ಧರ್ಮಶಾಲಾದಲ್ಲಿ ದೇವದತ್​ ಪಡಿಕ್ಕಲ್​ ಪದಾರ್ಪಣೆ? ಭಾರತ ಪರ ಟೆಸ್ಟ್​ ಆಡಿದ 25ನೇ ಕನ್ನಡಿಗ ಎನಿಸುವ ಅವಕಾಶ...

ಧರ್ಮಶಾಲಾ: ಪ್ರವಾಸಿ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯ ಮೊದಲ 4 ಪಂದ್ಯಗಳಲ್ಲಿ ಈಗಾಗಲೆ ನಾಲ್ವರು ಯುವ ಆಟಗಾರರು ಪದಾರ್ಪಣೆ ಮಾಡಿದ್ದಾರೆ. ಇದೀಗ ಸರಣಿಯ 5ನೇ ಹಾಗೂ ಕೊನೇ ಪಂದ್ಯದಲ್ಲಿ ಕನ್ನಡಿಗ ದೇವದತ್​ ಪಡಿಕ್ಕಲ್​ ಟೆಸ್ಟ್​ ಪದಾರ್ಪಣೆಯ ಅವಕಾಶ ಪಡೆಯುವ ನಿರೀಕ್ಷೆ ಹರಡಿದೆ. ಅವರು ಧರ್ಮಶಾಲಾದಲ್ಲಿ ಕಣಕ್ಕಿಳಿದರೆ, ಭಾರತ ತಂಡದ ಪರ ಟೆಸ್ಟ್​ ಕ್ರಿಕೆಟ್​ ಆಡಿದ ಕರ್ನಾಟಕದ 25ನೇ ಆಟಗಾರ ಹಾಗೂ ಮೊದಲ ಎಡಗೈ ಬ್ಯಾಟರ್​ ಎನಿಸಿಕೊಳ್ಳಲಿದ್ದಾರೆ.

ಮತ್ತೋರ್ವ ಕನ್ನಡಿಗ ಕೆಎಲ್​ ರಾಹುಲ್​ ಫಿಟ್ನೆಸ್​ ಸಮಸ್ಯೆಯಿಂದಾಗಿ ಸರಣಿಯ 3ನೇ ಟೆಸ್ಟ್​ನಿಂದ ಹೊರಬಿದ್ದಾಗ ಕೆಎಲ್​ ರಾಹುಲ್​ ಭಾರತ ತಂಡ ಸೇರಿಕೊಂಡಿದ್ದರು. ಆದರೆ ಕಳೆದೆರಡು ಪಂದ್ಯಗಳಲ್ಲಿ ಬೆಂಚು ಕಾಯಿಸಿದ್ದರು. ಇದೀಗ ಕೊನೆಗೂ ಸರಣಿಯ ಅಂತಿಮ ಟೆಸ್ಟ್​ನಲ್ಲಿ ಅವರಿಗೆ ಟೆಸ್ಟ್​ ಕ್ಯಾಪ್​ ಒಲಿದುಬರುವ ನಿರೀಕ್ಷೆ ಹೆಚ್ಚಾಗಿದೆ.

ಒಂದೆಡೆ ರಜತ್​ ಪಾಟೀದಾರ್​ ಮಧ್ಯಮ ಕ್ರಮಾಂಕದಲ್ಲಿ ನಿರೀೆಗೆ ತಕ್ಕ ನಿರ್ವಹಣೆ ತೋರಲು ವಿಲರಾಗಿದ್ದಾರೆ. ಕಳೆದ 3 ಟೆಸ್ಟ್​ಗಳಲ್ಲಿ ಆಡಿರುವ ಮಧ್ಯಪ್ರದೇಶದ ಬ್ಯಾಟರ್​ ರಜತ್​ 6 ಇನಿಂಗ್ಸ್​ಗಳಲ್ಲಿ ಕೇವಲ 63 ರನ್​ ಪೇರಿಸಿದ್ದಾರೆ. ಮತ್ತೊಂದೆಡೆ ಕೆಎಲ್​ ರಾಹುಲ್​ ಫಿಟ್ನೆಸ್​ ಸಮಸ್ಯೆಯಿಂದಾಗಿ ಸರಣಿಯ ಕೊನೇ ಟೆಸ್ಟ್​ನಿಂದಲೂ ಹೊರಬಿದ್ದಿದ್ದಾರೆ. ಹೀಗಾಗಿ, ರಜತ್​ ಕೊನೇ ಟೆಸ್ಟ್​ಗೆ ತಂಡದಲ್ಲಿ ಸ್ಥಾನ ಉಳಿಸಿಕೊಂಡಿದ್ದರೂ, ಆಡುವ 11ರ ಬಳಗದಲ್ಲಿ ಪಡಿಕ್ಕಲ್​ಗೆ ಅದೃಷ್ಟ ಒಲಿದುಬರಲಿದೆ ಎನ್ನಲಾಗಿದೆ.

ಕೆಎಲ್​ ರಾಹುಲ್​ ಒಂದು ವೇಳೆ ಫಿಟ್​ ಆಗಿದ್ದರೆ, ರಜತ್​ ಪಾಟೀದಾರ್​ರನ್ನು ರಣಜಿ ಟ್ರೋಫಿ ಸೆಮಿಫೈನಲ್​ನಲ್ಲಿ ಮಧ್ಯಪ್ರದೇಶ ಪರ ಆಡಲು ಭಾರತ ತಂಡ ಬಿಟ್ಟುಕೊಡುವ ಸಾಧ್ಯತೆ ಇತ್ತು. ಇದೀಗ ರಾಹುಲ್​ ಅಲಭ್ಯತೆಯಿಂದ ರಜತ್​ ಭಾರತ ತಂಡದಲ್ಲೇ ಉಳಿಯಲಿದ್ದಾರೆ. ಆದರೆ ಇದು ರಜತ್​ಗೆ ಕೊನೇ ಟೆಸ್ಟ್​ನಲ್ಲೂ ಆಡುವ ಅವಕಾಶದ ಗ್ಯಾರಂಟಿ ನೀಡುವುದಿಲ್ಲ. ಪ್ರಮುಖವಾಗಿ ಸ್ಪಿನ್ನರ್​ಗಳ ವಿರುದ್ಧವೇ ಕೆಟ್ಟ ಹೊಡೆತಗಳನ್ನು ಆಡಿ ಔಟಾಗುತ್ತಿರುವುದು ರಜತ್​ಗೆ ಹಿನ್ನಡೆಯಾಗಿದೆ.

23 ವರ್ಷದ ದೇವದತ್​ ಪಡಿಕ್ಕಲ್​ ಪ್ರಸಕ್ತ ಭರ್ಜರಿ ಫಾರ್ಮ್​ನಲ್ಲಿದ್ದು, ರಣಜಿಯಲ್ಲಿ ಕರ್ನಾಟಕ ಪರ ಆಡಿದ 4 ಪಂದ್ಯಗಳಲ್ಲಿ 3 ಶತಕಗಳ ಸಹಿತ 556 ರನ್​ ಗಳಿಸಿ ಉತ್ತಮ ಲಯದಲ್ಲಿದ್ದರು. ಇಂಗ್ಲೆಂಡ್​ ಲಯನ್ಸ್​ ವಿರುದ್ಧದ 2ನೇ ಚತುರ್ದಿನ ಟೆಸ್ಟ್​ನಲ್ಲಿ ಶತಕ ಸಿಡಿಸಿದ್ದರು. ಹೀಗಾಗಿ ಐಪಿಎಲ್​ಗೆ ಮುನ್ನ ಭಾರತ ತಂಡ ಆಡಲಿರುವ ಕೊನೇ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಪಡಿಕ್ಕಲ್​ಗೆ ಆಡುವ ಅವಕಾಶ ಕಲ್ಪಿಸುವ ಬಗ್ಗೆ ಬಿಸಿಸಿಐ ಮೂಲಗಳು ಮಾಹಿತಿ ನೀಡಿವೆ.

ಇದುವರೆಗೆ 31 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿರುವ ಪಡಿಕ್ಕಲ್​ 44.54ರ ಸರಾಸರಿಯಲ್ಲಿ 6 ಶತಕ, 12 ಅರ್ಧಶತಕಗಳ ಸಹಿತ 2,227 ರನ್​ ಬಾರಿಸಿದ್ದಾರೆ. ಪಡಿಕ್ಕಲ್​ ಗೈರಿನ ನಡುವೆ ಇತ್ತ ಕರ್ನಾಟಕ ತಂಡ ರಣಜಿ ಕ್ವಾರ್ಟರ್​ಫೈನಲ್​ನಲ್ಲಿ ಮುಗ್ಗರಿಸಿದೆ. ಅತ್ತ ಭಾರತ ತಂಡದಲ್ಲಿ ಬೆಂಚು ಕಾಯಿಸುತ್ತ ಬಂದಿರುವ ಪಡಿಕ್ಕಲ್​ "ಇಲ್ಲೂ ಆಡದೆ, ಅಲ್ಲೂ ಆಡಲು ಸಿಗದೆ' ವ್ಯರ್ಥವಾಗಬಾರದು.

ರಾಹುಲ್​ ಔಟ್​, ಬುಮ್ರಾ ಇನ್​

ಪ್ರವಾಸಿ ಇಂಗ್ಲೆಂಡ್​ ವಿರುದ್ಧ ಮಾರ್ಚ್​ 7ರಿಂದ ಧರ್ಮಶಾಲಾದಲ್ಲಿ ನಡೆಯಲಿರುವ 5ನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯಕ್ಕೆ ಬಿಸಿಸಿಐ ಗುರುವಾರ ಭಾರತದ 16 ಆಟಗಾರರ ತಂಡವನ್ನು ಅಂತಿಮಗೊಳಿಸಿದೆ. ಇದರನ್ವಯ ಕನ್ನಡಿಗ ಕೆಎಲ್​ ರಾಹುಲ್​ ಅಂತಿಮ ಟೆಸ್ಟ್​ಗೂ ಅಲಭ್ಯರಾಗಿರುವುದು ಅಧಿಕೃತಗೊಂಡಿದ್ದರೆ, ವೇಗಿ ಜಸ್​ಪ್ರೀತ್​ ಬುಮ್ರಾ 4ನೇ ಪಂದ್ಯದ ವಿಶ್ರಾಂತಿಯ ಬಳಿಕ ಮತ್ತೆ ತಂಡಕ್ಕೆ ಮರಳಿದ್ದಾರೆ. ರಾಹುಲ್​ ಸರಣಿಯ ಮೊದಲ ಟೆಸ್ಟ್​ನಲ್ಲಿ ಮಾತ್ರ ಆಡಿದ್ದರು. ಬಳಿಕ ಬಲತೊಡೆಯ ಸ್ನಾಯುನೋವು ಅನುಭವಿಸುತ್ತಿರುವ ರಾಹುಲ್​, ಹೆಚ್ಚಿನ ಪರೀಕ್ಷೆಗಾಗಿ ಲಂಡನ್​ಗೆ ಪ್ರಯಾಣಿಸಿದ್ದಾರೆ.

5ನೇ ಟೆಸ್ಟ್​ಗೆ ಭಾರತ ತಂಡ: ರೋಹಿತ್​ ಶರ್ಮ (ನಾಯಕ), ಜಸ್​ಪ್ರೀತ್​ ಬುಮ್ರಾ (ಉಪನಾಯಕ), ಯಶಸ್ವಿ ಜೈಸ್ವಾಲ್​, ಶುಭಮಾನ್​ ಗಿಲ್​, ರಜತ್​ ಪಾಟೀದಾರ್​, ಸ್ರಾರ್ಜ್​ ಖಾನ್​, ಧ್ರುವ ಜುರೆಲ್​ (ವಿ.ಕೀ), ಕೆಎಸ್​ ಭರತ್​ (ವಿ.ಕೀ), ದೇವದತ್​ ಪಡಿಕ್ಕಲ್​, ಆರ್​. ಅಶ್ವಿನ್​, ರವೀಂದ್ರ ಜಡೇಜಾ, ಅಕ್ಷರ್​ ಪಟೇಲ್​, ಕುಲದೀಪ್​ ಯಾದವ್​, ಮೊಹಮದ್​ ಸಿರಾಜ್​, ಮುಕೇಶ್​ ಕುಮಾರ್​, ಆಕಾಶ್​ ದೀಪ್​.

ರಣಜಿ ಸೆಮೀಸ್​ಗೆ ವಾಷಿಂಗ್ಟನ್​

ಸ್ಪಿನ್​ ಬೌಲಿಂಗ್​ ಆಲ್ರೌಂಡರ್​ ವಾಷಿಂಗ್ಟನ್​ ಸುಂದರ್​ರನ್ನು ರಣಜಿ ಟ್ರೋಫಿ ಸೆಮಿಫೈನಲ್​ನಲ್ಲಿ ತಮಿಳುನಾಡು ಪರ ಆಡಲು ಭಾರತ ತಂಡದಿಂದ ಬಿಡುಗಡೆಗೊಳಿಸಲಾಗಿದೆ. ಮಾರ್ಚ್​ 2ರಿಂದ ಮುಂಬೈನಲ್ಲಿ ರಣಜಿ ಸೆಮೀಸ್​ ನಡೆಯಲಿದ್ದು, ಮಾರ್ಚ್​ 6 ಅಥವಾ ಅದಕ್ಕಿಂತ ಮುನ್ನ ಈ ಪಂದ್ಯ ಮುಗಿದ ನಂತರ ಅಗತ್ಯಬಿದ್ದರೆ ವಾಷಿಂಗ್ಟನ್​ ಭಾರತ ತಂಡವನ್ನು ಕೂಡಿಕೊಳ್ಳಲಿದ್ದಾರೆ ಎಂದು ಬಿಸಿಸಿಐ ತಿಳಿಸಿದೆ.

https://www.vijayavani.net/javelin-has-a-new-star-19-year-old-max-dehning-becomes-youngest-man-to-throw-90m