ಆಗ ಡಾಕ್ಟರೇ ಉತ್ತರ ನೀಡಲಾರಂಭಿಸಿದರು, ನಾವು ಉಸಿರಾಡುವಾಗ ಗಾಳಿಯಲ್ಲಿರುವ ಎಲ್ಲ ಅನಿಲಗಳು ನಮ್ಮ ಶ್ವಾಸಕೋಶವನ್ನು ಸೇರುತ್ತವೆ. ಅಂದರೆ ನಾವು ಉಸಿರಾಡುವುದು ಗಾಳಿಯನ್ನೇ ಹೊರತು ಕೇವಲ ಆಮ್ಲಜನಕವನ್ನಲ್ಲ. ರಕ್ತವು, ಶ್ವಾಸಕೋಶದಲ್ಲಿರುವ ಅಂದಾಜು 30 ಕೋಟಿ ಸಣ್ಣ ಸಣ್ಣ ಅಲ್ವೇಲಿ ಗ್ರಂಥಿಗಳ ಮುಖಾಂತರ ಚಲಿಸುವಾಗ, ನಾವು ತೆಗೆದುಕೊಂಡ ಗಾಳಿಯಲ್ಲಿರುವ 21% ಆಮ್ಲಜನಕದಲ್ಲಿ ಕೇವಲ 5% ಆಮ್ಲಜನಕವನ್ನು ಮಾತ್ರ ತೆಗೆದುಕೊಂಡು ರಕ್ತಕಣಗಳಿಗೆ ಸೇರಿಸಿ ನಂತರ ದೇಹದ ಪ್ರತಿಯೊಂದು ಜೀವಕೋಶಕ್ಕೂ ತಲುಪಿಸುತ್ತದೆ. ಶ್ವಾಸಕೋಶದಲ್ಲಿ ಉಳಿದ ಗಾಳಿಯನ್ನು ನಾವು ಬಿಡುವಾಗ ಆ ಗಾಳಿಯಲ್ಲಿ 78% ಸಾರಜನಕ, 16% ಆಮ್ಲಜನಕ, 5.04% ಇಂಗಾಲದ ಡೈಆಕ್ಸೈಡ್ ಮತ್ತು ಇನ್ನಿತರ ಅನಿಲಗಳು ಹೊರಗೆ ಬರುತ್ತವೆ. ನಮ್ಮ ಬಾಯಿಯಿಂದ ರೋಗಿಯ ಬಾಯಿಗೆ ಗಾಳಿಯನ್ನು ಕೊಟ್ಟಾಗ ರೋಗಿಯ ಶ್ವಾಸಕೋಶದಲ್ಲಿರುವ ಅಲ್ವೇಲಿ ಗ್ರಂಥಿಗಳು, ನಾವು ಬಾಯಿಯಿಂದ ಕೊಟ್ಟ ಗಾಳಿಯಲ್ಲಿರುವ 16% ಆಮ್ಲಜನಕದಲ್ಲಿ ತನಗೆ ಬೇಕಾಗಿರುವ 5% ಆಮ್ಲಜನಕವನ್ನು ತೆಗೆದುಕೊಳ್ಳತ್ತವೆ. ನಂತರ ರೋಗಿಯನ್ನು ಬದುಕಿಸುವ ಸಾಧ್ಯತೆ ಹೆಚ್ಚು. ಮೇಲೆ ಹೇಳಿದ ಅಂಕಿ ಅಂಶಗಳು ಪ್ರತಿಯೊಬ್ಬ ವ್ಯಕ್ತಿಯ ವಯಸ್ಸು, ಗಾತ್ರ, ವ್ಯಕ್ತಿಯ ಅಭ್ಯಾಸಗಳು ಮತ್ತು ಅಂದಿನ ಹವಾಗುಣದ ಮೇಲೆ ಸ್ವಲ್ಪ ವ್ಯತ್ಯಾಸವಾಗುತ್ತವೆ ಎಂದು ತಿಳಿಸಿದರು.
