ಹೈದರಾಬಾದ್: ಕೆಜಿಎಫ್ ಖ್ಯಾತಿಯ ಸ್ಟಾರ್ ನಿರ್ದೇಶಕ ಪ್ರಶಾಂತ್ ನೀಲ್ ನಿರ್ದೇಶನದ ಹಾಗೂ ನಟ ಪ್ರಭಾಸ್ ಅಭಿನಯದ “ಸಲಾರ್” ಸಿನಿಮಾ ಡಿ.22ರಂದು ಅದ್ಧೂರಿಯಾಗಿ ತೆರೆಗೆ ಅಪ್ಪಳಿಸಲಿದೆ. ಚಿತ್ರ ಬಿಡುಗಡೆಗೆ ಇನ್ನೂ ಎರಡೇ ದಿನ ಬಾಕಿ ಇದೆ, ಈ ಚಿತ್ರದಲ್ಲಿ ನಟಿ ಶ್ರುತಿ ಹಾಸನ್ ನಾಯಕಿಯಾಗಿ ನಟಿಸಿರುವುದು ಎಲ್ಲರಿಗೂ ಗೊತ್ತಿದೆ. ಸೂಪರ್ ಸ್ಟಾರ್ ಕಮಲ್ ಹಾಸನ್ ಮಗಳಾದರೂ ಜೀವನದಲ್ಲಿ ಸಾಕಷ್ಟು ಏರಿಳಿತ ಕಂಡಿರುವ ಶ್ರುತಿ ಇದೀಗ ತಮ್ಮ ಜೀವನದ ಕಹಿ ಘಟನೆಯೊಂದನ್ನು ಹಂಚಿಕೊಂಡಿದ್ದಾರೆ.
ಸಲಾರ್ ಬಿಡುಗಡೆ ಹಿನ್ನೆಲೆಯಲ್ಲಿ ಇತ್ತೀಚೆಗೆ ಮಾಧ್ಯಮ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಶ್ರುತಿ, ತಾನು ಮದ್ಯ ವ್ಯಸನದಿಂದ ಹೊರ ಬಂದಿರುವುದಾಗಿ ತಿಳಿಸಿದ್ದಾರೆ.
ನನ್ನ ಜೀವನದಲ್ಲಿ ಸುಮಾರು 8 ವರ್ಷಗಳ ಕಾಲ ಮದ್ಯದ ದಾಸಳಾಗಿದ್ದೆ. ಪಾರ್ಟಿ ಸಂದರ್ಭಗಳಲ್ಲಿ ನೀವು ಪಾನಮತ್ತರಾಗಿರದಿದ್ದರೆ ಅಲ್ಲಿನ ಜನರನ್ನು ಸಹಿಸಿಕೊಳ್ಳುವುದು ತುಂಬಾನೇ ಕಷ್ಟ. ನಾನು ಯಾವಾಗಲೂ ಹ್ಯಾಂಗ್ಓವರ್ನಲ್ಲಿ ಇರುತ್ತಿದ್ದೆ. ನನ್ನ ಫ್ರೆಂಡ್ಸ್ ಜತೆ ಸದಾ ಕುಡಿಯಲು ಬಯಸುತ್ತಿದ್ದೆ. ಆಲ್ಕೋಹಾಲ್ ನನ್ನನ್ನು ತುಂಬಾ ಕಂಟ್ರೋಲ್ ಮಾಡುತ್ತಿದೆ ಅಂತ ಅನಿಸುತ್ತಿತ್ತು. ಆದರೆ, ನಾನೆಂದಿಗೂ ಡ್ರಗ್ಸ್ ಸಹವಾಸ ಮಾಡಿಲ್ಲ. ಆಲ್ಕೋಹಾಲ್ಗೆ ಮಾತ್ರ ದಾಸಳಾಗಿದ್ದೆ. ಆದರೆ ನಾನೀಗ ಚೇತರಿಸಿಕೊಂಡಿದ್ದೇನೆ ಎಂದು ಶ್ರುತಿ ಹಾಸನ್ ಹೇಳಿಕೊಂಡಿದ್ದಾರೆ.
ಇನ್ನೂ ಸಿನಿಮಾ ವಿಚಾರಕ್ಕೆ ಬಂದರೆ, ಡಿ.22ರಂದು ಬಿಡಗಡೆಯಾಗಲಿರುವ ಸಲಾರ್ ಭಾಗ 1ರಲ್ಲಿ ಶ್ರುತಿ, ಪ್ರಭಾಸ್ಗೆ ನಾಯಕಿಯಾಗಿದ್ದಾರೆ. ನಟ ಜಗಪತಿ ಬಾಬು, ಈಶ್ವರಿ ರಾವ್, ಶ್ರಿಯಾ ರೆಡ್ಡಿ, ಪೃಥ್ವಿರಾಜ್ ಸುಕುಮಾರ್ ಮತ್ತು ತಿನ್ನು ಆನಂದ್ ಸೇರಿದಂತೆ ಬಹುತಾರಾಗಣವೇ ಈ ಚಿತ್ರದಲ್ಲಿದೆ. ದೊಡ್ಡ ಬಜೆಟಿನ ಚಿತ್ರವಾಗಿದ್ದು, ಕೆಜಿಎಫ್ ನಿರ್ಮಾಣ ಮಾಡಿದ್ದ ಹೊಂಬಾಳೆ ಫಿಲ್ಮ್ಸ್ ಈ ಸಿನಿಮಾವನ್ನು ನಿರ್ಮಿಸಿದೆ. ರವಿ ಬಸ್ರೂರ್ ಅವರೇ ಸಲಾರ್ಗೂ ಸಂಗೀತ ನೀಡಿದ್ದಾರೆ.
ಇದಿಷ್ಟೇ ಅಲ್ಲದೆ, ಅಡಿವಿ ಶೇಷ ನಟನೆಯ ಪ್ಯಾನ್ ಇಂಡಿಯಾ ಸಿನಿಮಾಗೆ ಶ್ರುತಿ ಸಹಿ ಮಾಡಿದ್ದಾರೆ ಎಂದು ಸಿನಿ ಮೂಲಗಳು ತಿಳಿಸಿವೆ. ಆದರೆ, ಈ ಸಿನಿಮಾ ಟೈಟಲ್ ಇನ್ನೂ ಘೋಷಣೆಯಾಗಿಲ್ಲ. ಮೇಜರ್ ಬಳಿಕ ಅಡಿವಿ ಶೇಷ ಅವರ ಎರಡನೇ ಹಿಂದಿ ಸಿನಿಮಾ ಇದಾಗಿರಲಿದೆ ಎಂದು ಹೇಳಲಾಗುತ್ತಿದೆ. ಇದಲ್ಲದೆ, ದಿ ಐ ಹೆಸರಿನ ಹಾಲಿವುಡ್ ಸಿನಿಮಾದಲ್ಲೂ ಶ್ರುತಿ ನಟಿಸುತ್ತಿದ್ದಾರೆ ಎಂದು ಕೇಳಿಬಂದಿದೆ. (ಏಜೆನ್ಸೀಸ್)
ಮಾಸ್ ಅಂತ ಬಂದಾಗ ಪ್ರಭಾಸ್ ಅವರೇ… ಸಲಾರ್ ಚಿತ್ರದ ಮೊದಲ ವಿಮರ್ಶೆ ಹೀಗಿದೆ ನೋಡಿ…