ಕರೊನಾ ಹೆಸರಲ್ಲಿ ಬ್ಯಾಂಕ್ ಖಾತೆಗೆ ಕನ್ನ!

ಬೆಂಗಳೂರು: ಇಡೀ ಜಗತ್ತು ಕರೊನಾ ಭೀತಿಯಲ್ಲಿ ಮುಳುಗಿದ್ದರೆ ಸೈಬರ್ ಹ್ಯಾಕರ್ಸ್ ಜನರ ಬ್ಯಾಂಕ್ ಖಾತೆ, ಡೇಟಾಗೆ ಕನ್ನ ಹಾಕಲು ಅಣಿಯಾಗಿದ್ದಾರೆ. ಇ-ಮೇಲ್, ವಾಟ್ಸ್​ಆಪ್ ಅಥವಾ ಇನ್ನಾವುದೇ ಜಾಲತಾಣಗಳಲ್ಲಿ ಬರುವ ಲಿಂಕ್​ಗಳನ್ನು ಕ್ಲಿಕ್ ಮಾಡದಂತೆ ಸಾರ್ವಜನಿಕರಿಗೆ ಸಿಐಡಿ ಸೈಬರ್ ಪೊಲೀಸರು ಎಚ್ಚರಿಸಿದ್ದಾರೆ.

ಕರೊನಾ ಸೋಂಕು ಹರಡದಂತೆ ಕೈಗೊಳ್ಳಬೇಕಾದ ಮುಂಜಾಗ್ರತಾ ಕ್ರಮಗಳ ಮಾಹಿತಿ ತಿಳಿಯಲು ಪ್ರತಿಯೊಬ್ಬರೂ ಇಂಟರ್​ನೆಟ್​ನಲ್ಲಿ ಹುಡುಕಾಡುತ್ತಿದ್ದಾರೆ. ಮತ್ತೊಂದೆಡೆ ಬ್ಲಾಕ್ ಹ್ಯಾಟ್ ಹ್ಯಾಕರ್​ಗಳ ತಂಡ ಅಮಾಯಕರನ್ನು ದಾರಿ ತಪ್ಪಿಸಿ ಬ್ಯಾಂಕ್ ಖಾತೆ ಮತ್ತು ಡೇಟಾಗೆ ಕನ್ನ ಹಾಕಲು ಪ್ರಯತ್ನಿಸುತ್ತಿರುವ ವಿಚಾರ ಬೆಳಕಿಗೆ ಬಂದಿದೆ.

ಹ್ಯಾಕರ್​ಗಳು ಕರೊನಾ ಸೋಂಕಿನ ನಿಯಂತ್ರಣ ಕುರಿತ ಮಾಹಿತಿಯುಳ್ಳ ಸಂದೇಶವನ್ನು ಇ-ಮೇಲ್ ಮತ್ತು ಮೊಬೈಲ್​ಗೆ ರವಾನಿಸಿ ಆಸಕ್ತಿ ಮೂಡಿಸಿ ಕೊನೆಗೆ ಹೆಚ್ಚಿನ ಮಾಹಿತಿಗಾಗಿ ಲಿಂಕ್ ಮೇಲೆ ಕ್ಲಿಕ್ ಮಾಡುವಂತೆ ಸೂಚನೆ ಕೊಡುತ್ತಾರೆ. ಜನ ಲಿಂಕ್ ಮೇಲೆ ಕ್ಲಿಕ್ ಮಾಡುತ್ತಿದ್ದಂತೆ ಕಂಪ್ಯೂಟರ್ ಮತ್ತು ಮೊಬೈಲ್​ನಲ್ಲಿರುವ ಡೇಟಾ ಕಳವಾಗುತ್ತದೆ. ಆ ನಂತರ ಜನರಿಗೆ ತಿಳಿಯದಂತೆ ಅವರ ಬ್ಯಾಂಕ್ ಖಾತೆಯಲ್ಲಿ ಇರುವ ಹಣಕ್ಕೆ ಕನ್ನ ಹಾಕುತ್ತಾರೆ. ಹೀಗಾಗಿ ಖಾಸಗಿ ಕಂಪನಿಗಳ ನೌಕರರನ್ನು ರಾಜ್ಯದ ಸಿಐಡಿ ಸೈಬರ್ ಕ್ರೖೆಂ ವಿಭಾಗದ ಅಧಿಕಾರಿಗಳು ಕರೊನಾ ವೈರಸ್ ಮಾಹಿತಿಯುಳ್ಳ ಇ-ಮೇಲ್ ಬಗ್ಗೆ ಎಚ್ಚರ ವಹಿಸುವಂತೆ ಅರಿವು ಮೂಡಿಸುತ್ತಿದ್ದಾರೆ.

ದೇಣಿಗೆ ಹೆಸರಲ್ಲೂ ಕನ್ನ: ಕರೊನಾ ವೈರಸ್​ನಿಂದ ನೂರಾರು ಜನ ಮೃತಪಡುತ್ತಿದ್ದಾರೆ. ಅವರಿಗೆ ನೆರವಾಗುವ ಹೆಸರಲ್ಲಿ ದೇಣಿಗೆ ಸಂಗ್ರಹಿಸುವ ಸೋಗಿನಲ್ಲಿ ಸೈಬರ್ ಹ್ಯಾಕರ್ಸ್ ಸೆಳೆಯುತ್ತಾರೆ. ಆನ್​ಲೈನ್​ನಲ್ಲೇ ದೇಣಿಗೆ ವರ್ಗಾವಣೆಗೆ ಆಹ್ವಾನಿಸಿ ನಿಮ್ಮ ಬ್ಯಾಂಕ್ ಖಾತೆ ಅಥವಾ ವ್ಯಾಲೆಟ್ ಮಾಹಿತಿಗೆ ಕನ್ನ ಹಾಕುವ ಸಾಧ್ಯತೆಗಳನ್ನು ತಳ್ಳಿ ಹಾಕುವಂತಿಲ್ಲ.

ಎಚ್ಚೆತ್ತ ಸಾಫ್ಟ್​ವೇರ್ ಕಂಪನಿಗಳು: ಕರೊನಾ ಸೋಂಕಿನ ಭೀತಿಯಿಂದ ಬಹುರಾಷ್ಟ್ರೀಯ ಕಂಪನಿಗಳಾದ ಮೈಕ್ರೋಸಾಫ್ಟ್, ಗೂಗಲ್, ಲಾಗ್​ವಿುನ್, ಸಿಸ್ಕೊ ಸೇರಿ ಹಲವು ಕಂಪನಿಗಳು ತಮ್ಮ ನೌಕರರಿಗೆ ಮನೆಯಲ್ಲೇ ಕುಳಿತು ಕೆಲಸ ಮಾಡುವಂತೆ ತಿಳಿಸಿವೆ. ಅಲ್ಲದೆ, ಕಂಪನಿಯ ರಿಮೋಟ್ ನೆಟ್​ವರ್ಕ್​ನಲ್ಲೇ ಮೀಟಿಂಗ್ ಮತ್ತು ಚರ್ಚೆ

ನಡೆಸಬೇಕು. ಯಾವುದೇ ನೆಟ್​ವರ್ಕ್​ನಲ್ಲಿ ಅಧಿಕಾರಿ, ಸಹೋದ್ಯೋಗಿಗಳ ಜತೆ ಚಾಟ್ ಮತ್ತು ಮಾಹಿತಿ ಹಂಚಿಕೊಳ್ಳದಂತೆ ಕಟ್ಟಾಜ್ಞೆ ಹೊರಡಿಸಿವೆ.

ಕಳ್ಳರಿಂದ ದೂರವಿರಿ

• ಕರೊನಾ ಕುರಿತ ಹೆಚ್ಚಿನ ಮಾಹಿತಿಗೆ ಸರ್ಕಾರದ ವೆಬ್​ಸೈಟ್ ಬಳಸಿ
• ಅನಾಮಧೇಯ ಇ-ಮೇಲ್​ಗಳ ಬಗ್ಗೆ ಎಚ್ಚರಿಕೆ ಇರಲಿ
• ಇ-ಮೇಲ್​ಗೆ ಬರುವ ಲಿಂಕ್​ಗಳ ಮೇಲೆ ಕ್ಲಿಕ್ ಮಾಡಬೇಡಿ
• ವೈಯಕ್ತಿಕ, ಹಣಕಾಸಿನ ಮಾಹಿತಿ ಇ-ಮೇಲ್​ನಲ್ಲಿ ಬಹಿರಂಗ ಪಡಿಸಬೇಡಿ
• ಆನ್​ಲೈನ್​ನಲ್ಲಿ ಮಾಸ್ಕ್, ಸ್ಯಾನಿಟೈಜ್ ಖರೀದಿಸುವಾಗ ಎಚ್ಚರವಹಿಸಿ

| ಗೋವಿಂದರಾಜು ಚಿನ್ನಕುರ್ಚಿ

https://www.vijayavani.net/mysore-zoo/