ನವದೆಹಲಿ: ಸಾಲ ನೀಡಿಕೆ ಹಾಗೂ ಬೆಟ್ಟಿಂಗ್ನಿರತ ಆಪ್ಗಳ ಸಹಿತ ಚೀನಾ ನಿಯಂತ್ರಿತ ನೂರಕ್ಕೂ ಹೆಚ್ಚು ಆಪ್ಗಳು ಭಾರತದಿಂದ ಸಾವಿರಾರು ಕೋಟಿ ರೂಪಾಯಿಗಳನ್ನು ಲೆಕ್ಕ ಪರಿಶೋಧಕರ (ಚಾರ್ಟರ್ಡ್ ಅಕೌಂಟೆಂಟ್- ಸಿಎ) ನೆರವಿನಿಂದ ತಮ್ಮ ದೇಶಕ್ಕೆ ರವಾನಿಸಿದ ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ.
ಆರಂಭದಲ್ಲಿ ಸಿಎಗಳ ನೆರವಿನಿಂದ ಭಾರತದ ನಕಲಿ ನಿರ್ದೇಶಕರ ಮೂಲಕ ಕಂಪನಿಗಳನ್ನು ಸ್ಥಾಪಿಸಲಾಗುತ್ತದೆ. ನಂತರ, ಚೀನೀ ನಾಗರಿಕರು ಭಾರತಕ್ಕೆ ಬಂದು ಈ ಕಂಪನಿಗಳ ನಿರ್ದೇಶಕ ಸ್ಥಾನವನ್ನು ವಹಿಸಿಕೊಳ್ಳುತ್ತಾರೆ ಎಂಬುದು ಜಾರಿ ನಿರ್ದೇಶನಾಲಯ (ಇ.ಡಿ.) ತನಿಖೆಯಿಂದ ಗೊತ್ತಾಗಿದೆ. ಚೀನಾದ ಕೆಲವು ನಾಗರಿಕರು ಕಾನೂನುಬಾಹಿರವಾಗಿ ಹಲವು ಭಾರತೀಯ ಕಂಪನಿಗಳನ್ನು ಆರಂಭಿಸಿದ್ದಾರೆ. ಈ ಕಂಪನಿಗಳು ಸಾವಿರಾರು ಕೋಟಿ ರೂಪಾಯಿ ಸಂಗ್ರಹಿಸಿ ಚೀನಾಕ್ಕೆ ವರ್ಗಾಯಿಸಿವೆ. ಈ ರೀತಿಯಾಗಿ ಅಕ್ರಮ ನಡೆಸುತ್ತಿರುವುದನ್ನು ಪತ್ತೆ ಹಚ್ಚಲು ಹಣಕಾಸು ಬೇಹುಗಾರಿಕೆ ಘಟಕಕ್ಕೆ (ಎಫ್ಐಯು) ಕೂಡ ಸಾಧ್ಯವಾಗಿರಲಿಲ್ಲ. ದೇಶದಿಂದ ಅಪಾರ ಪ್ರಮಾಣದ ಹಣ ಸೋರಿಕೆಯಾಗುತ್ತಿರುವ ಸುಳಿವು ತಿಳಿದು ಚೀನಾ ನಿಯಂತ್ರಿತ ನೂರಕ್ಕೂ ಅಧಿಕ ಆಪ್ಗಳ ಮೇಲೆ ದಾಳಿ ಮಾಡಿದಾಗ ಈ ವಂಚನೆ ಬಯಲಾಗಿದೆ. ಈ ಆಪ್ಗಳು ಸಾಲ ನೀಡಿಕೆ, ಡೇಟಿಂಗ್ ಮತ್ತು ಬೆಟ್ಟಿಂಗ್ಗೆ ಸಂಬಂಧಿಸಿವೆ. ಈಗ ಭಾರತೀಯ ಪಾವತಿ ಸಂಸ್ಥೆಗಳ ವಿರುದ್ಧ ಇನ್ನಷ್ಟು ಕ್ರಮ ಕೈಗೊಳ್ಳಲು ಬ್ಯಾಂಕ್ಗಳು ಮತ್ತು ಇತರ ನಿಯಂತ್ರಣಾ ಸಂಸ್ಥೆಗಳ ಜೊತೆ ಇ.ಡಿ. ಅಧಿಕಾರಿಗಳು ಸಮಾಲೋಚನೆ ನಡೆಸುತ್ತಿದ್ದಾರೆ.
ಭಾರತೀಯರ ನೇಮಕ: ಚೀನಿ ಕಂಪನಿಗಳು, ಬ್ಯಾಂಕ್ ಮತ್ತು ವಾಣಿಜ್ಯ ಖಾತೆಗಳನ್ನು ತೆರೆಯಲು ಭಾರತೀಯರನ್ನು ನೇಮಕ ಮಾಡಿಕೊಳ್ಳುತ್ತವೆ. ದುಬಾರಿ ಬಡ್ಡಿ ದರಕ್ಕೆ ನೀಡಲಾಗುವ ಸಾಲಗಳ ವಸೂಲಿಗೆ ಅವುಗಳ ಗ್ರಾಹಕರಿಗೆ ಬೆದರಿಕೆ ಹಾಕುತ್ತವೆ ಎನ್ನುವುದು ಈಗಾಗಲೇ ಬಯಲಾಗಿದೆ.
ಬೆಟ್ಟಿಂಗ್ ಆ್ಯಪ್ಗಳದ್ದೇ 1,300 ಕೋಟಿ: ಬೆಟ್ಟಿಂಗ್ ಆಪ್ಗಳೇ 1,300 ಕೋಟಿ ರೂಪಾಯಿ ಸಂಗ್ರಹಿಸಿರುವುದು ಇ.ಡಿ. ವಿಚಾರಣೆಯಿಂದ ತಿಳಿದು ಬಂದಿದೆ. ಅಕ್ರಮ ಹಣ ವರ್ಗಾವಣೆ ಸಂಬಂಧ ಎರಡು ವರ್ಷಗಳ ಹಿಂದೆ ಚೀನಿ ಬೆಟ್ಟಿಂಗ್ ಮತ್ತು ಡೇಟಿಂಗ್ ಆಪ್ಗಳು ಎಚ್ಎಸ್ಬಿಸಿ ಬ್ಯಾಂಕ್ನಲ್ಲಿ ಹೊಂದಿದ್ದ 47 ಕೋಟಿ ರೂಪಾಯಿಯನ್ನು ವಶಪಡಿಸಿಕೊಂಡಿದ್ದ ಇ.ಡಿ., ಪೇಮೆಂಟ್ ಗೇಟ್ವೇಗಳಾದ ಪೇಟಿಎಂ, ಕ್ಯಾಶ್ಫ್ರೀ ಮತ್ತು ರೇಝುರ್ ಪೇ ಮೇಲೆ ನಿಗಾ ವಹಿಸಿತ್ತು. ದೊಡ್ಡ ಪ್ರಮಾಣದ ಹಣ ವರ್ಗಾವಣೆ ವ್ಯವಹಾರ ಗಳನ್ನು ಎಫ್ಐಯು ಗಮನಕ್ಕೆ ತಾರದ ಹಿನ್ನೆಲೆಯಲ್ಲಿ ಅವುಗಳ ಮೇಲೆ ಇ.ಡಿ. ಕಣ್ಣು ನೆಟ್ಟಿತ್ತು.
ನನ್ನಂಥ ಸುಂದರಿಯನ್ನು ಅವರು ನೋಡೇ ಇಲ್ಲ, ಅದಕ್ಕೆ ಬಂಧಿಸಿದ್ದಾರೆ!; ಪೊಲೀಸರ ವಿರುದ್ಧವೇ ಆರೋಪ..