ಮುಂಬೈನಲ್ಲಿ 10 ಲಕ್ಷ ರೂ. ಮೂಲಬೆಲೆಯೊಂದಿಗೆ ಶುರುವಾಗಿತ್ತು ಹಾರ್ದಿಕ್​ ಪಾಂಡ್ಯ ಜರ್ನಿ! ಈಗಿನ ಮೌಲ್ಯವೆಷ್ಟು ಗೊತ್ತೇ?

ಬೆಂಗಳೂರು: ಕಳೆದೊಂದು ವಾರದಿಂದ ಹರಡಿದ್ದ ಎಲ್ಲ ಗೊಂದಲಗಳಿಗೆ ಸೋಮವಾರ ತೆರೆಬಿದ್ದಿದ್ದು, ಸ್ಟಾರ್​ ಆಲ್ರೌಂಡರ್​ ಹಾರ್ದಿಕ್​ ಪಾಂಡ್ಯ ಮುಂಬೈ ಇಂಡಿಯನ್ಸ್​ ತಂಡಕ್ಕೆ ಅಧಿಕೃತವಾಗಿ ಮರಳಿದ್ದಾರೆ. ಹಾರ್ದಿಕ್​ರನ್ನು ಮುಂಬೈಗೆ ವರ್ಗಾವಣೆ ಮಾಡಿದ ಬೆನ್ನಲ್ಲೇ ಗುಜರಾತ್​ ಟೈಟಾನ್ಸ್​ ತಂಡಕ್ಕೆ ಯುವ ಆರಂಭಿಕ ಶುಭಮಾನ್​ ಗಿಲ್​ ಹೊಸ ನಾಯಕರಾಗಿ ನೇಮಕಗೊಂಡಿದ್ದಾರೆ. ಇದೇ ವೇಳೆ ಆಸ್ಟ್ರೆಲಿಯಾದ ಯುವ ಆಲ್ರೌಂಡರ್​ ಕ್ಯಾಮರಾನ್​ ಗ್ರೀನ್​ ಮುಂಬೈನಿಂದ ಆರ್​ಸಿಬಿ ತಂಡಕ್ಕೆ ವರ್ಗಾವಣೆಯೂ ಖಚಿತಗೊಂಡಿದೆ.

ಹಾರ್ದಿಕ್​ ವರ್ಗಾವಣೆಗಾಗಿ ಗುಜರಾತ್​ ತಂಡ ಮುಂಬೈನಿಂದ 15 ಕೋಟಿ ರೂ. ಮೊತ್ತವನ್ನು ಪಡೆದುಕೊಂಡಿದ್ದು, ಈ ವರ್ಗಾವಣೆ ಸಂಪೂರ್ಣವಾಗಿ ನಗದು ಒಪ್ಪಂದದ ಮೂಲಕವೇ ನಡೆದಿದೆ. ಇದೇ ವೇಳೆ ಗುಜರಾತ್​ ತಂಡಕ್ಕೆ ವರ್ಗಾವಣೆ ಶುಲ್ಕವೂ ಪಾವತಿಯಾಗಲಿದ್ದು, ಈ ಮೊತ್ತ ಎಷ್ಟೆಂದು ಬಹಿರಂಗಪಡಿಸಲಾಗಿಲ್ಲ. ಈ ಮೊತ್ತದಲ್ಲಿ ಶೇ.50 ಪಾಲು ಹಾರ್ದಿಕ್​ ಪಾಂಡ್ಯಗೂ ಸಿಗಲಿದೆ.

"ಗುಜರಾತ್​ ಟೈಟಾನ್ಸ್​ ತಂಡದ ಮೊದಲ ನಾಯಕನಾಗಿ ಹಾರ್ದಿಕ್​ ಪಾಂಡ್ಯ ತಂಡಕ್ಕೆ ಎರಡೂ ಆವೃತ್ತಿಯಲ್ಲಿ ಉತ್ತಮ ನಿರ್ವಹಣೆ ತೋರಲು ನೆರವಾಗಿದ್ದಾರೆ. ಒಂದರಲ್ಲಿ ತಂಡ ಚಾಂಪಿಯನ್​ ಆಗಿದ್ದರೆ, ಮತ್ತೊಂದರಲ್ಲಿ ಫೈನಲ್​ಗೇರಿತ್ತು' ಎಂದು ಗುಜರಾತ್​ ತಂಡದ ನಿರ್ದೇಶಕ ವಿಕ್ರಮ್​ ಸೋಲಂಕಿ ತಿಳಿಸಿದ್ದಾರೆ.

ಈ ಮುನ್ನ 2015ರಿಂದ 2021ರವರೆಗೆ 7 ವರ್ಷಗಳ ಕಾಲ ಮುಂಬೈ ತಂಡದ ಭಾಗವಾಗಿದ್ದ ಹಾರ್ದಿಕ್​, 4 ಬಾರಿ ಪ್ರಶಸ್ತಿ ಗೆಲುವು ಕಂಡಿದ್ದರು. ಮುಂಬೈ ತಂಡದ ಪ್ರತಿಭಾನ್ವೇಷಣೆಯಲ್ಲಿ ಬೆಳಕಿಗೆ ಬಂದಿದ್ದ ಹಾರ್ದಿಕ್​, 2015ರ ಹರಾಜಿನಲ್ಲಿ ಮೊದಲ ಬಾರಿಗೆ ಕೇವಲ 10 ಲಕ್ಷ ರೂ. ಮೂಲಬೆಲೆಗೆ ಮುಂಬೈ ತಂಡವನ್ನು ಕೂಡಿಕೊಂಡಿದ್ದರು. 2022ರ ಆವೃತ್ತಿಗೆ ಮುನ್ನ ಎಲ್ಲ ತಂಡಗಳಿಗೆ ಗರಿಷ್ಠ 4 ಆಟಗಾರರನ್ನಷ್ಟೇ ರಿಟೇನ್​ ಮಾಡಿಕೊಳ್ಳಲು ಅವಕಾಶ ನೀಡಲಾಗಿತ್ತು. ಆಗ ರೋಹಿತ್​ ಶರ್ಮ, ಬುಮ್ರಾ, ಸೂರ್ಯಕುಮಾರ್​, ಪೊಲ್ಲಾರ್ಡ್​ರನ್ನು ಉಳಿಸಿಕೊಂಡಿದ್ದ ಮುಂಬೈ, ಹಾರ್ದಿಕ್​ರನ್ನು ಮೆಗಾ ಹರಾಜಿಗೆ ಬಿಟ್ಟುಕೊಟ್ಟಿತ್ತು. ಆದರೆ ಆಗ ಹೊಸದಾಗಿ ಸೇರ್ಪಡೆಗೊಂಡಿದ್ದ ಗುಜರಾತ್​ ತಂಡ ಹರಾಜಿಗೆ ಮೊದಲೇ (ಬಿಸಿಸಿಐ ನಿಯಮದನ್ವಯ) ಹಾರ್ದಿಕ್​ರನ್ನು ತನ್ನತ್ತ ಸೆಳೆದುಕೊಂಡಿತ್ತು.

ಭಾನುವಾರ ಆಟಗಾರರ ರಿಟೇನ್​ ಪಟ್ಟಿ ಪ್ರಕಟಿಸಿದ ಬಳಿಕ ಮುಂಬೈ ತಂಡ, ಒಟ್ಟು 100 ಕೋಟಿ ರೂ. ಬಜೆಟ್​ನಲ್ಲಿ ಕೇವಲ 15.25 ಕೋಟಿ ರೂ. ಉಳಿಸಿಕೊಂಡಿತ್ತು. ಆದರೆ ಈಗ 15 ಕೋಟಿ ರೂ.ಗೆ ಹಾರ್ದಿಕ್​ರನ್ನು ಸೆಳೆದರೂ, ಗ್ರೀನ್​ ವರ್ಗಾವಣೆಯಿಂದ ಮುಂಬೈ ಬಳಿಕ 17.75 ಕೋಟಿ ರೂ. ಉಳಿದಿದೆ. ಇತ್ತ ಆರ್​ಸಿಬಿ ತಂಡದ ಉಳಿಕೆ ಬಜೆಟ್​ 40.75ರಿಂದ 23.25 ಕೋಟಿ ರೂ.ಗೆ ಇಳಿದಿದೆ. ತಂಡಗಳು ಈ ಉಳಿಕೆ ಮೊತ್ತವನ್ನು ಮುಂಬರುವ ಹರಾಜಿನಲ್ಲಿ ಹೊಸ ಆಟಗಾರರ ಖರೀದಿಗೆ ವಿನಿಯೋಗಿಸಲು ಅವಕಾಶವಿದೆ.

ಎಲ್ಲ 10 ತಂಡಗಳಿಗೆ ಡಿಸೆಂಬರ್​ 12ರವರೆಗೆ ಆಟಗಾರರ ವರ್ಗಾವಣೆ ಇನ್ನೂ ಅವಕಾಶವಿದ್ದು, ಡಿಸೆಂಬರ್​ 19ರಂದು ದುಬೈನಲ್ಲಿ ಈ ಸಲದ ಹರಾಜು ಪ್ರಕ್ರಿಯೆ ನಡೆಯಲಿದೆ. ಐಪಿಎಲ್​ ಇತಿಹಾಸದಲ್ಲಿ ಮೊದಲ ಬಾರಿಗೆ ವಿದೇಶಿ ನೆಲದಲ್ಲಿ ಹರಾಜು ಪ್ರಕ್ರಿಯೆ ನಿಗದಿಯಾಗಿದೆ.

https://www.vijayavani.net/karnataka-players-retain-and-release-details-on-ipl-teams