ಇನ್ನು, ರವಿಚಂದ್ರನ್ ಅವರು ತಮ್ಮ ಒನ್ ಆಂಡ್ ಓನ್ಲಿ ಯೂಟ್ಯೂಬ್ ಚಾನಲ್ನಲ್ಲಿ ವಿಡಿಯೋಗಳನ್ನು ಬಿಡುಗಡೆ ಮಾಡುತ್ತಿರುವುದು ಗೊತ್ತೇ ಇದೆ. ಈ ಬಾರಿ ಅವರು ತಮ್ಮ ಹುಟ್ಟುಹಬ್ಬಕ್ಕೆ ಅಭಿಮಾನಿಗಳಿಗೊಂದು ಉಡುಗೊರೆ ಕೊಟ್ಟಿದ್ದಾರೆ. ಶನಿವಾರ ಅವರೊಂದು ಹೊಸ ವಿಡಿಯೋ ಬಿಡುಗಡೆ ಮಾಡಿದ್ದು, ಈ ವಿಡಿಯೋದಲ್ಲಿ ರವಿಚಂದ್ರನ್ ವಿಭಿನ್ನ ಅವತಾರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ‘ಇದು ಕಾಲ್ಪನಿಕ ಕಥೆಯಲ್ಲ, ನನ್ನಲ್ಲಿರುವ ಸತ್ಯ, ಮನುಷ್ಯರು ಬಣ್ಣಗಳಾಗಿ, ಬಣ್ಣಗಳು ಭಾವನೆಗಳಾಗಿ ...’ ಎಂಬ ಸಾಲಿನೊಂದಿಗೆ ಶುರುವಾಗುತ್ತದೆ. ಈ ವಿಡಿಯೋದಲ್ಲಿ ರವಿಚಂದ್ರನ್, ಜೀವನದ ಕುರಿತಾದ ಹಲವು ಸತ್ಯಗಳನ್ನು ವೀಕ್ಷಕರೊಂದಿಗೆ ಹಂಚಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಅವರ ಕನಸಿನ ಚಿತ್ರಗಳಾದ ‘ಗಾಡ್ - ದಿ ಸ್ಟೋನ್ ಹಾರ್ಟೆಡ್’, ‘ಸಿಕ್ಸ್ಟಿ - ಲೀವಿಂಗ್ ಇನ್ ದಿ ಪಾಸ್ಟ್’, ‘ಬ್ಯಾಡ್ ಬಾಯ್ಸ್- ಥ್ರೀ ಇನ್ ಒನ್’ ಚಿತ್ರಗಳ ಬಗ್ಗೆ ಪ್ರಸ್ತಾಪವಿದೆ. ಅಷ್ಟೇ ಅಲ್ಲ, ‘ರವಿ ಬೋಪಣ್ಣ’ ಇದೇ ವರ್ಷ ಬಿಡುಗಡೆಯಾಗಲಿದೆ ಎಂಬ ಘೋಷಣೆಯೂ ಇದೆ. ಎಂಟು ನಿಮಿಷಗಳ ಈ ವಿಡಿಯೋವನ್ನು ಅವರು ತಮ್ಮ ಹುಟ್ಟುಹಬ್ಬದ ಗಿಫ್ಟ್ ಆಗಿ ಅಭಿಮಾನಿಗಳಿಗೆ ಕೊಟ್ಟಿದ್ದಾರೆ.
