ಹೊನ್ನಾವರ :ಮಳೆಯ ಆರ್ಭಟ ಗುರುವಾರ ಮುಂದುವರೆದಿದ್ದು ತಾಲೂಕಿನ ನದಿತೀರದ ಹಾಗೂ ತಗ್ಗು ಪ್ರದೇಶಗಳು ಜಲಾವ್ರತವಾಗಿವೆ. ಗುಂಡಬಾಳ ನದಿ ಮತ್ತು ಭಾಸ್ಕೇರಿ ನದಿಗಳು ಅಪಾಯ ಮಟ್ಟದಲ್ಲಿ ತುಂಬಿ ಹರಿಯುತ್ತಿವೆ.
ಗುಂಡಬಾಳ ನದಿ ತೀರದ ಊರುಗಳಾದ ಗುಂಡಬಾಳ, ಹೆಬೈಲ್, ಗುಂಡಿಬೈಲ, ಚಿಕ್ಕನಕೋಡ, ಹಾಡಗೇರಿ, ಹುಡಗೋಡ, ಹಡಿನಬಾಳ, ಕಡಗೇರಿ, ನಾಥಗೇರಿಯಲ್ಲಿ ಮನೆಗಳಿಗೆ ನೀರು ನುಗ್ಗಿದೆ. ತಗ್ಗು ಪ್ರದೇಶದ ಮನೆಗಳ ಜನರು ಕಾಳಜಿಕೇಂದ್ರದಲ್ಲಿ ಆಶ್ರಯ ಪಡೆದಿದ್ದಾರೆ. ಸ್ಥಳಕ್ಕೆ ಕಂದಾಯ ಅಧಿಕಾರಿಗಳು ಮತ್ತು ಸ್ಥಳಿ ಗ್ರಾಮ ಪಂಚಾಯಿತಿಯ ಸಿಬ್ಬಂದಿ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಗೇರುಸೊಪ್ಪ ಜಲಾಶಯದಿಂದ ನೀರು ಬಿಡುವ ಹಿನ್ನೆಲೆಯಲ್ಲಿ ಶರಾವತಿ ನದಿ ತೀರದ ಸರಳಗಿ ಮತ್ತು ಅಳ್ಳಂಕಿಯಲ್ಲಿ ಕಾಳಜಿಕೇಂದ್ರಗಳನ್ನು ತೆರೆಯಲಾಗಿದೆ.
ಕಾಳಜಿಕೇಂದ್ರಗಳು: ಹೊನ್ನಾವರ ತಾಲೂಕಿನಲ್ಲಿ ಗುಂಡಬಾಳ ನದಿ ಹಾಗೂ ಶರಾವತಿ ನದಿ ತೀರದ ಒಂಭತ್ತು ಕಡೆಗಳಲ್ಲಿ ಕಾಳಜಿಕೇಂದ್ರಗಳನ್ನು ತೆರೆಯಲಾಗಿದ್ದು 341 ಸಂತ್ರಸ್ಥರು ಆಶ್ರಯ ಪಡೆದಿದ್ದಾರೆ.
ಗುಂಡಬಾಳ ನಂ.2 ಶಾಲೆಯಲ್ಲಿ 13 ಜನರು, ಹೆಬೈಲ್ ಅಂಗನವಾಡಿ ಕೇಂದ್ರದಲ್ಲಿ 7 ಜನರು, ಗುಂಡಿಬೈಲ್ ನಂ.1 ಶಾಲೆಯಲ್ಲಿ 37 ಜನರು, ಗುಂಡಿಬೈಲ್ ನಂ. 2 ಶಾಲೆಯಲ್ಲಿ 49 ಜನರು, ಹಡಿನಬಾಳ ಸರ್ಕಾರಿ ಪ್ರೌಢಶಾಲೆಯಲ್ಲಿ 113 ಜನರು, ನಾಥಗೇರಿ ಶಾಲೆಯಲ್ಲಿ 15 ಜನರು, ಕಡಗೇರಿಯಲ್ಲಿ 14 ಜನರು ಆಶ್ರಯ ಪಡೆದಿದ್ದಾರೆ. ಗೇರುಸೊಪ್ಪಾ ಜಲಾಶಯದಿಂದ ನೀರು ಬೀಡುವ ಮುನ್ನೆಚ್ಚರಿಕಾ ಕ್ರಮವಾಗಿ ಸರಳಗಿ ಶಾಲೆಯಲ್ಲಿ 68 ಜನರು, ಅಳ್ಳಂಕಿ ಪ್ರೌಢಶಾಲೆಯಲ್ಲಿ 25 ಜನರು ಕಾಳಜಿ ಕೇಂದ್ರದಲ್ಲಿ ಆಶ್ರಯ ಪಡೆದಿದ್ದಾರೆ.
