chance-to-become-the-25th-kannadigas-to-play-test-for-india