ಮರಳಿನ ಸಮಸ್ಯೆ ಜನಸಾಮಾನ್ಯರಿಂದ ಹಿಡಿದು, ಸರ್ಕಾರಿ ವಲಯಕ್ಕೂ ಕಾಡುತ್ತಿದೆ ಎಂಬುದು ವಾಸ್ತವ. ಮನೆ ಕಟ್ಟಲು, ಇತರೆ ನಿರ್ಮಾಣ ಕಾಮಗಾರಿಗಳಿಗೂ ಮರಳಿನ ಅಲಭ್ಯತೆ. ಹೀಗಾಗಿ, ನಿರ್ಮಾಣ ಕಾರ್ಯದ ವೆಚ್ಚ ಮತ್ತಷ್ಟು ಏರಿಕೆ ಆಗಿ, ಪರಿಹಾರ ಏನು ಎಂಬುದು ತೋಚದಂತಾಗಿತ್ತು. ಕಡೆಗೂ, ರಾಜ್ಯ ಸರ್ಕಾರ ಹೊಸ ಮರಳು ನೀತಿಗೆ ಅನುಮೋದನೆ ನೀಡಿದೆ. ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅಧ್ಯಕ್ಷತೆಯಲ್ಲಿ ಗುರುವಾರ ನಡೆದ ಸಂಪುಟ ಸಭೆಯಲ್ಲಿ ಹೊಸ ನೀತಿಗೆ ಅಧಿಕೃತ ಮುದ್ರೆ ಹಾಕಲಾಗಿದೆ. ಪ್ರತಿ ಮೆಟ್ರಿಕ್ ಟನ್ ಮರಳಿಗೆ 700 ರೂಪಾಯಿ ದರವನ್ನು ನಿಗದಿ ಮಾಡಲಾಗಿದ್ದು, ಮರಳು ಬ್ಲಾಕ್ ಗುರುತಿಸುವ ಮತ್ತು ಅದನ್ನು ಅಗತ್ಯ ಇರುವವರಿಗೆ ಒದಗಿಸುವ ಜವಾಬ್ದಾರಿಯನ್ನು ಸ್ಥಳೀಯ ಅಧಿಕಾರಿಗಳಿಗೆ ನೀಡಲಾಗಿದೆ. ಈವರೆಗೆ ಮರಳಿನಿಂದ ವಾರ್ಷಿಕವಾಗಿ 130 ಕೋಟಿ ರೂ. ರಾಜಸ್ವ ಸಂಗ್ರಹವಾಗುತ್ತಿತ್ತು. ಹೊಸ ನೀತಿಯ ಪರಿಣಾಮ ಹೆಚ್ಚುವರಿಯಾಗಿ 60-70 ಕೋಟಿ ರೂ. ರಾಜಸ್ವ ಸಂಗ್ರಹವಾಗುವ ನಿರೀಕ್ಷೆ ಇದೆ. ಅಲ್ಲದೆ, ಅಕ್ರಮಗಳಿಗೆ ಕಡಿವಾಣ ಬಿದ್ದು, ಜನರಿಗೆ ಮರಳಿನ ಲಭ್ಯತೆ ಸುಲಭವಾಗಲಿದೆ ಎಂಬುದು ಸಮಾಧಾನದ ಸಂಗತಿ. ಹೊಸನೀತಿಯನ್ನು ಯಾವುದೇ ಲೋಪಗಳಿಗೆ ಅವಕಾಶ ನೀಡದಂತೆ ಸಮರ್ಪಕವಾಗಿ ಅನುಷ್ಠಾನಗೊಳಿಸುವ ಹೊಣೆಗಾರಿಕೆಯೂ ಅಧಿಕಾರಿಗಳ ಮೇಲಿದೆ.
