ಆದರೆ ಕುವೆಂಪು ಈ ನೋಟಿಸ್ಗೆ ಜಗ್ಗಲೂ ಇಲ್ಲ, ಬಗ್ಗಲೂ ಇಲ್ಲ. ಸರ್ಕಾರದ ಕ್ರಮಕ್ಕೆ ತಿರುಗೇಟು ಎಂಬಂತೆ ಒಂದು ಕವನ ಬರೆದು ಪ್ರಕಟಿಸಿದರು. ‘‘ಇಂದು ಬಂದು ನಾಳೆ ಸಂದು ಹೋಹ ಸಚಿವ ಮಂಡಲ...’’ ಎಂಬ ವಾಕ್ಯ ಅದರಲ್ಲಿತ್ತು. ಆ ಕವನ ಅತ್ಯಲ್ಪ ಕಾಲದಲ್ಲೇ ಜನಪ್ರಿಯವೂ ಆಯಿತು. ಸರ್ಕಾರದ ಮಂತ್ರಿಮಂಡಲವನ್ನೇ ಟೀಕಿಸುವ ಆ ಕವನದಿಂದ ಮತ್ತಷ್ಟು ಕ್ರುದ್ಧರಾದ ಕೆಲವು ಕಾಂಗ್ರೆಸ್ಸಿಗರು ಮುಖ್ಯಮಂತ್ರಿ ಕೆ.ಸಿ. ರೆಡ್ಡಿ ಅವರಿಗೆ ದೂರು ಒಯ್ದರು. ಕುವೆಂಪು ಅವರಿಗೆ ಮತ್ತೊಂದು ನೋಟಿಸ್ ನೀಡಿ ಕಠಿಣ ವಿಚಾರಣೆಗೆ ಒಳಪಡಿಸಬೇಕೆಂದು ಆಗ್ರಹಿಸಿದರು. ಆದರೆ ಅದಕ್ಕೆ ಕೆ.ಸಿ. ರೆಡ್ಡಿ ಒಪ್ಪಲಿಲ್ಲ. ‘‘ಇನ್ನೊಂದು ನೋಟಿಸ್ ನೀಡಿದರೆ ಕುವೆಂಪು ಮತ್ತೆ ಮೂರು ಕವನ ಬರೆದು ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸುತ್ತಾರೆ’’ ಎಂದು ಕೆ.ಸಿ. ರೆಡ್ಡಿ ಹೇಳಿ ಅವರನ್ನೆಲ್ಲ ವಾಪಸ್ ಕಳಿಸಿದರು. ಹಂಪನಾ ಅವರನ್ನು ವಿಚಾರಣೆಗೆ ಒಳಪಡಿಸಿದ ಘಟನೆ ಚರ್ಚೆಗೆ ಒಳಗಾಗುತ್ತಿರುವ ಈ ಸಂದರ್ಭದಲ್ಲಿ ಕುವೆಂಪು ಅವರ ಕಾಲದ ಆ ಘಟನೆಯನ್ನು ಹಿರಿಯ ಸಾಹಿತಿಗಳು ಈಗ ನೆನಪಿಸಿಕೊಳ್ಳುತ್ತಿದ್ದಾರೆ.
