ದಿಗ್ವೇಶ್ ಮಂಕಡ್​ ಪ್ರಯತ್ನ: ಆಕ್ರೋಶಗೊಂಡ ಕೊಹ್ಲಿ ಡ್ರೆಸ್ಸಿಂಗ್​ ರೂಮ್​ನಲ್ಲಿ ಏನ್​ ಮಾಡಿದ್ರು ನೋಡಿ... Virat Kohli

Virat Kohli : ಈ ಬಾರಿಯ ಐಪಿಎಲ್ ಸೀಸನ್​ ನೋಡುತ್ತಿರುವವರಿಗೆ ಲಖನೌ ಸೂಪರ್​ ಜೈಂಟ್ಸ್​ (LSG) ತಂಡದ ಮಿಸ್ಟರಿ ಸ್ಪಿನ್ನರ್​ ದಿಗ್ವೇಶ್​ ರಾಥಿ ಬಗ್ಗೆ ವಿಶೇಷವಾಗಿ ಹೇಳಬೇಕಿಲ್ಲ. ತನ್ನ ಬೌಲಿಂಗ್​ ಪ್ರದರ್ಶನಕ್ಕಿಂತ ವಿವಾದದಿಂದಲೇ ಹೆಚ್ಚು ಸುದ್ದಿಯಾಗಿದ್ದಾರೆ. ವಿಕೆಟ್​ ಕಿತ್ತ ಬಳಿಕ ತನ್ನ ವಿಚಿತ್ರ ನೋಟ್​​ಬುಕ್​ ಆಚರಣೆಯಿಂದಲೇ ರಾಥಿ ಪ್ರಸಿದ್ಧಿ ಪಡೆದಿದ್ದಾರೆ. ಆದರೆ, ಇದೇ ಸಂಭ್ರಮಾಚರಣೆ ಕೆಲವೊಮ್ಮೆ ಅತಿರೇಕಕ್ಕೆ ಹೋಗಿ ಬಿಸಿಸಿಐ ಕೆಂಗಣ್ಣಿಗೆ ಗುರಿಯಾಗಿ ದಂಡವನ್ನೂ ಕಟ್ಟಿದ್ದಾರೆ. ಸಾಲದು ಎಂಬಂತೆ ಒಂದು ಪಂದ್ಯದಿಂದ ಅಮಾನತು ಸಹ ಆಗಿದ್ದರು. ತಾನು ಆಡುತ್ತಿರುವ ಚೊಚ್ಚಲ ಐಪಿಎಲ್​ ಟೂರ್ನಿಯಲ್ಲೇ ದಿಗ್ವೇಶ್​ ರಾಥಿ ವಿವಾದಿತ ಆಟಗಾರನೆಂಬ ಕುಖ್ಯಾತಿ ಗಳಿಸಿದ್ದಾರೆ. ರಾಥಿ ಅವರ ಈ ಅತಿರೇಕದ ವರ್ತನೆ ನಿನ್ನೆ (ಮೇ 27) ದಾಖಲೆಗಳ ಸರದಾರ ವಿರಾಟ್​ ಕೊಹ್ಲಿ ಅವರಿಗೂ ಕೋಪ ತರಿಸಿದೆ. ಅಷ್ಟಕ್ಕೂ ಏನಾಯಿತು ಎಂಬುದರ ಕಂಪ್ಲೀಟ್​ ಮಾಹಿತಿ ಇಲ್ಲಿದೆ.

ನಿನ್ನೆ ಉತ್ತರ ಪ್ರದೇಶದ ಲಖನೌ ಏಕನಾ ಕ್ರೀಡಾಂಗಣದಲ್ಲಿ ಆರ್​ಸಿಬಿ ಮತ್ತು ಎಲ್​ಎಸ್​ಜಿ ನಡುವೆ ಈ ಸೀಸನ್​ನ ಕೊನೆಯ ಲೀಗ್​ ಪಂದ್ಯ ನಡೆದಿದ್ದು ಎಲ್ಲರಿಗೂ ಗೊತ್ತೇ ಇದೆ. ಈ ಪಂದ್ಯದಲ್ಲಿ ಆರ್​ಸಿಬಿ ವಿರೋಚಿತ ಗೆಲುವು ದಾಖಲಿಸಿ ಅಂಕಪಟ್ಟಿಯಲ್ಲಿ ಅಗ್ರ 2ರಲ್ಲಿ ಸ್ಥಾನಗಿಟ್ಟಿಸಿದೆ. ಈ ಪಂದ್ಯದ ನಡುವೆ ಒಂದು ಆಸಕ್ತಿದಾಯಕ ಘಟನೆ ನಡೆಯಿತು. ಸ್ಫೋಟಕ ಬ್ಯಾಟಿಂಗ್​ನಿಂದ ಅಬ್ಬರಿಸಿ, ಬೊಬ್ಬಿರಿಯುತ್ತಿದ್ದ ಆರ್​ಸಿಬಿ ಬ್ಯಾಟರ್​ ಹಾಗೂ ನಾಯಕ ಜಿತೇಶ್​ ಶರ್ಮಾರನ್ನು ಮಂಕಡ್​ ಮೂಲಕ ಔಟ್​ ಮಾಡಲು ದಿಗ್ವೇಶ್​ ರಾಥಿ ಯತ್ನಿಸಿದರು. ಇದೇ ಸಂಗತಿ ವಿರಾಟ್​ ಕೊಹ್ಲಿ ಅವರ ಆಕ್ರೋಶಕ್ಕೆ ಕಾರಣವಾಗಿದೆ.

ಜಿತೇಶ್ ಶರ್ಮಾ ಮತ್ತು ಮಾಯಾಂಕ್ ಅಗರ್ವಾಲ್​ ನಡುವೆ ಉತ್ತಮ ಜತೆಯಾಟದೊಂದಿಗೆ ಮುನ್ನಡೆದ ಆರ್‌ಸಿಬಿ, 228 ರನ್‌ಗಳ ದೊಡ್ಡ ಗುರಿಯನ್ನು ಬೆನ್ನಟ್ಟುವಾಗ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸುತ್ತಿರುವಂತೆ ಕಂಡುಬಂದಂತಹ ಸಮಯದಲ್ಲಿ ಎಲ್‌ಎಸ್‌ಜಿಯ ದಿಗ್ವೇಶ್ ರಾಥಿ ಮಂಕಡ್ ಮೂಲಕ ಜಿತೇಶ್​ರನ್ನು ಔಟ್​ ಮಾಡಲು ಪ್ರಯತ್ನಿಸಿದರು. ಈ ತೀರ್ಪನ್ನು ಮೂರನೇ ಅಂಪೈರ್‌ಗೆ ಕಳುಹಿಸಲಾಯಿತು. ಬಳಿಕ ಅದನ್ನು ಪರಿಶೀಲಿಸಿದ ಥರ್ಡ್​ ಅಂಪೈರ್​, ನಾನ್-ಸ್ಟ್ರೈಕರ್‌ನ ತುದಿಯಲ್ಲಿ ಬೌಲರ್ ತನ್ನ ಆಕ್ಷನ್ ಅನ್ನು ಪೂರ್ಣಗೊಳಿಸಿದ್ದಾರೆ ಎಂದು ತೀರ್ಪು ನೀಡಿ, ನಾಟ್​ಔಟ್​ ಎಂದು ಘೋಷಿಸಿದರು.

ಈ ನಾಟಕೀಯ ಪ್ರಸಂಗ ನಡೆದಿದ್ದು 17 ನೇ ಓವರ್‌ನಲ್ಲಿ. ಜಿತೇಶ್ ಅವರು ದಿಗ್ವೇಶ್​ ಎಸೆದ ಮೊದಲ ಎಸೆತದಲ್ಲಿ ರಿವರ್ಸ್ ಸ್ವೀಪ್ ಮಾಡಲು ಪ್ರಯತ್ನಿಸಿದರು. ಈ ವೇಳೆ ಪಾಯಿಂಟ್‌ನಲ್ಲಿ ನಿಂತಿದ್ದ ಆಯುಷ್ ಬಡೋನಿ ಕ್ಯಾಚ್​ ಹಿಡಿದರು. ಇದರಿಂದ ಜಿತೇಶ್, ನಿರಾಶೆಗೊಂಡು, ಮಂಡಿಯೂರಿ ನೆಲದಲ್ಲಿ ಕುಳಿತರು. ಈ ವೇಳೆ ದಿಗ್ವೇಶ್​ರಾಥಿ ಎಂದಿನಂತೆ ತಮ್ಮ ವಿಶಿಷ್ಟ ನೋಟ್​ಬುಕ್​ ಶೈಲಿಯಲ್ಲಿ ಆಚರಿಸಲು ಪ್ರಾರಂಭಿಸಿದರು. ಆದರೆ, ದೇವರ ಆಟ ಬೇರೆಯೇ ಇತ್ತು. ಅದೇನೆಂದರೆ, ಅಂಪೈರ್ ಆ ಚೆಂಡನ್ನು ನೋ-ಬಾಲ್ ಎಂದು ಹೇಳಿದರು. ಥರ್ಡ್​ ಅಂಪೈರ್​ ಪರಿಶೀಲಿಸಿದಾಗ ಅದು ಬ್ಯಾಕ್‌ಫೂಟ್ ನೋ-ಬಾಲ್ ಎಂಬುದು ಬಹಿರಂಗವಾಯಿತು. ಇದು ಜಿತೇಶ್‌ಗೆ ಒಂದು ದೊಡ್ಡ ಜೀವದಾನ ಸಿಕ್ಕಿತು.

ನಂತರ ಅದೇ ಓವರ್‌ನಲ್ಲಿ, ಐದನೇ ಎಸೆತದಲ್ಲಿ, ದಿಗ್ವೇಶ್​ ರಾಥಿ ಅವರು ಕ್ರೀಸ್‌ನಿಂದ ಬೇಗನೆ ಹೊರಬಂದ ಜಿತೇಶ್ ಶರ್ಮಾ ಅವರನ್ನು ಔಟ್ ಮಾಡಲು ನಾನ್-ಸ್ಟ್ರೈಕರ್​ನಲ್ಲಿ ಮಂಕಡ್​ ಪ್ರಯತ್ನಿಸಿದರು. ಅಪೀಲ್​ ಕೂಡ ಮಾಡಿದರು. ಈ ವೇಳೆ ಅಂಪೈರ್ ಮತ್ತೊಮ್ಮೆ ನಿರ್ಧಾರವನ್ನು ಮೂರನೇ ಅಂಪೈರ್‌ಗೆ ಉಲ್ಲೇಖಿಸಿದರು. ಆದರೆ, ರನೌಟ್ ಪ್ರಯತ್ನಕ್ಕೂ ಮೊದಲು ದಿಗ್ವೇಶ್​ ರಾಥಿ ಬಾಲ್​ ಬಿಡುಗಡೆ ಪಾಯಿಂಟ್ ದಾಟಿದ ಕಾರಣ ನಾಟ್ ಔಟ್ ಎಂದು ತೀರ್ಪು ನೀಡಿದರು. ಇದಕ್ಕೆ ಪೂರಕವಾಗಿ, ಮೂರನೇ ಅಂಪೈರ್ ತೀರ್ಪು ಪರಿಶೀಲಿಸುತ್ತಿರುವಾಗ ಎಲ್‌ಎಸ್‌ಜಿ ನಾಯಕ ರಿಷಭ್ ಪಂತ್ ಕೂಡ ಮೇಲ್ಮನವಿಯನ್ನು ಹಿಂತೆಗೆದುಕೊಂಡರು. ಈ ವೇಳೆ ಜಿತೇಶ್​ ಅವರು ಪಂತ್​ ಅವರನ್ನು ಅಪ್ಪಿಕೊಂಡು ಕೃತಜ್ಞತೆ ಸಹ ಸಲ್ಲಿಸಿದರು. ಈ ಕ್ಷಣ ಕ್ರೀಡಾಸ್ಫೂರ್ತಿಗೆ ಉದಾಹರಣೆಯಾಯಿತು.

ಇದನ್ನೂ ಓದಿ: ಈ ಮೂರು ರಾಶಿಯವರು ನಾಯಕತ್ವದ ಗುಣಗಳೊಂದಿಗೆ ಜನಿಸುತ್ತಾರಂತೆ! ನಿಮ್ಮ ರಾಶಿಯೂ ಇದೇನಾ? Zodiac Signs

ವಿರಾಟ್​ ಕೊಹ್ಲಿ ಕೋಪ

ಮೈದಾನದಲ್ಲಿ ನಡೆದ ಮಂಕಡ್ ನಾಟಕವು ವಿರಾಟ್ ಕೊಹ್ಲಿಯನ್ನು ನಿರಾಶೆಗೊಳಿಸಿತು. ಈ ವೇಳೆ ಡ್ರೆಸ್ಸಿಂಗ್ ಕೋಣೆಯಲ್ಲಿದ್ದ ವಿರಾಟ್​ ಕೊಹ್ಲಿ ಕೋಪದಿಂದ ವಾಚ್​ ಬಾಟಲ್​ ಅನ್ನು ಒಡೆದು ಹಾಕುತ್ತಿರುವುದು ಕಂಡುಬಂದಿತು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಕೂಡ ವೈರಲ್​ ಆಗಿದ್ದು, ಅಭಿಮಾನಿಗಳು ದಿಗ್ವೇಶ್​ ರಾಥಿ ವಿರುದ್ಧ ಟೀಕಾ ಪ್ರಹಾರ ನಡೆಸಿದ್ದಾರೆ. ಇದೇ ಸಂದರ್ಭದಲ್ಲಿ ಅಪೀಲ್​ ಹಿಂತೆಗೆದುಕೊಂಡ ನಾಯಕ ರಿಷಭ್​ ಪಂತ್​ ನಡೆಯನ್ನೂ ಮೆಚ್ಚಿಕೊಂಡಿದ್ದಾರೆ. ಇಷ್ಟೆಲ್ಲ ಡ್ರಾಮಾ ಮಾಡಿದರೂ ಕೂಡ ಆರ್​ಸಿಬಿ ಗೆಲುವನ್ನು ಮಾತ್ರ ಯಾರಿಂದಲೂ ತಡೆಯಲಾಗಲಿಲ್ಲ.

ಇನ್ನೂ ಪಂದ್ಯದ ವಿಚಾರಕ್ಕೆ ಬಂದರೆ, ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಲಖನೌ ತಂಡ ನಾಯಕ ರಿಷಭ್ ಪಂತ್ (ಅಜೇಯ 118 ರನ್​, 61 ಎಸೆತ, 11 ಬೌಂಡರಿ, 8 ಸಿಕ್ಸರ್) ಭರ್ಜರಿ ಶತಕ, ಮಿಚೆಲ್ ಮಾರ್ಷ್ (67 ರನ್​, 37 ಎಸೆತ, 4 ಬೌಂಡರಿ, 5 ಸಿಕ್ಸರ್) ಅವರ ಅರ್ಧಶತಕ ನೆರವಿನಿಂದ ನಿಗದಿತ 20 ಓವರ್‌ಗಳಲ್ಲಿ ಮೂರು ವಿಕೆಟ್‌ಗಳ ನಷ್ಟಕ್ಕೆ 227 ರನ್‌ಗಳ ಬೃಹತ್ ಸ್ಕೋರ್ ಗಳಿಸಿತು. ಆರ್‌ಸಿಬಿ ಬೌಲರ್‌ಗಳಲ್ಲಿ ನುವಾನ್​ ತುಷಾರ, ಭುವನೇಶ್ವರ್ ಕುಮಾರ್​ ಮತ್ತು ರೊಮಾರಿಯೊ ಶೆಫರ್ಡ್ ತಲಾ ಒಂದು ವಿಕೆಟ್ ಪಡೆದರು.

ಬೃಹತ್​ ಗುರಿ ಬೆನ್ನತ್ತಿದ ಆರ್​ಸಿಬಿ, ಜಿತೇಶ್ ಶರ್ಮಾ (ಅಜೇಯ 85 ರನ್​, 33 ಎಸೆತ 8 ಬೌಂಡರಿ, 6 ಸಿಕ್ಸರ್), ವಿರಾಟ್ ಕೊಹ್ಲಿ (54 ರನ್​, 30 ಎಸೆತ, 10 ಬೌಂಡರಿ) ಮತ್ತು ಮಾಯಾಂಕ್ ಅಗರ್ವಾಲ್ (ಅಜೇಯ 41 ರನ್​, 23 ಎಸೆತಗಳಲ್ಲಿ 5 ಬೌಂಡರಿ) ಭರ್ಜರಿ ಬ್ಯಾಟಿಂಗ್​ ಪ್ರದರ್ಶನದೊಂದಿಗೆ 18.4 ಓವರ್‌ಗಳಲ್ಲಿ 4 ವಿಕೆಟ್‌ಗಳ ನಷ್ಟಕ್ಕೆ ಗುರಿ ತಲುಪಿತು. ಲಖನೌ ಬೌಲರ್‌ಗಳಲ್ಲಿ ವಿಲಿಯಂ ಒ ರೂರ್ಕ್ ಎರಡು ವಿಕೆಟ್ ಪಡೆದರೆ, ಆಕಾಶ್ ಮಹಾರಾಜ್ ಸಿಂಗ್ ಮತ್ತು ಆವೇಶ್ ಖಾನ್ ತಲಾ ಒಂದು ವಿಕೆಟ್ ಪಡೆದರು. ಈ ಗೆಲುವಿನೊಂದಿಗೆ ಆರ್​ಸಿಬಿ ಅಂಕಪಟ್ಟಿಯಲ್ಲಿ ಅಗ್ರ-2 ಸ್ಥಾನಕ್ಕೇರಿದೆ. ಕ್ವಾಲಿಫೈಯರ್-1 ರಲ್ಲಿ ಸ್ಥಾನ ಪಡೆದುಕೊಂಡಿದ್ದು, ಮೇ 29 ರಂದು ಮುಲ್ಲನ್ಪುರದಲ್ಲಿ ನಡೆಯಲಿರುವ ಕ್ವಾಲಿಫೈಯರ್ 1 ರಲ್ಲಿ ಟೇಬಲ್-ಟಾಪರ್ ಪಂಜಾಬ್ ಕಿಂಗ್ಸ್ ತಂಡವನ್ನು ಎದುರಿಸಲಿದೆ. (ಏಜೆನ್ಸೀಸ್​)

https://www.vijayavani.net/not-even-one-person-can-hold-a-bat-all-out-for-2-runs-one-extra-run-in-that-9-ducks-out

https://www.vijayavani.net/these-are-the-cricketers-who-will-retire-after-ipl-2025