ಬೆಳಗಿನ ಮೊದಲ ಕಪ್ ಕಾಫಿ: ಇದು ಚೈತನ್ಯ ನೀಡುತ್ತದೋ ಅಥವಾ ಆರೋಗ್ಯ ಕೆಡಿಸುತ್ತದೋ? | Coffee

ಕಾಫಿಯು ನೈಸರ್ಗಿಕವಾಗಿ ಆಮ್ಲೀಯ ಗುಣವನ್ನು ಹೊಂದಿದೆ. ಖಾಲಿ ಹೊಟ್ಟೆಯಲ್ಲಿ ಇದನ್ನು ಕುಡಿದಾಗ, ಇದು ಹೊಟ್ಟೆಯಲ್ಲಿ ಹೈಡ್ರೋಕ್ಲೋರಿಕ್ ಆಮ್ಲದ (HCl) ಉತ್ಪಾದನೆಯನ್ನು ಪ್ರಚೋದಿಸುತ್ತದೆ. ಹೊಟ್ಟೆಯಲ್ಲಿ ಆಹಾರವಿಲ್ಲದಿದ್ದಾಗ ಈ ಆಮ್ಲವು ಉತ್ಪತ್ತಿಯಾದರೆ, ಅದು ಹೊಟ್ಟೆಯ ಒಳಪದರಕ್ಕೆ ಹಾನಿ ಮಾಡಬಹುದು. ಇದರಿಂದ ಎದೆಯುರಿ (Heartburn), ಅಜೀರ್ಣ ಮತ್ತು ಗ್ಯಾಸ್ಟ್ರಿಕ್ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.

ಬೆಳಿಗ್ಗೆ ನಾವು ಎದ್ದಾಗ ದೇಹವು ನೈಸರ್ಗಿಕವಾಗಿ 'ಕಾರ್ಟಿಸೋಲ್' ಎಂಬ ಹಾರ್ಮೋನ್ ಅನ್ನು ಬಿಡುಗಡೆ ಮಾಡುತ್ತದೆ. ಇದನ್ನು 'ಸ್ಟ್ರೆಸ್ ಹಾರ್ಮೋನ್' ಎಂದು ಕರೆಯಲಾಗುತ್ತದೆ, ಇದು ನಮಗೆ ಎಚ್ಚರವಾಗಲು ಮತ್ತು ಶಕ್ತಿ ಪಡೆಯಲು ಸಹಾಯ ಮಾಡುತ್ತದೆ. ಖಾಲಿ ಹೊಟ್ಟೆಯಲ್ಲಿ ಕೆಫೀನ್ ಸೇವಿಸುವುದರಿಂದ ಈ ಹಾರ್ಮೋನ್ ಉತ್ಪಾದನೆಗೆ ಅಡ್ಡಿಯಾಗಬಹುದು ಅಥವಾ ಅತಿಯಾಗಿ ಹೆಚ್ಚಾಗಬಹುದು. ಇದು ನಿಮ್ಮನ್ನು ಹೆಚ್ಚು ಆತಂಕಕ್ಕೆ (Anxiety) ಅಥವಾ ಒತ್ತಡಕ್ಕೆ ದೂಡಬಹುದು.

ಕೆಲವು ಸಂಶೋಧನೆಗಳ ಪ್ರಕಾರ, ಉಪಾಹಾರಕ್ಕೆ ಮೊದಲು ಕಪ್ಪು ಕಾಫಿ ಕುಡಿಯುವುದು ದೇಹದ ಇನ್ಸುಲಿನ್ ಪ್ರತಿಕ್ರಿಯೆಯನ್ನು ಶೇ. 50 ರಷ್ಟು ಕಡಿಮೆ ಮಾಡುತ್ತದೆ. ಅಂದರೆ, ಕಾಫಿ ಕುಡಿದ ನಂತರ ನೀವು ಸೇವಿಸುವ ಆಹಾರದಿಂದ ಬರುವ ಸಕ್ಕರೆಯನ್ನು ನಿಯಂತ್ರಿಸಲು ದೇಹಕ್ಕೆ ಕಷ್ಟವಾಗಬಹುದು. ಇದು ದೀರ್ಘಕಾಲದವರೆಗೆ ಮುಂದುವರಿದರೆ ರಕ್ತದಲ್ಲಿನ ಸಕ್ಕರೆ ಮಟ್ಟ ಏರುಪೇರಾಗಬಹುದು.

ಕಾಫಿಯಲ್ಲಿರುವ ಕೆಫೀನ್ ದೇಹವು ಕಬ್ಬಿಣಾಂಶ, ಕ್ಯಾಲ್ಸಿಯಂ ಮತ್ತು ಮೆಗ್ನೀಸಿಯಮ್‌ನಂತಹ ಪ್ರಮುಖ ಖನಿಜಗಳನ್ನು ಹೀರಿಕೊಳ್ಳುವ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತದೆ. ಖಾಲಿ ಹೊಟ್ಟೆಯಲ್ಲಿ ಇದನ್ನು ಸೇವಿಸಿದಾಗ ಈ ಪರಿಣಾಮ ಇನ್ನೂ ಹೆಚ್ಚಾಗಿರುತ್ತದೆ.

ನೀರು ಕುಡಿಯಿರಿ: ಕಾಫಿ ಕುಡಿಯುವ ಮೊದಲು ಕನಿಷ್ಠ ಒಂದು ಲೋಟ ನೀರು ಕುಡಿಯುವುದು ಉತ್ತಮ. ಇದು ಕಾಫಿಯ ಆಮ್ಲೀಯತೆಯನ್ನು ಕಡಿಮೆ ಮಾಡುತ್ತದೆ.

ಸ್ವಲ್ಪ ಆಹಾರ ಸೇವಿಸಿ: ಬಿಸ್ಕತ್ತು, ಹಣ್ಣು ಅಥವಾ ಪ್ರೋಟೀನ್ ಯುಕ್ತ ಉಪಾಹಾರದ ನಂತರ ಕಾಫಿ ಕುಡಿಯುವುದು ಜೀರ್ಣಕ್ರಿಯೆಗೆ ಒಳ್ಳೆಯದು.

ಹಾಲು ಸೇರಿಸಿ: ನಿಮಗೆ ಕಪ್ಪು ಕಾಫಿ (Black Coffee) ಕುಡಿಯುವ ಅಭ್ಯಾಸವಿದ್ದರೆ, ಅದಕ್ಕೆ ಸ್ವಲ್ಪ ಹಾಲು ಸೇರಿಸುವುದರಿಂದ ಆಮ್ಲೀಯತೆಯ ಪರಿಣಾಮವನ್ನು ಸ್ವಲ್ಪ ಮಟ್ಟಿಗೆ ತಗ್ಗಿಸಬಹುದು,(ಏಜೆನ್ಸೀಸ್​).