ಬೆಂಗಳೂರು ಮೂಲದ ಕ್ಯಾನ್ಫಿನ್ ಹೋಮ್ಸ್ ಲಿಮಿಟೆಡ್ನ ಡಿಜಿಎಂ ಪ್ರಶಾಂತ ಜೋಶಿ ಒಂದು ದಿನ ಶಾಲೆಗೆ ಭೇಟಿ ನೀಡಿ, ಅಲ್ಲಿನ ಉತ್ತಮ ಡಿಜಿಟಲ್ ಸಲಕರಣೆಗಳನ್ನು ನೋಡಿ ಖುಷಿಪಟ್ಟು, ಶಾಲೆಗೆ ಸಿಎಸ್ಆರ್ ಅನುದಾನದಡಿ ಹಣ ನೀಡುವುದಾಗಿ ಭರವಸೆ ನೀಡಿದ್ದರು. ಶಾಲೆಗೆ ಈಗಿರುವ ಉಪಕರಣಗಳಿಗೆಲ್ಲ ಒಟ್ಟಾರೆ 10 ಕೆ.ವಿ. ಸೋಲಾರ್ ಎನರ್ಜಿ ಅಗತ್ಯವಿದ್ದು, ಈ ಸಂಸ್ಥೆ 15 ಕೆ.ವಿ. ಎನರ್ಜಿ ಸೌಲಭ್ಯ ನೀಡಿದೆ. ಅದಕ್ಕಾಗಿ 12 ಲಕ್ಷ ರೂ. ವಿನಿಯೋಗಿಸಿದೆ. ಸೆಲ್ಕೋ ಸಂಸ್ಥೆ ಸಹಯೋಗದೊಂದಿಗೆ ಕೇವಲ 15 ದಿನಗಳಲ್ಲಿಯೇ ಶಾಲೆ ಸಂಪೂರ್ಣ ಸೋಲಾರ್ ಸ್ವಾವಲಂಬಿಯಾಗಿದೆ.
ಪ್ರಾಥಮಿಕ, ಪ್ರೌಢ ಸರ್ಕಾರಿ, ಅನುದಾನಿತ, ಅನುದಾನ ರಹಿತ ಶಾಲೆಗಳೆಲ್ಲ ಸೇರಿ ಉಡುಪಿ ಜಿಲ್ಲೆಯಲ್ಲಿ 1,098 ಹಾಗೂ ದ.ಕ. ಜಿಲ್ಲೆಯಲ್ಲಿ 1,782 ಶಾಲೆಗಳಿವೆ. ಈ ಎರಡು ಕರಾವಳಿ ಜಿಲ್ಲೆಗಳ ಒಟ್ಟು 2,880 ಶಾಲೆಗಳ ಪೈಕಿ ಸಂಪೂರ್ಣ ಸೌರಶಕ್ತಿ ಬಳಸಲ್ಪಡುವ ಮೊದಲ ಶಾಲೆ ಎನ್ನುವ ಹೆಗ್ಗಳಿಕೆ ಈ ಹಕ್ಲಾಡಿ ಪ್ರೌಢಶಾಲೆಯದ್ದಾಗಿದೆ.
