ಮುಂಬೈ: ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ 17ನೇ ಆವೃತ್ತಿಯ 52ನೇ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಹಾಗೂ ಕಲ್ಕತ್ತಾ ನೈಟ್ರೈಡರ್ಸ್ ಮುಖಾಮುಖಿಯಾಗಿದ್ದು, ಉಭಯ ತಂಡಗಳಿಗೂ ಈ ಪಂದ್ಯ ಮಹತ್ವದಾಗಿದೆ. ಇನ್ನೂ ಪಂದ್ಯಕ್ಕೂ ಮುನ್ನ ಕಲ್ಕತ್ತಾ ನೈಟ್ರೈಡರ್ಸ್ ತಂಡದ ಮೆಂಟರ್ ಗೌತಮ್ ಗಂಭೀರ್ ವಿಶೇಷ ಸಂದರ್ಶನದಲ್ಲಿ ಹಲವು ಸ್ವಾರಸ್ಯಕರ ಮಾಹಿತಿಯನ್ನು ಹಂಚಿಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಐಪಿಎಲ್ನಲ್ಲಿ ವಿರಾಟ್, ಧೋನಿ, ಎಬಿಡಿ, ಕ್ರಿಸ್ ಗೇಲ್ ಕಂಡರೆ ಹೆದರದ ಗೌತಮ್ ಗಂಭೀರ್ ಈ ಒಬ್ಬ ಬ್ಯಾಟ್ಸ್ಮನ್ ಕಂಡರೆ ಹೆಚ್ಚು ಭಯ ಬೀಳುತ್ತಾರಂತೆ. ಅದು ಎಷ್ಟರ ಮಟ್ಟಿಗೆ ಎಂದರೆ ಈ ಆಟಗಾರ ಅವರ ನಿದ್ದೆಗೆಡಿಸಿರುವುದಾಗಿ ಸ್ವತಃ ಗೌತಮ್ ಗಂಭೀರ್ ಹೇಳಿಕೊಂಡಿದ್ದಾರೆ. ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಕಮೆಂಟ್ಗಳ ಮಹಾಪೂರವೇ ಹರಿದು ಬರುತ್ತಿದೆ.
ಇದನ್ನೂ ಓದಿ: ಪಾಕಿಸ್ತಾನ ಪರ ಘೋಷಣೆ ಕೂಗಿದರೆ ನಾವೇ ಅವರನ್ನು ಗುಂಡಿಟ್ಟು ಕೊಲ್ಲುತ್ತೇವೆ: ಸಚಿವ ಜಮೀರ್ ಅಹ್ಮದ್
ನಾನು ಯಾವುದಾದರು ಬ್ಯಾಟ್ಸ್ಮನ್ ಒಬ್ಬರನ್ನು ಕಂಡರೆ ಭಯ ಬೀಳುತ್ತೀನಿ ಎಂದರೆ ಅದು ರೋಹಿತ್ ಶರ್ಮಾ. ಏಕೆಂದರೆ, ಯಾರಾದರೂ ಒಬ್ಬ ಆಟಗಾರ ನನ್ನ ನಿದ್ದೆಗೆಡ್ಡಿಸಿದ್ದಾನೆ ಎಂದರೆ ಅದು ರೋಹಿತ್ ಶರ್ಮಾ ಎಂದು ಮೊದಲಿಗೆ ಹೇಳುತ್ತೇನೆ. ಕ್ರಿಸ್ ಗೇಲ್, ವಿರಾಟ್, ಧೋನಿ ಹಾಗೂ ಡಿವಿಲಿಯರ್ಸ್ಗಿಂತ ನನಗೆ ರೋಹಿತ್ ಹೆಚ್ಚು ಕಾಟ ಕೊಟ್ಟಿದ್ದಾರೆ.
ಏಕೆಂದರೆ ರೋಹಿತ್ ಕ್ರೀಸ್ನಲ್ಲಿ ಹೆಚ್ಚು ಕಾಲ ಇದ್ದರೆ ಎದುರಾಳಿಗಳಿಗೆ ತೊಂದರೆ ಕಟ್ಟಿಟ್ಟ ಬುತ್ತಿ ಎಂದು ಹೇಳುತ್ತೇನೆ. ಯಾವುದಾದರೂ ಆಟಗಾರನಿಗೆ ನಾನು ಪ್ಲ್ಯಾನ್ ಎ ಹೊರತುಪಡಿಸಿ ಬಿ ಮತ್ತು ಸಿ ಅನ್ನು ಸಿದ್ದ ಮಾಡಿಕೊಂಡಿರುತ್ತೇನೆ ಅದು ರೋಹಿತ್ ಮಾತ್ರ. ಐಪಿಎಲ್ನಲ್ಲಿ ನಾನು ರೋಹಿತ್ ಶರ್ಮಾ ಹೊರತುಪಡಿಸಿ ಬೇರೆ ಯಾವ ಆಟಗಾರನ ಬಗ್ಗೆ ಎಂದಿಗೂ ಹೆಚ್ಚು ಯೋಚಿಸಿಲ್ಲ. ಆದರೆ, ನಾವು ರೋಹಿತ್ ವಿರುದ್ಧ ಆಡುತ್ತಿದ್ದೇವೆ ಎಂದರೆ ಒಂದು ರಾತ್ರಿ ಮುಂಚಿತವಾಗಿ ನಾನು ಯೋಜನೆಗಳನ್ನು ರೂಪಿಸಿರುತ್ತೇನೆ ಎಂದು ಕೆಕೆಆರ್ ಮೆಂಟರ್ ಗೌತಮ್ ಗಂಭೀರ್ ಹೇಳಿದ್ದಾರೆ.